Ena 2011 na uneune a kurea na vanua o Lorca ena ceva kei Sipeni era mavoa kina e vica vata qai mate e le ciwa. Era vakabauta e dua na ilawalawa saenitisi ni rawa ni vu qori ena ka era cakava na tamata. Era dikeva tale ga ni vanua e yaco kina na uneune e donuya vinaka na vanua e pamutaki vakalevu mai kina na wai me vakayagataki ena teitei.

Era vakayagataka e vanua tani e $102 na bilioni na ilavo ni Merika na saravanua mai Jaina ena 2012. E kaya kina na isoqosoqo ni saravanua na UN World Tourism Organization, qo na imatai ni gauna me levu duadua na ilavo era vakayagataka na saravanua mai Jaina ni vakatauvatani kei Jamani, wili kina o Merika. O ira na saravanua mai Merika kei Jamani era vakayagataka e vanua tani e $167 na bilioni na ilavo ni Merika.

E tabaki ena dua na ivola vakavuniwai na British Medical Journal na vakadidike a caka mai Japani, era vakadikevi kina e voleka ni le 68,000 na lewenivanua ena loma ni 23 na yabaki. Era raica na dauvakadidike ni o ira na yalewa era sucu ena 1920 ina 1945 era tekivu vakatavako ni bera nira yabaki 20 e lekaleka na nodra bula ena tini na yabaki ni vakatauvatani kei ira era sega ni vakatavako; ia o ira na tagane, e lekaleka mai na walu na yabaki na nodra bula.

E vakatabuya na matanitu na vakayagataki, vakau kei na buli ni taga palasitika ni ririkotaki kina nodra bula na manumanu kei na ika ni waitui. Mani vakabibitaka na vakayagataki ni iyaya e vuca rawarawa.

Ena dua na yabaki era vakalusia na kabani ni inisua e rauta ni $50 na bilioni na ilavo ni Merika ena vakacaca ni leqa tubukoso. Qai kuria qori na kena sa tubu cake tiko ga na isau ni iyaya. Me tekivu mai na veiyabaki ni 1980, sa vakaruataki na levu ni ilavo e vakayagataka.