Vunau ni Soro 6:1-30
6 E kaya tale vei Mosese o Jiova:
2 “Ke valavala ca e dua ni sega ni yalodina vei Jiova,+ ni vakaisina na nona itokani me baleta na ka e tataunaki vua,+ se na ka e soli vua me maroroya, se butakoca se dabuya na nona itokani,
3 se kunea e dua na iyaya e yali tu qai sega ni tukutuku vakadodonu, ke bubului lasu ni sega ni valavala ca+ ena dua na ka qori, qo na ka me cakava:
4 Ke sa valavala ca qai cala, me vakasuka na ka e butakoca, na ka e kovea, na ka e taura ena veidabui, na ka e tataunaki vua, se na ka e yali qai kunea o koya,
5 se mani cava tale e bubului lasu kina, me sauma kece na ka qori,+ me qai vakuria kina e dua na ikalima ni kena isau. Me solia vua na kena itaukei ena siga e vakadinadinataki kina ni cala.
6 Me kauta vua na bete me nona isoro ni cakacala vei Jiova e dua na tamanisipi vinaka mai na qelenimanumanu, me vaka na isau e lavaki, me isoro ni cakacala.+
7 Ena sorovaki koya na bete ena mata i Jiova, ena qai vosoti o koya ena cala e cakava.”+
8 E vosa tale vei Mosese o Jiova, e tukuna:
9 “Vakaroti Eroni kei ratou na luvena tagane qai kaya, ‘Qo na lawa ni isoro kama:+ Me vakamai na isoro kama ena kena icabocabo ena bogi taucoko me yacova na mataka, me caudre tiko ga na buka ena icabocabonisoro.
10 Me na dara na bete na nona isulu lineni ni veiqaravi,+ kei na nona tarausese lekaleka+ lineni me ubia na yagona. Ena qai kauta laivi na dravusa*+ ni isoro kama e vakamai ena icabocabonisoro, qai biuta ena yasa ni icabocabonisoro.
11 Ena qai luvata o koya na nona isulu+ qai dara e dua tale na isulu, me kauta tale ga na dravusa ina dua na vanua savasava ena taudaku ni keba.+
12 Me caudre tiko ga na buka ena icabocabonisoro. Me kua sara ni boko. Me vakama kina na kau+ na bete ena veimataka, e tuvana tale ga e delana na isoro kama, ena qai cakava me kubou e delana na uro ni isoro ni veiyaloni.+
13 Me caudre tiko ga na buka ena icabocabonisoro. Me kua sara ni boko.
14 “‘Ia qo na lawa ni isoro kakana:+ Kemuni na luvei Eroni tagane, ni cabora qori vei Jiova ena mata ni icabocabonisoro.
15 E dua vei ira ena taura e dua na iluku falawa vinaka sara mai na isoro kakana, eso na kena waiwai, kei na drega boivinaka kece ena isoro kakana, me qai cakava me kubou ena icabocabonisoro me talei* na kena iboi, me isoro ni ivakananumi* vei Jiova.+
16 Na ka e vo mai kina+ ena kania o Eroni kei ratou na luvena tagane. Ena laukana me vaka na madrai sega ni vakaleveni ena dua na vanua tabu. Mera kania ena rara ni valelaca ni veitavaki.+
17 Me kua ni vavi kei na dua na ka e vakaleveni.+ Au sa solia qori me kedra ivotavota mai na ka e cabori vei au ena bukawaqa.+ Qo e dua na ka tabu sara,+ me vaka ga na isoro ni ivalavala ca kei na isoro ni cakacala.
18 Era na kania qori+ na tagane kece era kawa i Eroni. Qo na kedra iwasewase tudei ena nomuni itabatamata kece mai na ka e cabori vei Jiova ena bukawaqa.+ Na ka kece ga e tarai ira* ena okati me ka tabu.’”
19 E kaya tale vei Mosese o Jiova:
20 “Qo na isoro ena cabora vei Jiova o Eroni kei ratou na luvena ena siga e lumuti kina:+ me dau isoro kakana+ e dua na ikatini na efa*+ falawa vinaka sara, me veimama ena mataka, me veimama ena yakavi.
21 Ena vakawaiwai qai tavu ena itavutavu.+ Mo kauta mai ni veiwaki vinaka tu kei na waiwai, qai cabora na tikina lalai me vaka na ka e vavi mai na isoro kakana, me talei* vei Jiova na kena iboi.
22 Ena cakava qo na bete e lumuti me kena isosomi mai na kedra maliwa na luvena tagane.+ Qo na ivakaro tudei: Me cabori taucoko me kubou vei Jiova.
23 Na isoro kakana kece ni bete me cabori taucoko. Me kua ni laukana.”
24 E vosa tale vei Mosese o Jiova qai kaya:
25 “Tukuna vei Eroni kei ratou na luvena tagane, ‘Qo na lawa ni isoro ni ivalavala ca:+ Ena vanua vata ga e vakamatei kina na isoro kama,+ me vakamatei tale ga kina na isoro ni ivalavala ca ena mata i Jiova. Qo e ka tabu sara.
26 Na bete e cabora ena vuku ni ivalavala ca, me na kania.+ Ena laukana ena dua na vanua tabu, ena rara ni valelaca ni veitavaki.+
27 “‘Sa na ka tabu na ka kece ga e tara na lewena, ia ke mani dua e kureitaka eso na kena dra ena nona isulu, mo savata na ka e tasika kina na dra ena dua na vanua tabu.
28 Na iyaya qele e saqa kina me vorolaki. Ke saqa ena dua na iyaya kopa, me masiraki na iyaya qai sava ena wai.
29 “‘Era na kania na tagane kece era bete.+ Qo e ka tabu sara.+
30 Ia me kua ni laukana e dua na isoro ni ivalavala ca, ke kau eso na kena dra ena loma ni valelaca ni veitavaki me sorovaki kina na cala ena vanua tabu.+ Me vakamai ena bukawaqa.
iVakamacala e ra
^ Se “na dravusa urouro,” oya na dravusa e veiwaki kei na uro ni isoro.
^ Se “me veivakalomavinakataki, malumu.” Ipe., “veivakacegui.”
^ Se “me dua na kena iwase me ivakananumi (mata).”
^ Se “na isoro.”
^ Se “me veivakalomavinakataki, malumu.” Ipe., “veivakacegui.”
