LEVU era kaya ni totoka, so tale era na rairai kaya ni vakasevaki. E yava lila, e malumu na vutina, ia e yalokanimata lelevu qai widri. Kena balavu e rauta ga ni 12.5 na sedimita, e 114 na karamu na kena bi. Na cava mada qo? Qo na manumanu e vakatokai me tarsier!

Meda dikeva mada qo na tarsier ni Yatu Filipaini. E yago lailai, qai rairai levu cake mai na yagona na matana, daligana, ligana, yavana kei na buina. Dina ni va tu qori na kena ibulibuli, ia nida dikeva vakavinaka sa bau vakatubuqoroqoro dina.

DALIGANA: E rawa ni ce se lobika na daligana, ena veimoiyaka tale ga me rogoca na rorogo lalai sara mada ga. Qo ena vukei koya me dro ni raici ira na kena meca me vakataki ira na vusi lelevu, e dau vakayagataka tale ga na daligana me tobo kena kina. Ni buto na vanua e rogoca rawa na tavasa ni manumanu lalai me vaka na vodre, kadi, burogo, manumanuvuka, kei na boto. Oti ena vuki na uluna me rai na yalokanimatana widri qori ina vanua e tiko kina na kena.

LIGANA: E buli vakamatau na ligana me qumia rawarawa na tolonikau lalai. E malumu vinaka na iqaqaloniligana qai duatani sara, e vukea nona dau qumia na ka me kua ni sisi. Na gauna mada ga e moce tiko kina ena vinakati me qumia matua tiko ga na kau. Na malumu tale ga ni ruku ni buina balavu e vukea me davo toka ga kina vakadua me yacova ni sa yadra.

 MATANA: O koya duadua ga na manumanu e yalokanimata levu tu qai yago lailai. Na yalokanimatana e levu cake mai na nona mona! E sega ni yalokanimata kibo ni dau rai tu ga vakadodonu. Vakacava, e yaga vua na yalokanimatana? Io. E rawa kina ni moica na domona me 180 na dikiri ena vanua cava ga e via rai kina.

YAVANA: Ni yava balavu e 6 na mita na yawa ni vanua e rawa ni rikava, qo e tautauvata ni vasagavulu vakacaca tale na balavu ni yagona! Ni vaqara kakana, e dau rika ena buto me dodoka na ligana qai qumia mai na kena.

Nira vesu ena dredre mera bula nira dau kania ga vakalevu na manumanu qasi lalai era se bula tu, kei na nodra cata me dua e tarai ira. Ia era se qoroya tiko ga vakalevu na lewe ni Yatu Filipaini na manumanu vakatubuqoroqoro qo. Veivakurabuitaki dina na tikiniyago ni manumanu matawidri qo.