Ni bera na vakamau e rairai tautauvata na ka drau taleitaka vakaveiwatini. Ia qo ni o sa sega ni marautaka nomu bula vakawati, sa vaka mo drau veiyawaki vakaveiwatini, qai nanuma ni sa vaka o vesu tu ena nomu vakawati.

O rawa ni vakavinakataka na veimaliwai qori. Kena imatai, vakasamataka mada na vuna o sega ni marau kina.

Osooso. Na itavi me qaravi e veisiga, na susu gone, wili kina na nomu veimaliwai kei rau na vugomu e rawa ni vakaleqa na bula vakawati. Kuria qori na leqa e sega ni namaki​—de dua na leqa vakailavo se nona qaravi e dua na lewenivuvale e tauvimate bibi.

Basika na Duidui. Ni rua erau se veivosaki tiko e rau dau sega ni kauaitaka na veika erau duidui kina. Ia ni rau sa vakamau, rau sa qai kidava ni rau duidui ena levu na ka, me vaka na ivakarau ni nodrau veivosaki, vakayagataki ilavo kei na wali ni leqa. Na duidui a sega ni kauaitaki ena gauna ni veibuku sa vaka me vakatubu rarawa ni rau sa vakamau.

Dredre me talaucaka na lomana. Ni toso na gauna, na vosa mosimosi se na ivalavala kaukaua kei na leqa e sega ni wali ena vakavuna me sega ni via talaucaka na lomana o kemu isa. E ca sara ni sa lai qara e dua e sega ni watina me talaucaka vua na lomana.

Sega ni yaco na ka o namaka. Eso ena gauna era vakamau kina era nanuma nira sa kunea na kedra i sa vinaka duadua ni vakawati. Na ka e nanumi qori e dau vakavu rarawa e muri. Ni basika na leqa sa sega ni kilai na i sa vinaka ni vakawati ni rau dui nanuma na veiwatini ni cala na nodrau vakatulewa.

Kauaitaka na itovo talei i watimu. Tovolea qo: Vola e tolu na itovo talei nei watimu, rairai ena daku ni dua na itaba ni nomudrau vakamau se nomu mobail. Dau raica tale qori mo nanuma kina na vuna o vakamautaki watimu kina. Ni o kauaitaka na veika e vinaka kina o watimu ena rawa ni wali na veika drau duidui kina, drau na bula veiyaloni tale ga.​—iVakavuvuli vakaivolatabu: Roma 14:19.

Lokuca mo drau cakava vata na ka. Ni bera ni o vakamau, rairai drau dau lokuca mo drau cakava vata eso na ka. E dau marautaki na gauna ni veibuku drau qai dau tuvanaka na ka mo drau cakava. Vakacava mo drau cakava e dua na ka va qori ena gauna qo? Tuvanaka e dua na vanua mo drau gade kina vakaveiwatini. Qo drau na veivolekati kina, drau na kila tale ga na ka mo drau cakava ni basika na leqa e sega ni namaki. ​—iVakavuvuli vakaivolatabu: Vosa Vakaibalebale 5:18.

Talaucaka na lomamu. O rawa ni guilecava e dua na ka e tukuna se cakava o watimu e vakararawataki iko? Ke sega cakava kina e dua na ka, kua ga ni galuvi koya. Ena gauna totolo duadua se siga ga ya mo veivosakitaka vinaka kei watimu na ka e vakararawataki iko.​—iVakavuvuli vakaivolatabu: Efeso 4:26.

Veivosakitaka na ka e vakavuna na rarawa. E macala ni drau sega ni nakita mo drau vakararawataki kemudrau isa. Ia mo vakaraitaka qo ena nomu kere veivosoti dina vei watimu ena dua na ka o cakava e vakararawataki koya. Oti drau veivosakitaka eso sara ga na ka e vakavu rarawa mo drau kua ni cakava. Muria na ivakasala ena iVolatabu: “Moni veilomani, ni veinanumi, ni yalorawarawa moni veivosoti.”​—Efeso 4:32.

Rai donu. E tukuna na iVolatabu ni o ira na vakawati “ena vakararawataki na yagodra.” (1 Korinica 7:28) Ni yaco qori, kua ni nanuma ni sa na sega ni vinaka na nomu bula vakawati. Ia mo drau saga vakaveiwatini me wali na veika drau sega ni duavata kina, mo drau ‘yalorawarawa, drau veivosoti tale ga vakarawarawa.’ ​—Kolosa 3:13.