QO NA matenikuli [na Scleroderma]. E rauta ni 2.5 na milioni e vuravura e tauvi ira na mate qo, dau tukuni ni “kaukaua na kuliniyagodra.” Dua na kena mataqali e dau tauvi ira na gone, e dau kaukaua kina vakalevu na viciko ni kuliniyago.

E kune vei Elisa na kena mataqali e tauva na kuliniyagona, e tete sara ina nona gacagaca e loma, me vaka nona ivi, uto, yatevuso kei na nona wawa. Ra nanuma na vuniwai ni na lima ga na yabaki na dede ni nona bula ni qaravi vakavuniwai. Ia sa oti qo e 14 na yabaki, se bula tiko ga. Se tiko ga vua na mate qori, e dau saga ga me donu nona rai me baleta na bula. E vakatarogi Elisa na Yadra! me baleta na kena mate kei na nona vosota rawa tiko.

 Gauna cava o kila kina ni o sa tauvimate tiko?

Niu se qai yabaki ciwa, a mavoa na duruduru ni ligaqu, e mosi sara ga vakalevu. E tadola levu na mavoa qori qai sega ni mavo rawa. Laurai gona vei au na matenikuli qo. Ni kani au tiko vakatotolo na kequ mate, mani vaqarai e dua na vuniwai e kila vinaka na qarava na mate qo.

Qai kune e dua?

Dua na vuniwai keitou raica e dau vakadikeva na mate ni isema ni yago. E kaya vei rau noqu itubutubu ni na veivuke vakalevu ke caka vei au na veiqaravi vakavuniwai na chemotherapy e dau vakamatea na sela ni yago, ena sega ni tete totolo na kequ mate, ena dede kina noqu bula me lima tale na yabaki, au na rawa tale ga ni bula vinaka. Na kena leqa ni rawa ni vakamalumalumutaka na sotia ni yagoqu. Ke tauvi au mada ga na matetaka au rawa ni leqa kina.

Vinaka ni sega ni dua na ka va qori e yaco.

Au vakavinavinaka vakalevu niu se bula tiko! Niu voleka ni yabaki 12, dau mosi vakalevu na serequ, kena dede e rauta ni 30 na miniti, rawa ni yacovi au vakarua ena dua na siga. Levu ni kena mosi au dau vutugu sara ga.

Cava e vakavuna?

Ratou kaya na vuniwai ni lailai sara tiko na iwasewase ni noqu dra na hemoglobin, sa oca tale ga na noqu uto ni saga tiko me vakauta na dra ina noqu mona. Oti ga e vica na macawa noqu qaravi vakavuniwai, au sa bula vinaka. Au vakasamataka sara ena gauna oya niu sa wawa cabolo tu ga. Sega tale ni dua na ka meu cakava rawa, vaka sara ga niu sega ni lewa rawa na veika sa yacovi au tiko.

Kilai na kemu mate ena 14 na yabaki sa oti, sa vakacava tiko na nomu bula ena gauna qo?

Au se dau vakila tiko ga na mosi, so tale na mate e tauvi au e vakavuna na scleroderma. Me vaka na bo dra, na leqa ni viciko ena noqu yatevuso, kei na mosi ni saresarequ. Ia au sega ni vakamalumalumu ina kequ mate, se lomalomani au. Tu tale eso na ka meu cakava.

Me vaka na cava?

Au taleitaka na droini, cula isulu kei na caka iyaya talei e daramaki me isasauni. Bibi sara noqu dau veivakavulici ena iVolatabu niu iVakadinadina i Jiova. Keu sega mada ga ni lako rawa ina nodra vale eso, au se rawa tiko ga ni tokoni ira na iVakadinadina era veivakavulici ena iVolatabu ena neitou yasayasa. Eso toka noqu vuli iVolatabu. E vakainaki noqu bula niu vakaitavi ena cakacaka vakaitalatala.

Ni sa va tu mada qori na kemu ituvaki, cava o se cakava tiko ga kina na cakacaka qo?

Au kila ni bibi qai yaga na itukutuku au dau vakasavuya. Au dau marau tale ga niu vakaogai au meu vukei ira eso tale. Au bulabula kina vakayago! Na gauna lekaleka qori, au dau guilecava kina niu tauvimate tiko.

Uqeti iko vakacava na iVolatabu me donu tiko ga nomu rai?

E vakadeitaka ni lekaleka wale noqu rarawa kei na rarawa era vakila tale tu ga eso. E kaya na Vakatakila 21:4 ni nona gauna lokuci na Kalou ena “qusia tale ga na wainimata kece mai na matadra, sa na sega tale na mate, na lolosi, na tagiyaso, kei na mosi.” Noqu dau vakasamataka na tikinivolatabu va qori e vaqaqacotaka noqu vakabauta na yalayala ni Kalou me baleta na veigauna vinaka se bera mai, sega ni baleti ira ga na tauvimate bibi, o keda kece.