Na Rai ni iVolatabu

Sa Lewai Oti Tu Beka na Nomu Bula?

Ena dua na mataka ni rau vodo lori tiko e rua na turaga me rau gole i cakacaka, rau nanuma me rau muria na gaunisala lekaleka ena vanua a dau tiko kina e liu e dua vei rau. Ena nodrau ilakolako rau raica ni kama tiko e dua na vale, ra qai babasika mai na katubaleka na yameyame. Rau kele sara, rau mani vakayagataka na ikabakaba e tiko ena loma ni nodrau lori me rau vakabula kina e dua na tina kei na lima na luvena. “De sa lewai oti tu,” e vakamacalataka e dua na niusiveva me baleta na ka a yaco oya.

E LEVU era nanuma ni sa lewa oti tu e dua na igu e kaukaua cake na kena yaco vei ira na ka vinaka se na ka ca. Sega ni dua na ka era na cakava ena veisautaka rawa. Me kena ivakaraitaki, ena ika16 ni senitiuri, o John Calvin e dua a vakavuna na tawase ni lotu e vola: “Keitou vakamacalataka na lewai oti tu mai na bula me nona inaki tawamudu na Kalou, ena nona lewa na ka me cakava vua na tamata yadua. Ni a sega ni buli ira kece mera tautauvata, ia e sa lewa oti tu ga me so era bula tawamudu kei na so mera vakararawataki tawamudu.”

E kila tu beka vakailiu na Kalou na veika eda na cakava kei na keda itinitini? Na cava mada e kaya na iVolatabu?

E Ka Vakayalomatua Beka me Vakabauti?

Na vuna era vakabauta kina e so ni sa lewai oti tu na noda bula nira nanuma ni Kalou e kila na ka kece, na ka sara mada ga e se bera ni yaco. E kila na ka kece ena cakava na tamata yadua me baleta na nona bula, kei na nona kila oti tale tu ga na gauna kei na ivalavala ena mate kina. O koya gona, ena nodra vakasama, ni gauna me na vakatulewa yadua kina na tamata, ena salavata ga na nona digidigi kei na ka e sa raica se sa lewa oti tu na Kalou, ke sega, e vakaraitaka oqo  ni Kalou e sega ni kila na ka kece. E donu beka vei iko na vakasama oqo? Dikeva mada vakayalomatua na veika ena yaco dina.

Ke sa vakatulewataka oti tu na igu kaukaua na nomu veigauna e se bera mai, ena tawayaga na nomu tovolea mo qaravi iko vinaka. Nomu digia mo vakatavako se kua ena sega ni cakayaco ina nomu bula se vei ratou na luvemu. Nomu vakabeleti ni o vodo motoka ena sega ni cakayaco ena nomu bula. Ia, oqo e sega ni ka vakayalomatua. Mai na iwiliwili e tauri rawa, e kunei ni lailai sara na vakacalaka e yaco vei ira na tamata era dau qaqarauni. Ena yasana adua, na sakasaka e dau tini ina leqa levu sara.

Dikeva tale mada e dua na vakasama. Ke sa digia na Kalou me kila vakailiu na veika kece, e kena ibalebale ni se bera mada ga ni buli Atama kei Ivi sa na kila rawa tu o koya ni rau na talaidredre vua. Ia ni tukuna na Kalou vei Atama me kua ni kania “na kau sa kilai kina na ka vinaka kei na ka ca” ni na mate kina, e sa kila tu beka vakailiu na Kalou ni na kania o Atama? (Vakatekivu 2:16, 17) Nona vakarota na Kalou vei rau na imatai ni veiwatini: “Drau vakaluveni, ka tubu me lewe vuqa, ka vakatawai vuravura, ka vakamalumalumutaka; ka lewa na ika ni waitui, kei na manumanu vuka, kei na ka bula kecega sa qasi voli e dela i vuravura,” sa kila tiko beka o koya ni rau na vakayalia na bula totoka ena parataisi? Sega.​—Vakatekivu 1:28.

Nida vakasamataka vinaka na ile oqo, na kena tukuni ni kila tu vakailiu na Kalou na vakatulewa kece, e vakaibalebaletaka ni vakavuna na ka kece era yaco tiko​—wili kina na ivalu, veika tawadodonu kei na rarawa. Ena rawa beka oya? E laurai na kena isau matata ena veika e tukuna na Kalou me baleti koya.

“Mo ni Digitaka”

Na iVolatabu e tukuna “ni sa loloma na Kalou” qai “vinakata na ka dodonu.” Dau uqeti ira na nona tamata: “Cata na ka ca, ka vinakata na ka vinaka.” (1 Joni 4:8; Same 37:28; Emosi 5:15) Vuqa na gauna e dau vakauqeti ira na nona dauveiqaravi yalodina mera digitaka na sala dodonu. Kena ivakaraitaki, a veiyalayalati kei Isireli makawa o Jiova ena nona vakayagataki Mosese, a qai kaya vei ira: “Au sa cavuti lomalagi kei vuravura edaidai me kila, ni’u sa tauca e matamuni na bula kei na mate, na veivakalougatataki kei na veicudruvi: ia mo ni digitaka mada na bula, mo ni bula kina, koi kemuni kei na nomuni kawa.” (Vakarua 30:19) E sa lewa oti tu beka na Kalou na nodra digidigi yadua? Sega ni vaka kina.

O Josua, a liutaki ira na tamata ni Kalou ena gauna makawa, a uqeti ira na nona kaivata: “Mo ni digitaki koya edaidai kemuni na qarava; . . . koi au kei ira na noqu lewe-ni-vale, keitou na qaravi Jiova.” (Josua 24:15) Na parofita ni Kalou o Jeremaia e uqeta tale ga: “Vakarorogo mada ki na vosa i Jiova, ka’u sa tukuna vei kemuni: ko ni na qai vinaka kina, ia ena bula kina na yalomuni.” (Jeremaia 38:20) Ena rawa beka vua na Kalou yalododonu qai dauloloma me uqeti ira na tamata mera caka dodonu nira nuitaka mera vakalougatataki, ke sa kila vinaka tu o koya nira na sega ni rawata? Sega. E veivakaisini na veiuqeti vaka oqo.

O koya gona, ni yaco na ka vinaka se ka ca ena nomu bula, e sega ni kena ibalebale ni sa lewai oti tu mai. Vuqa na gauna, e yaco na “veika tawanamaki” baleta wale ga na nodra vakatulewa tale e so​—se mani vinaka se ca. (Dauvunau 9:11, NW) E sega ni sa lewai oti tu na nomu bula, na nomu veigauna sa bera mai ena vakatau ena nomu vakatulewa.

CAVA O NANUMA?

◼ E sa lewa oti tu beka na Kalou na nodrau na valavala ca o Atama kei Ivi?​—Vakatekivu 1:28; 2:16, 17.

◼ Na itovo cava soti ni Kalou e vakacala na kena sa lewai oti tu na noda bula?​—Same 37:28; 1 Joni 4:8.

◼ Cava na nomu itavi?​—Josua 24:15.

[Tikina bibi ena tabana e 30]

Mai na iwiliwili e tauri rawa, e kunei ni lailai sara na vakacalaka e yaco vei ira na tamata era dau qaqarauni