“Ni qarauna na nomuni bula de laurai kina ni oni sa lomana tiko na ilavo . . . Ni a kaya o koya [Kalou]: ‘Au na sega sara ni biuti iko se vakanadakui iko.’”—Iperiu 13:5.

VAKARAITAKA NA KALOU NONA KAUAI

Ni sotava na ituvaki dredre e dua na dauveiqaravi ni Kalou, e levu na sala ena vakaraitaka kina o Jiova na nona kauaitaki koya. Dua oya na nodra veitokoni vakayalololoma na vo ni lotu vaKarisito. * E kaya na Jemesa 1:27: “E va qo na lotu e savasava qai sega ni dukadukali ena mata ni noda Kalou na Tamada: meda qaravi ira na luveniyali kei ira na yada era rarawa tu.”

O ira na lotu vaKarisito taumada era dauveivukei. Kena ivakaraitaki, ena gauna e tukuni kina ni na tarai Jutia e dua na dausiga, era gumatua na lotu vaKarisito mai na siti o Anitioki e Siria “mera dodoliga vei ira na veitacini era tiko mai Jutia.” (Cakacaka 11:28-30) Era mani taura kina na lotu vaKarisito era vakaleqai mai Jutia na veika era gadreva dina. Na cau va qori e vakaraitaka sara ga na loloma vaKarisito.—1 Joni 3:18.

“Koi au ko Jiova na nomu Kalou, ka’u sa vakavulici iko mo vinaka kina.”—Aisea 48:17, 18.

E VUKEI KEDA NA KALOU MEDA QARAVI KEDA GA

Era vakadinadinataka e le milioni ni yaga qai vinaka duadua na ivakasala vuku e tu ena iVolatabu. E kaya na Vosa Vakaibalebale 2:6, 7: “Ni sa solia na vuku ko Jiova; Sa lako mai na gusuna na kila ka kei na yalomatua: Sa binia na vuku dina me nodra na yalododonu.” Nira vakasaqara na tamata na vuku qori ra qai vakayagataka, era na vakila na kena yaga.

Kena ivakaraitaki, era muduka eso na ivalavala e vakayagataki vakalevu kina na ilavo, me vaka na vakayagataki ni wainimategaga kei na gunu sivia. (2 Korinica 7:1) Sa yaco tale ga mera tamata daudina, dauveinanumi qai nuitaki, qori e vakarawarawataka me dua na nodra cakacaka, se mera tamata cakacaka nuitaki. E tukuna na Efeso 4:28: “Me muduka nona daubutako tiko, me cakacaka ga vakaukaua, . . . me solia kina e dua na ka vei koya e leqa tu.”

“E vakadinadinataki na vuku vakalou ena ka e yaco.”

—Maciu 11:19, The New English Bible.

IVAKARAITAKI ERA YACO DINA

O Wilson, e dau cakacaka vagauna mai Ghana, e sa voleka ni cegu ena nona cakacaka. Ena iotioti ni siga ni nona cakacaka, a savata tiko na motoka nei manidia, qai raica eso na ilavo ena vanua e dau biu kina na iyaya ena muaimuri ni motoka. A tukuna vei Wilson na nona supavaisa me vunia na ilavo. Ia ni dua na iVakadinadina i Jiova, a sega ni via butakoca o Wilson na ilavo qai vakasuka vei manidia. A sega kina ni vakacegui mai na nona cakacaka mani cakacaka tudei sara, ni toso na gauna a soli vua e dua na itutu ena kabani.

E Urope, a vakacegui mai na nona cakacaka o Géraldine baleta ni dau besetaki ira na iVakadinadina i Jiova o nona boso. Ia a qai tukuna na tinai nona boso ni cala na ka e cakava. Qai tomana: “Ke o vinakata e dua e nuitaki qai dau raica vakabibi na nona cakacaka, e sega ni dua tale na tamata cakacaka e vakataki ira na iVakadinadina i Jiova.” A vakayacora eso na vakadidike na luvena yalewa me baleti ira na iVakadinadina, qai vakacakacakataki tale o Géraldine.

E levu na ituvaki dredre a sotava o Sarah, e dua na itubutubu le dua mai Sauca Aferika, ia e vakadinadinataka na loloma vaKarisito ena nodra veivuke na lewe ni nona ivavakoso ena kakana kei na sala ni veitosoyaki. Ni toso na gauna eratou tukuna na luvena, “E levu na neitou itubutubu ena ivavakoso.”

E levu tale na tamata era sotava na veika e tukuni ena ulutaga qo. E dina kina na ka e kaya na Vosa Vakaibalebale 1:33: “Ia ko koya sa vakarorogo vei au [Jiova] ena tiko vinaka.” E sega vakadua ni lasu na vosa qori!