Vakatakila e Vola o Joni 13:1-18
13 Sa qai mai duri tu vakadua o koya* ena nuku ni matasawa.
Au qai raica e dua na manumanu kila+ ni cabe mai wasawasa,+ e tini na kena ileu, e vitu na uluna, na kena ileu kece e yadua na isala vakatui, e volai e uluna yadua na yaca e vosabeci kina na Kalou.
2 Na manumanu kila au raica qo e vaka na lepate, ia na yavana e vaka na yava ni bea, na gusuna e vaka na gusu ni laione. E solia na gata levu+ vua na manumanu kila na nona kaukaua, na nona idabedabe vakaturaga, kei na levu na lewa.+
3 Au raica sara ni dua vei ira na uluna e vaka ga e vakamavoataki me mate kina, ia e sa mavo na nona mavoa a voleka kina ni mate,+ e qai muria na manumanu kila o vuravura taucoko ena qoroqoro.
4 Era qarava na gata a solia na lewa vua na manumanu kila, era qarava na manumanu kila nira kaya: “O cei e vakataki koya na manumanu kila, o cei e rawa ni vala kei koya?”
5 E soli vua na gusu me vosa vakaviavialevu, me vosa veibeci, e soli tale ga me lewa me 42 na vula.+
6 E mani tekivu vosabeca na Kalou na gusuna,+ e vosabeca na yacana, na nona itikotiko, kei ira mada ga na tiko mai lomalagi.+
7 E vakatarai me vala kei ira na yalosavasava me vakamalumalumutaki ira,+ e soli tale ga vua na kaukaua me lewai ira na yavusa kece, na tamata kece, o ira na duivosavosa, kei na veimatanitu.
8 Era na qaravi koya o ira kece na tiko e vuravura. Mai na ivakatekivu kei vuravura, e sega ni dua e bau volai na yacana ena nona ivolavivigi ni bula+ na Lami sa vakamatei.+
9 O koya e vakadaligana, me rogoca sara.+
10 O koya e nakiti me vesu, ena vesu ga. O koya e veivakamatei ena iseleiwau, me vakamatei ena iseleiwau.+ Qo na vuna ena vinakati kina vei ira na yalosavasava+ na vosota+ kei na vakabauta.+
11 Au qai raica e dua tale na manumanu kila e lako cake mai vuravura, e rua na kena ileu me vaka na lami, ia e vosa me vaka na gata levu.+
12 E vakaraitaka o koya na kaukaua kece ni imatai ni manumanu kila,+ ni rai tu na imatai ni manumanu kila. E vakasaurarataki vuravura kei ira na tiko kina mera qarava na imatai ni manumanu kila, na manumanu sa mavo na nona mavoa.+
13 E cakava na ivakatakilakila lelevu, e bau vakavuna me lutu na bukawaqa mai lomalagi i vuravura nira rai tu na kawatamata.
14 E vakacalai ira na tiko e vuravura ena vuku ni ivakatakilakila e vakatarai me cakava ni rai tu na manumanu kila, e tukuna tale ga vei ira na tiko e vuravura mera cakava e dua na ivakatakarakara+ ni manumanu kila a vakamavoataki ena iseleiwau, ia sa bula tale.+
15 E qai vakatarai me solia na icegu vua na ivakatakarakara ni manumanu kila, me vosa kina, me vakamatei ira kece tale ga era sega ni qarava na ivakatakarakara ni manumanu kila.
16 E vakasaurarataka na tamata kece—na vetaira kei na vetaicake, na vutuniyau kei na dravudravua, o ira na galala kei na bobula—me vakatakilakilataki na ligadra imatau se na yadredra,+
17 me kua ni dua e volia rawa e dua na ka, se volitaka e dua na ka, vakavo ga o koya e tu vua na ivakatakilakila, na yaca+ ni manumanu kila, se naba ni yacana.+
18 Ena yaga i ke na vuku: O koya e yalomatua me cakacakataka na naba ni manumanu kila, ni naba ni tamata, na kena naba na 666.+
iVakamacala e ra
^ Oya na gata levu.
