Vunau ni Soro 10:1-20
10 Erau qai dui kauta o Netapi kei Epaiu+ na luvei Eroni na nodrau itawatawa ni bukawaqa, rau tawana kina na bukawaqa qai biu e delana na ka boivinaka.+ Erau qai tekivu cabora ena mata i Jiova na bukawaqa e sega ni vakadonui,+ na ka e sega ni vakarota vei rau.
2 E lako sobu mai vei Jiova na bukawaqa qai yameci rau,+ rau mani mate ena mata i Jiova.+
3 E qai kaya o Mosese vei Eroni: “Qo na ka sa kaya o Jiova, ‘Au na savasava vei ira era voleka vei au,+ au na vakalagilagi tale ga ena matadra na tamata kece.’” E galu voli ga o Eroni.
4 E mani kacivi Misaeli kei Elisapani o Mosese, o rau na luvena tagane o Usieli,+ na nona tata lailai o Eroni, qai kaya vei rau: “Drau lako mai, laveti rau na tacimu mai na mata ni vanua tabu ina dua na vanua ena taudaku ni keba.”
5 Erau mani gole yani qai laveti rau ena nodrau isulu balavu ina dua na vanua ena taudaku ni keba me vaka ga e tukuna vei rau o Mosese.
6 E kaya sara o Mosese vei Eroni kei rau na luvena tagane tale e rua, o Eliesa kei Icama: “Me kua ni sakuca na drauniulumudou se dresulaka na nomudou isulu,+ mo dou kua kina ni mate, me kua tale ga ni cudruvi ira kina na isoqosoqo taucoko na Kalou. O ira na tacimuni ena mataqali taucoko e Isireli, era na tagicaki ira sa vakamatea o Jiova ena bukawaqa.
7 Dou kua ni lako tani mai na icurucuru ni valelaca ni veitavaki, de dou na mate, ni sa lumuti kemudou+ o Jiova ena waiwai ni veilumuti.” Eratou cakava sara ga me vaka na vosa i Mosese.
8 E qai kaya vei Eroni o Jiova:
9 “Kua ni gunu waini se so tale na alakaolo, o iko kei rau na luvemu tagane, ni dou curu ina valelaca ni veitavaki,+ mo dou kua kina ni mate. Qo na lawa tudei ena nomudou itabatamata kece.
10 Qo me vakaduiduitaka na ka e tabu kei na ka e sega ni tabu, na ka e dukadukali kei na ka e savasava,+
11 qai vakavulici ira na Isireli ena ivakaro kece e tukuna vei ira o Jiova ena gusu i Mosese.”+
12 E qai kaya o Mosese vei Eroni, vei rau tale ga o Eliesa kei Icama, na luvena tagane rau se vo tiko: “Kauta na isoro kakana e vo mai na isoro e cabori vei Jiova ena bukawaqa, qai kania vaka na madrai sega ni vakaleveni volekata na icabocabonisoro,+ ni ka tabu sara.+
13 Dou kania ena dua na vanua tabu,+ ni qori na nomu iwasewase kei na nodrau iwasewase na luvemu tagane mai na isoro e cabori vei Jiova ena bukawaqa, ni qo na ka au vakaroti kina.
14 Dou na kania tale ga na sarisari ni isoro yalovaki kei na yava ni ivotavota tabu+ ena dua na vanua savasava, o iko kei rau na luvemu tagane, kei ira na luvemu yalewa,+ ni sa soli qo me nomu iwasewase, me nodrau iwasewase tale ga na luvemu tagane, mai na nodra isoro ni veiyaloni na Isireli.
15 Era na kauta mai na yava ni ivotavota tabu kei na sarisari ni isoro yalovaki kei na uro e cabori ena bukawaqa me yalovaki kina na isoro yalovaki ena mata i Jiova, ena qai nomu iwasewase tudei kei ira na luvemu tagane,+ me vaka e vakarota o Jiova.”
16 E qai vaqara matua o Mosese na me ni isoro ni ivalavala ca,+ e qai kila ni sa vakamai. E cudruvi rau sara ga na luvei Eroni tagane erau se vo, o Eliesa kei Icama, e kaya:
17 “Na cava drau sega ni kania kina na isoro ni ivalavala ca ena vanua tabu,+ ni qori na ka tabu sara, e solia o koya vei kemudrau mo drau saumitaro kina ena nodra cala na isoqosoqo, me sorovaki ira kina ena mata i Jiova?
18 Raica! Na kena dra e se sega ni curutaki ena loma ni vanua tabu.+ Dodonu mo dou kania sara ga ena vanua tabu, me vaka ga e vakaroti vei au.”
19 E qai kaya vei Mosese o Eroni: “Raica! Era sa cabora na nodra isoro ni ivalavala ca kei na nodra isoro kama nikua ena mata i Jiova,+ ia se yacovi au ga na veika qo. Keu kania na isoro ni ivalavala ca nikua, vakacava ena taleitaka qori o Jiova?”
20 Ni rogoca qori o Mosese, e lomavakacegu sara ga.
