Vakatakila e Vola o Joni 22:1-21
22 E qai vakaraitaka vei au e dua na uciwai ni wai ni bula,+ e savasava me vaka na karisitala, e drodro mai na idabedabe vakaturaga ni Kalou kei na Lami,+
2 ena lomadonu ni kena gaunisala levu. Era tubu ena yasa ni uciwai ruarua na kau ni bula e dau vua vaka12, e dau vua e veivula. Na drauna era vakabulai kina na veimatanitu.+
3 Sa na sega tale ni cudruvi. Ia ena tiko ena koro na idabedabe vakaturaga ni Kalou kei na Lami,+ era na qai qaravi koya na nona dauveiqaravi,
4 era na raica na matana,+ ena volai e yadredra na yacana.+
5 Sa na sega tale na bogi,+ ena sega ni vinakati tale na rarama ni cina se na rarama ni siga, ni na vakararamataki ira o Jiova* na Kalou,+ era na qai veiliutaki vakatui me tawamudu.+
6 E kaya vei au: “E donu na vosa qo, e dina tale ga,+ io, o Jiova* na Kalou, o koya e uqeta na vosa era vola na parofita,+ e tala mai nona agilosi me vakaraitaka vei ira nona dauveiqaravi na ka kece ena vakarau yaco.
7 Raica! Au na lako totolo yani.+ E marau o koya e muria tiko ga na vosa ni parofisai ena ivolavivigi qo.”+
8 O yau o Joni, au a rogoca, au raica tale ga na ka kece qo. Niu rogoca au qai raica, au tekicuva sara ena yava ni agilosi e vakaraitaka vei au na ka kece qo meu qaravi koya.
9 Ia e kaya vei au: “Qarauna! Kua ni cakava qori! O yau na nomu itokani dauveiqaravi ga, au nodra itokani dauveiqaravi tale ga na tacimu era parofita, kei ira na muria tiko na vosa ena ivolavivigi qo. Qarava na Kalou.”+
10 E kaya tale ga vei au: “Kua ni dregata na vosa ni parofisai ena ivolavivigi qo, ni sa voleka na gauna lokuci.
11 O koya e cakava tiko na ka e sega ni dodonu, me tomana nona ivalavala tawadodonu, o koya e dukaveluvelu na nona itovo me dukaveluvelu tiko ga, ia o koya e cakava tiko na ka dodonu me cakadodonu tiko ga, o koya tale ga e yalosavasava me yalosavasava tiko ga.
12 “‘Raica! Au na lako totolo yani, sa tiko qo na icovi au na solia vua na tamata yadua me salavata kei na nona ivalavala.+
13 O yau na Alifa kei na Omeka,*+ na imatai kei na iotioti, na itekitekivu kei na itinitini.
14 Era marau o ira era vakasavasavataka na nodra isulu,+ nira na vakadonui mera lako ina kau ni bula,+ mera curu i lomanikoro nira muria na kena matamata.+
15 Era tiko ga e tuba na koli, o ira na dau vakatevoro, o ira na veiyacovi tawadodonu,* o ira na daulaba, o ira na dauqaravi matakau, kei ira na tokona na lasu era daulasu tale ga.’+
16 “‘O yau o Jisu, au tala noqu agilosi me vakadinadinataka vei kemuni na ka kece qo ena vukudra na ivavakoso. O yau na waka, au kawa i Tevita,+ o yau tale ga na kalokalo serau ni mataka.’”+
17 Erau kaya tiko ga na yalo tabu kei na yalewavou,+ “Mai!” Me kaya tale ga o koya yadua e rogoca, “Mai!” Me lako mai o koya yadua e karamaca,+ me mai gunuva wale na wai ni bula o koya yadua e vinakata.+
18 “Au tukuna vakadodonu vei ira kece na rogoca na vosa ni parofisai ena ivolavivigi qo: Ke dua e kuria na ka kece era sa volai qo,+ ena qai vakaikuritaka vua na Kalou na ka rarawa era volai tu ena ivolavivigi qo,+
19 ke dua e kauta laivi e dua na ka ena vosa ni parofisai ena ivolavivigi qo, ena qai kauta laivi na Kalou na ka e dodonu me soli vua me vaka e volai ena ivolavivigi qo. Ena sega ni vakadonui me kania na vuata mai na kau ni bula,+ ena sega tale ga ni curu ina koro tabu.+
20 “E kaya o koya e vakadinadinataka na ka kece qo, ‘Io, au na lako totolo yani.’”+
“Emeni! Ni lako mai, Turaga Jisu.”
21 Me tiko mada ga kei ira na yalosavasava na loloma soli wale ni Turaga o Jisu Karisito.
iVakamacala e ra
^ Se “na A kei na Z.” Na Alifa kei na Omeka erau imatai kei na iotioti ni matanivola ena matuavosa vaKirisi.
^ Raica na iVakamacala ni Vosa.
