Vukei Ira na iTabagone

E BIBI mera rogoci na itabagone nira tukuna na lomadra ena ka e vauca nodra isausau, veika era nuitaka, kei na nodra leqa. Bibi tale ga mera vakaitokani vinaka. Nira tubu cake, me matata vei ira ni dodonu mera kilai tani. Nira vukei luvedra na itubutubu ena veika bibi oqo, era sa taqomaki luvedra tiko mai na itokani ca, okati kina na itokani e dau rawarawa ga na kena bucini ena Internet.

◼ Bibi mera tukuna na lomadra. E rawa ni nanumi nira sega ni dau via veivosaki na itabagone, era galugalu se vunivuni. Ia, na kena dina, era dau vinakata mera tukuna na lomadra vei kemuni na itubutubu ena veika lelevu kei na veika lalai era sotava. O keda ga na itubutubu meda tarogi keda, Eda na solia na noda gauna meda rogoci ira?​—Jemesa 1:19.

Kua ni vakalaiva na osooso ni bula me vakaruguta na gauna talei e dodonu mo veivosaki kina kei na luvemu. Ke o nanuma ni o sa rui osooso, ena vinaka mo vakasamataka vakabibi na ivakasala yaga vakaivolatabu oqo: “Dau digitaka na veika e uasivi sara.” (Filipai 1:10, VV) E sega ni dua tale na ka e uasivita na nodratou bula na luvemu.

Kua ni totolo sara nomu nanuma nira na lai kere ivakasala ga na itabagone vei ira nodra icaba, sega ni nodra itubutubu. Ena dua na vakatataro, e sivia ni 17,000 na gonevuli era yabaki 12 ina 18 e tukuni mera tuvana veitaravi mai na 0 ina 5 se o cei e cakayaco vakalevu ena nodra bula​—na nodra itubutubu, itokani, tamata rogo, tabana ni vakau itukutuku, se o ira na qasenivuli. Na 0 e dusi ira na sega sara ga ni cakayaco ena nodra bula, kei na 5 e vakaibalebaletaki ira na cakayaco vakalevu sara vei ira. Voleka ni veimama era vola na 5 vei ira nodra itubutubu me dusia ni o ira oqo era cakayaco sara ga vakalevu ena nodra bula.

E matata vakasigalevu, ni rawa vei kemuni na itubutubu mo ni vukei ira na luvemuni ena itovo mera muria kei na nodra isausau. “Ena sega beka ni cakayaco ena nodra bula na ka kece o tukuna,” e kaya e dua na itubutubu. “Ia ke o sega ni rogoci ira nira tukuna na lomadra, sa na qai ca sara vakalevu.”

◼ Bibi mera vakaitokani. “Era sega sara tu ga ni kila na itubutubu na itokani era sa bucina tiko na luvedra ena Internet, se ra sega ga ni via kila,” e kaya e dua na goneyalewa yabaki 15. Ena gauna vou oqo, e bibi mera kauaitaka na itubutubu na nodra itokani na luvedra. O kila beka se o cei na itokani i luvemu, o ira era sota ena matana votu se o ira era veitaratara ena Internet? E kaya na  iVolatabu: “Sa dau vakarusa na i vakarau vinaka ko ira na i tokani ca.” (1 Korinica 15:33, VV) Io, e tiko na vuna vinaka mo qarauni ira kina na itokani i luvemu.

Na nomu kauai e sega wale ga ni kena ibalebale mo qarauni ira na itabagone mai na itokani ca. Bibi tale ga mo raica me tiko nodra itokani vinaka. E kaya kina na iVolatabu: “Ena vuku mai ko koya sa malele vata kei ira na vuku.” (Vosa Vakaibalebale 13:20) O koya gona, e bibi mo vukei ira na luvemu mera qara na itokani vinaka​—okati e ke o ira na itabagone era ivakaraitaki vinaka ena nodra nanumi koya a buli ira.​—Dauvunau 12:1.

Na Kalou o Jiova e dau qarauna na tamata e digia me nona itokani, meda tovolea gona meda vakatotomuri koya. (Same 15:1-5; Efeso 5:1) Io, e dua na ka bibi o rawa ni vakavulica vei luvemu—ena nomu vosa kei na nomu ivakaraitaki​—oya me digitaka vinaka na nona itokani.​—2 Cesalonaika 3:6, 7.

◼ Bibi mera kilai tani. Dua na tiki bibi ni nodra tubu cake na itabagone oya na nodra kilai ira vinaka​—mera kila na veika e vakaduiduitaki ira mai na vo ni gone. E kaya e dua na vosa vakaibalebale ena iVolatabu: “Na gone sa kilai e na nonai valavala.” (Vosa Vakaibalebale 20:11) Dua na nomuni itavi na itubutubu oya mo ni tugana e lomadra na luvemuni na ivakavuvuli dodonu.​—Vakarua 6:6, 7.

Kena ivakatautauvata: O rau na itubutubu erau na digia na isulu me dara e veisiga na luvedrau gone, ena nodrau nuitaka ni na vulica kina me dau vakaisulu vinaka. Ia, e rawa beka ni dua na uabula yabaki 30 erau se vakaisulutaki koya tiko ga na nona itubutubu? Ena lasa dina! E vakayagataka tale ga na iVolatabu na ivakatautauvata ni vakaisulu ni uqeti keda: “Dou sa vakasuluma oqori sa vou”​—oya na itovo vakarisito. (Kolosa 3:10) Ena nomu vakadodonutaki ira vakayalololoma na luvemu ena “[i]vakavuvuli” i Jiova, o sa vukei ira tiko mera sulumaka na isulu vou. (Efeso 6:4) Nira tubu cake, ra qai tekivu lewai ira ga, era na rairai sulumaka tale ga na isulu “vou,” era na raica ni vinaka dina qai talei.​—Vakarua 30:19, 20.

Tarogi iko: ‘Era raica sara mada vakacava na luvequ na ivakavuvuli vakaivolatabu? Au na vukei ira vakacava mera “yalomatua”?’ (Taito 2:12) Mo kua ni susuga e dua na gone me na talairawarawa ga ni o tiko. E so na gone era dau talairawarawa ena ka kece e tukuni vei ira, ra sega ni saqata, veiba, se be. Ia na gone e vakamuria kece tu ga na ka o vinakata me cakava ena gauna oqo ena rawa ni yaco e muri me vakamuria na ka kece e vinakata o vuravura me cakava. O koya gona, vakavulici ira na luvemu mera dau “vakasama vakatitobu.” (Roma 12:1, NW) Vukei ira mera raica na vuna e vinaka kina na ivakavuvuli ni iVolatabu kei na kena yaga vei keda kece.​—Aisea 48:17, 18.

Io, e ka ni sasaga na nomu vukei ira na itabagone. Ia, o na tauca na kena yaga! Kevaka era muria na luvemu na ivakavuvuli dodonu o vakavulica, o rawa ni kaya mai vu ni lomamu ni o ira na gone era “sa nonai solisoli na Kalou” o Jiova.​—Same 127:3.

[iYaloyalo ena tabana e 9]

Tokoni ira na luvemu mera digia vinaka nodra itokani lotu Vakarisito