NA RAI NI IVOLATABU
iTovo Kaukaua
Laurai vakalevu ena ivolatukutuku ni kawatamata na itovo kaukaua. Ena rawa ni oti na itovo qori?
Cava na rai ni Kalou me baleta na itovo kaukaua?
KA ERA TUKUNA ESO
Ni dua e vakacudrui, ena veiganiti ke sauma lesu ena itovo kaukaua. Qori na ka era kaya e levu wili kina o ira na dau lotu. Milioni era tokona na kena dau vakaraitaki na itovo kaukaua ena iyaloyalo me ka ni veivakamarautaki.
KA E KAYA NA IVOLATABU
Kune volekata na korolevu o Mosul ena vualiku kei Iraki na irusarusa ni koro rogo o Ninive, na koroturaga ni matanitu makawa o Asiria. Ni se vutuniyau sara tu ga na koro qo o “Ninive” e parofisaitaki ena iVolatabu ni na “vakalalai.” (Sefanaia 2:13) E kaya na Kalou: “Au na cakava mo vakalialiai.” Na vuna? Ni “koro dau vakadavedra.” (Neumi 1:1; 3:1, 6) E tukuni ena Same 5:6: “E sevaka o Jiova na tamata voravora.” E yaco dina na vosa ni Kalou me vaka e laurai ena irusarusa kei Ninive.
Na itovo kaukaua a tekivuna na meca levu ni Kalou, e keda meca tale ga—o Setani na Tevoro, e vakatokai koya vinaka o Jisu me “daulaba.” (Joni 8:44) Ni ‘lewa tale tiko ga na vunica na vuravura taucoko,’ e kune na nona itovo ena ivakarau ni nodra rai e levu me baleta na ivalavala kaukaua. Era taleitaka vakalevu na itovo qori, wili kina na tabana ni itukutuku e uqeta na kena saravi. (1 Joni 5:19) Ke da via vakamarautaka na Kalou, meda cata na itovo voravora, da qai taleitaka na ka e taleitaka na Kalou. * O na rawa ni cakava qori?
“O Jiova . . . e cati ira kece era taleitaka na itovo kaukaua.”—Same 11:5.
Rawa nira veisau na dau vakayacora na itovo kaukaua?
KA ERA TUKUNA ESO
E tiki ga ni noda bula na itovo kaukaua, eda na sega ni veisau.
KA E KAYA NA IVOLATABU
Biuta tani na “yalokatakata, na cudrucudru, na ivakarau ca, na vosavakacaca, kei na vosa vakasisila.” E kaya tale ga: “Ni luvata tani na tamata makawa kei na kena ivalavala, ni sulumaka na itovo vou.” (Kolosa 3:8-10) Vakacava, sa sivia tale na ka e kerea tiko qori na Kalou? Sega. Eda rawa ni veisau. * Ena rawa vakacava?
Kena imatai meda vulica tiko ga na kilaka dodonu me baleta na Kalou. (Kolosa 3:10) O koya e yalomalumalumu ni vulica na itovo talei ni Dauveibuli kei na nona ivakatagedegede, ena uqeti me lomana na Kalou me vakamarautaki koya tale ga.—1 Joni 5:3.
Kena ikarua, e baleta na noda digi ira noda ilala. “Kua ni veitokani kei na tamata cudrucudru se veimaliwai vata kei na dua e cudru katakata, de o vulica na nona ivalavala o qai coriti kina.”—Vosa Vakaibalebale 22:24, 25.
Kena ikatolu e baleta tiko noda raica vakayalomatua na ka. Vakasamataka vakabibi na leqa e dau yaco ni taleitaki na itovo kaukaua—qo e dua na malumalumu levu e laurai ga kina nona sega ni lewa matau e dua. Ena yasana adua o ira na bula veiyaloni, e dei na lomadra. E kaya na Vosa Vakaibalebale 16:32: “E vinaka o koya e berabera ni cudru, e ca na tamata qaqa.”
“Saga moni veiyaloni kei ira na tamata kece.”—Iperiu 12:14.
Ena oti na itovo kaukaua?
KA ERA TUKUNA ESO
Ena sega ni mudu na itovo kaukaua.
KA E KAYA NA IVOLATABU
“Malua mada vakalailai, sa na sega vakadua na daucaka ca . . . Ia era na taukena na vuravura na yalomalumalumu, era na kunea na marau vakasakiti ena levu ni vakacegu.” (Same 37:10, 11) Me rawa ni vakabulai ira na yalomalumalumu kei ira na guta na veisaututaki, ena vakayacora o Jiova vei ira na dau taleitaka na itovo kaukaua na ka vata ga e cakava vei ira na lewe i Ninive makawa. Ena sega tale vakadua e vuravura na itovo kaukaua!—Same 72:7.
‘Era na taukena na yalomalua na vuravura.’—Maciu 5:5
Qo na gauna meda saga kina me vakadonui keda na Kalou ena noda guta na bula veiyaloni. E kaya na 2 Pita 3:9: “O Jiova . . . e vosoti kemuni ga ni sega ni vinakata me rusa e dua, e vinakata ga moni veivutuni kece.”
“Era na tukitukia na nodra iseleiwau me batinisiviyara kei na nodra moto me isele ni sasamaki.”—Aisea 2:4.
^ para. 7 E vakatarai ira na lewe i Isireli makawa na Kalou mera vala me taqomaki kina nodra vanua. (2 Veigauna 20:15, 17) E veisau qori ni tagutuva na Kalou nona veiyalayalati kei ira na Isireli, e tauyavu kina na ivavakoso ni lotu vaKarisito, e sega ni yalani vua e dua na ga na matatamata.
^ para. 11 Rawa ni wilika na nodra ivakaraitaki eso era veisautaka nodra bula ena ulutaga “E Veisautaka na Bula na iVolatabu,” e tabaki ena Vale ni Vakatawa.
Rawa ni o Wilika Tale ga
YADRA!
Na iWali ni iValavala Kaukaua e Vale
Ena vukea vakacava e dua voravora vakalevu na nona itovo na iVolatabu?
NA VALE NI VAKATAWA
Au Kau Dakai ena Vanua Kece Au Gole Kina
A lewena tu o Annunziato Lugarà e dua na ilawalawa voravora, ia e veisautaka nona bula na nona gole ena Kingdom Hall.
NA VALE NI VAKATAWA
Sala Meda Valuta Kina na Yalo ni Veicati—Valuta na Yalo ni Veicati ena Veivuke ni Kalou
E rawa ni vukei iko na yalo tabu ni Kalou mo bucina na itovo mo valuta kina na veicati.
