E laurai ni tubu ena 41 na pasede na iwiliwili ni veisere ena Janueri ina Seviteba 2013 ni vakatauvatani kei na gauna vata qori ena yabaki sa oti mai Beijing na koroturaga kei Jaina. Era vakabauta na kenadau ni vakavuna qori na nodra saga na veiwatini mera kua ni sauma na 20 na pasede ni ivakacavacava se qai lavaki ga qo ena vale e volitaki. Ia ena so na ituvaki, e vakalailaitaki na ivakacavacava vei ira na veiwatini era veisere ra qai volitaka na ikarua ni nodra vale.

Me wali na leqa ni kanavakaca, e vakatututaka kina na Matabose kei Vuravura meda kania na manumanu lalai. Ni bulabula ra qai kania na ka eda sega ni kania o keda, e tukuna kina e dua na ripote ni o ira na manumanu lalai qori era “isosomi vinaka ni lewenimanumanu.” Ia e laurai tale ga ena vakadidike qori ni “sega ni taleitaki ena so na vanua na kena laukana na manumanu lalai.”

Era veilecayaki na vakailesilesi ni valenibula ena ka mera cakava ena yaloka e vakamautaki qai vakacevatataki (frozen embryo), e sega ni macala se ra tu e vei na kena “itaukei.” E ripotetaka e dua na valenibula ni maroroya tu e duanaudolu na yaloka sa vakamautaki oti, o ira na vakadonuya me caka vei ira na veiqaravi qori e sa “yali na kedra o.”

E rua na mataqali vakamau era rawa ni digia na lotu Katolika e Ailadi ena veigauna sa oti, oya na vakamau vakamatanitu se vakalotu. Ia ena 2013, sa caka vakamau tale ga e dua na ilawalawa qai sega ni caka kina e dua na ka vakalotu. E ripotetaka na tabana ni itukutuku na Reuters nira sa taqea dredre tale na ilawalawa qori “na levu ni lewenivanua era vinakata nodra vakamau me vinaka cake mai na vakamau vakamatanitu, ia me kua ni caka kina e dua na ka vakalotu.”