Vakamacalataka mada na nomu isususu.

Rau daulotu na noqu itubutubu, rau daudina, rau gugumatua tale ga. Rau uqeti au meu vuli vinaka, mani vulica kina na veika me baleta na veivoli ena University of New South Wales. Au taleitaka na vakadidike, nanuma sara meu dua na kenadau ena tabana qo.

Cava o vakadidike kina?

Au via kila sara ga na iwalewale ni voli sea. Qo e vakarawarawataka nodra voli sea na daunibisinisi ra volitaka tale ena kabani, ra qai vakayagataka na kena ilavo me cicivaki kina nodra bisinisi. Sega ni koya ga qori, au dau vakadikeva tale ga na veika e vakavuna na tubu kei na lutu ni sea ena kabani.

Dua na kena ivakaraitaki?

Namaki mera dau ripotetaka wasoma na kabani na ka era rawata. Era dau vakayagataka qori o ira na soli ilavo ina kabani mera kila kina na ilavo sa rawati tiko. Ia dau veiveisau na iwalewale e vakayagataki me ripotetaki kina na tubu. Era kaya na dauvakalelewa ni qori sara ga na sala era vunitaka kina na kabani na itukutuku dina vakailavo kei na tubu sa rawati. Era na qai kila ga vakacava na dau soli ilavo ina kabani na itukutuku dina? Tukutuku cava me tiko vei ira na dau dikeva na cicivaki ni bisinisi mera raica kina ni sa cicivaki tiko vakamatau na buturara ni veivoli? Au saga tiko kei ira noqu itokani vakacakacaka me keimami sauma na taro qori.

 Na vakabauta cava o susugi kina?

Au dau tomani rau noqu itubutubu ina lotu Presbyterian, au qai vakawalena ena gauna au sa itabagone kina. Au vakabauta na Dauveibuli, au doka tale ga na iVolatabu, ia au raica ni sega ni walia o lotu na leqa eda sotava tu. Au dau raica na isoqosoqo lotu me vaka tu ga na vanua ni veimaliwai. Niu gole i Urope, au lako sara ina vica vata na valenilotu lelevu, au qai vaqaqa se cava era vutuniyau kina vakalevu, ia e dravudravua tu o vuravura. Qo e vakavuna noqu rarawa, au vakatitiqataka kina na lotu.

Cava e veisautaka nomu rai?

A vuli iVolatabu na watiqu o Jennifer kei ira na iVakadinadina i Jiova, dau tiko tale ga ena nodra soqoni, au mani nanuma meu tomani koya meu kila eso na ka baleti ira. Au raica ni sega sara ga ni dua na ka au kila tu me baleta na iVolatabu. Kidroataki dina qori! Au mani vulica sara na iVolatabu kei ira na iVakadinadina.

Au taleitaka na ivakarau ni nodra vuli. Era taro, ra kumuni ivakadinadina ra qai vakalewa me kilai kina na ka dina—na iwalewale sara ga au dau vakayagataka niu vakadidike tiko! Au papitaiso ena 1999 meu iVakadinadina i Jiova, ni oti ga e vica na yabaki nona papitaiso o Jennifer.

E vaqaqacotaka nomu nuitaka na iVolatabu na nomu kila na veika vakailavo?

Io. Kena ivakaraitaki, na Lawa e solia na Kalou vei ira e Isireli makawa me wali kina na leqa vakailavo, era se saga tiko ga nikua na kenadau ena veika vakailavo mera walia. Tukuni ena Lawa mera dau biuta vakatikitiki na Isireli eso na kakana me baleti ira na dravudravua (tautauvata kei na soli ivakacavacava kei na inisua), soli vei ira na leqa vakailavo na dinau ia me kua ni dua na kena tubu (vakarawarawataka na dinau), qai vakasukai na qele vei ira na kena itaukei dina ni oti e 50 na yabaki (taqomaki nodra dodonu ni taukena na qele). (Vunau ni Soro 19:9, 10; 25:10, 35-37; Vakarua 24:19-21) Na veika qori kei na so tale na veivuke vakailavo era vukei kina ena tolu na sala: Era (1) vukei nira leqa vakailavo, (2) vukei ira na dravudravua tu vakadede, (3) mera kua tale ga ni vakaduiduitaki ena veika vakailavo. Qo kece na ka e dau caka ena 3,000 na yabaki sa oti ni bera sara ni tauyavu na veika vakasaenisi kei na bula vakailavo nikua!

E uqeta tale ga na iVolatabu na itovo kei na ivalavala me taqomaki kina na bula vakailavo. Kena ivakaraitaki, e vakavulica na veika me baleta na daudina, veinuitaki, loloma kei na lomasavu. (Vakarua 15:7-11; 25:15; Same 15) Na leqa vakailavo se qai tarai vuravura tiko ga qo, e vakavuna mera uqeti ira na kenadau ena bisinisi kei na veika vakailavo eso na koronivuli ni vuli bisinisi kei na so na isoqosoqo mera muria e dua ga na ivakatagedegede. Vei au mada ga, na ivakatagedegede savasava ni iVolatabu e uasivia sara na veika vakabisinisi.

Veisautaki iko vakacava nomu vakabauta?

Tukuna o Jennifer niu sa dau yalorawarawa vakalevu. E liu au dau vinakata me kua sara ga ni dua na ka e cala, me yaco ga na lomaqu. Rairai vakavuna meu kenadau ena veika vakailavo! Noqu muria na ivakavuvuli vakaivolatabu au lewai au matau kina. Au marau vakalevu kei na noqu vuvale. Keitou marau tale ga ni wasea na ivakasala vuku ena iVolatabu vei ira eso tale. Yaga sara ga vei au na noqu vulica na iVolatabu.