O na Rawa ni Biuta!

QO na gauna ‘mo yaloqaqa qai cakava sara.’ (1 Veigauna 28:10) Cava eso na ka o rawa ni cakava mo biuta kina na vakatavako?

Digia na siga. E kaya na Tabana ni Bula kei na Qaravi ni Lewenivanua mai Merika, ke sa lomamu dina mo biuta na vakatavako, o na rawa ni cakava qori ni oti e rua na macawa. Qori ena uqeti iko mo sasaga tiko ga. Mo makataka rawa na siga mo biuta kina na vakatavako ena nomu ivolanivula, tukuna vei ira nomu itokani, qai dei tiko ga ena siga qori ke veisau mada ga na kemu ituvaki.

Vola eso na ka mo nanuma. Cakava e dua na kad, qai vola kina eso na ka e rawa ni vukei iko mo biuta na vakatavako:

● Na vuna o via biuta kina na tavako

● Nodra naba ni talevoni eso o na qirita ke o temaki

● Eso na ivakasala me vaka na Kalatia 5:22, 23—ena rawa ni vukei iko mo sasaga tiko ga

Kauta tiko nomu kad ena vanua ga o lako kina, qai wilika vakawasoma e veisiga. Ke o sa biuta mada ga na vakatavako, railesuva tale nomu kad ena gauna o temaki kina.

Mo qaqarauni. Ni bera na siga mo biuta kina na vakatavako, tovolea mo muduka na ivakarau kece e vakavuna tiko nomu vakatavako. Kena ivakaraitaki, ke o dau kana tavako ena gauna ga o yadra kina, tovolea mo waraka me oti mada e dua na aua se sivia. Se, ke o dau vakatavako ena gauna ni kana se ni oti na kana, mo muduka qori. Kua ni lako ena vanua e dau caka kina na vakatavako. Ni o tiko taudua, vakatovotovotaka nomu kaya vakadomoilevu: “Sega, vinaka. Au sa sega ni kana tavako.” Na ka kece qori ena vakarautaki iko ena siga mo na biuta kina na tavako. Qori ena vakananuma vei iko ni o sa na vakarau biuta na vakatavako.

Tu vakarau. Ni sa voleka mai na siga mo biuta kina na tavako, vakarautaka tu eso na kemu kakana, me vaka na carrot, drega, pinati kei na so tale. Tukuna vei ira nomu itokani se wekamu na tikinisiga qori, kei na sala mera tokoni iko kina. Ni bera na siga qori biuta tani kece na ashtray, masese, se na tavako era tu e vale, ena motoka, nomu taga ni sulu se vanua ni cakacaka. Ke tu vei iko na tavako ena rawarawa sara nomu temaki! Mo kerea tiko ga na veivuke ni Kalou, vakabibi ni sa voleka na siga mo biuta kina na tavako.—Luke 11:13.

Dua na iwiliwili levu era sa biuta na tavako. O rawa tale ga ni cakava qori. O na bulabula vinaka, o na sega tale ga ni bobula tu ena tavako.

[iYaloyalo ena tabana e 9]

Kauta tiko nomu kad ena vanua ga o lako kina, qai wilika vakawasoma e veisiga