1, 2. Na cava e ka vakavuku kina meda rogoca na Dauveibuli nida digia noda isausau? (Raica na imatai ni iyaloyalo.)

KE O itabagone, kena irairai ni o sa rogoca e levu na ivakasala me baleta nomu veigauna se bera mai. De dua era uqeti iko nomu qasenivuli se daunivakasala e koronivuli mo vuli torocake, me dua tale ga nomu cakacaka saulevu. Ia e duatani na ivakasala i Jiova. E vinakata mo vuli vakaukaua mo rawa ni qaravi iko ni o vuli oti. (Kolo. 3:23) Ia e vakarautaka na ivakavuvuli yaga me dusimaki iko ni o vakatulewataka na ka mo vakaliuca ena nomu bula, mo rawa ni vakamarautaki koya ni o cakava na lomana ena gauna ni icavacava qo.—Maciu 24:14.

² Kua ni guilecava ni o Jiova e kila na ka kece. E kila na ka ena yaco ena gauna se bera mai, kei na kena vakarau vakarusai na vuravura ca qo. (Aisea 46:10; Maciu 24:3, 36) E kilai keda vinaka o koya. E kila na ka ena vakamarautaki keda se vakararawataki keda. Se mani rogo vinaka vakacava na  ivakasala vakatamata, ena sega ni ka vakavuku ke veisaqasaqa kei na Vosa ni Kalou.—Vkai. 19:21.

3, 4. E vakaleqai rau vakacava na imatai ni veiwatini kei na nodrau kawa na ivakasala ca?

³ A vakasavuya o Setani na imatai ni ivakasala ca ena itekitekivu ni bula ni kawatamata. Ena nona dokadoka, e vakasalataki Ivi ni rau na marau kei Atama ke rau lewa ga na ka me rau cakava. (Vkte. 3:1-6) E nanumi koya ga o Setani ni vinakata me rau talairawarawa vua na imatai ni veiwatini kei na nodrau kawa, mera qaravi koya tale ga, sega ni o Jiova. Ia na cava mada sa bau cakava vei rau? O Jiova ga e solia vei rau na ka kece—nodrau bula, nodrau itikotiko totoka, me rau bula tawamudu tale ga ni rau uasivi.

⁴ Ka ni rarawa ni rau talaidredre o Atama kei Ivi, rau tawasei rau mai vua na Kalou na iVurevure ni bula. E matata ni rau vakaloloma ga kina. Me vaka na senikau e beti mai vuna qai malai ni toso na gauna, rau qase yani, rau mate sara. E dewa tale ga na ivalavala ca vei ira na nodrau kawa. (Roma 5:12) Levu mada ga era sega ni via qarava na Kalou. Era via lewa ga na ka mera cakava. (Efeso 2:1-3) Cava na kena itinitini? E matata ga kina ni “sega na vuku . . . me saqati Jiova.”—Vkai. 21:30.

5. Na cava e kila tu na Kalou me baleta na kawatamata, eda vakadinadinataka vakacava?

⁵ E kila o Jiova nira na via kilai koya eso tale mera qaravi koya, okati kina e levu na itabagone. (Same 103:17, 18; 110:3) E mareqeti ira dina! Vakacava o dua vei ira? E matata ni o marautaka tiko e levu na “veika vinaka” e vakarautaka na Kalou. (Wilika Same 103:5; Vkai. 10:22) Eda na veivosakitaka e va na “veika vinaka” qori, na sautu ni kakana vakayalo, ira na itokani vinaka, na isausau e yaga, kei na galala dina.

6. Na cava mo kauaitaka kina na veika vakayalo, e vakarautaka vakacava qori o Jiova?

⁶ Eda duatani vei ira na manumanu, nida dau gadreva na veika vakayalo e vakarautaka na Dauveibuli. (Maciu 4:4) Nida rogoci koya, eda na yalomatua, vuku, marau tale ga. E kaya o Jisu: “Era marau o ira na kauaitaka nodra bula vakayalo.” (Maciu 5:3) Na Kalou e vakaceguya na gagadre qori ena nona Vosa kei na kakana vakayalo e vakarautaka “na dauveiqaravi yalodina e vuku.” (Maciu 24:45) E kakana bulabula qai levu na kena mataqali!—Aisea 65:13, 14.

7. E yaga vakacava nida vakayagataka na kakana vakayalo e vakarautaka na Kalou?

⁷ Na kakana vakayalo e vakarautaka na Kalou ena vakavukui iko, o na raiyawa tale ga. Qori e itataqomaki. (Wilika Vosa Vakaibalebale 2:10-14.) Kena ivakaraitaki, o na kila kina na ivakavuvuli lasu ni sega ni dua na Dauveibuli. E taqomaki iko tale ga mai na lasu nida na marau ni levu noda ilavo kei na iyau. Kena ikuri, o na kila qai vorata na gagadre kei na itovo e veivakaleqai. Koya gona, mo qara tiko ga na vuku vakalou kei na raiyawa, mo mareqeta tale ga! O na vakadinata kina ni lomani iko o Jiova, e vinakata tale ga mo marau.—Same 34:8; Aisea 48:17, 18.

8. Na cava mo toro volekati Jiova kina ena gauna qo, ena yaga vakacava qori ena gauna se bera mai?

 ⁸ Dua ga na gauna qo sa na kasura na ka kece e lewa tu o Setani, o Jiova ga ena taqomaki keda qai vakarautaka na veika eda gadreva. Qori ena rairai okati kina na ka meda kania! (Apak. 3:2, 12-19) Meda toro volekati Jiova gona ena gauna qo, meda nuitaki koya tale ga vakalevu. (2 Pita 2:9) Se mani cava e yaco, eda na duavata kei na daunisame o Tevita ni kaya: “E dei tu ga e mataqu o Jiova. Ni tu e ligaqu imatau o koya, au na sega vakadua ni yavalati.”—Same 16:8.

9. (a) Me vaka e tukuni ena Joni 6:44, na cava e cakava o Jiova? (b) Cava e vakasakiti kina nida sota na iVakadinadina i Jiova?

⁹ O Jiova e vagolei ira na yalomalumalumu ina sokalou dina, mera mai lewe ni nona vuvale vakayalo. (Wilika Joni 6:44.) Ena imatai ni gauna o sotava kina e dua e sega ni tiko ena dina, na cava o na rairai kila me baleti koya? E sega ni levu na ka, de dua na yacana ga kei na kena irairai. Ia e duatani ni o sotava ena imatai ni gauna e dua e kilai Jiova qai lomani koya. O sa na kila toka e levu na ka me baleti koya se mani vanua cava e gole mai kina, nona isususu se ivakarau vakavanua!

10, 11. Na cava eda tautauvata kina na tamata i Jiova, e yaga vakacava qori?

¹⁰ Kena ivakaraitaki, ena totolo ga nomudrau veikilai “vosa,” qori na “vosa savasava” ni ka dina. (Sefa. 3:9) E tautauvata na ka drau vakabauta me baleta na Kalou, na itovo savasava, kei na inuinui me baleta na veigauna se bera mai, qo e vica wale ga. Qori sara ga na ka bibi mo kila me baleta e dua, ni uqeta na veinuitaki. Ena vinaka kina noda veitokani, ena dei tale ga.

¹¹ Eda vakadinata ni levu sara noda itokani vinaka nida qaravi Jiova. E levu  eda se sega mada ga ni sota era tu e veiyasa i vuravura! Qori e dua na isolisoli talei eda marautaka ga na tamata i Jiova.

12. Na cava eso nomu isausau vakayalo?

¹² Wilika Dauvunau 11:9–12:1. Vakacava e tiko eso nomu isausau vakayalo? O rairai saga mo wilika e veisiga na iVolatabu. Se mo vakavinakataka nomu ivakamacala se itavi ena soqoni. Se maqosa ni vakayagataka na iVolatabu ena cakacaka vakaitalatala. Na cava o vakila ni o raica nomu toso, nira vakacaucautaki iko tale ga eso? O na marau qai lomavakacegu. E dodonu ga mo vakila qori ni o vakaliuca tiko na loma ni Kalou me vakataki Jisu, sega ni lomamu.—Same 40:8; Vkai. 27:11.

13. Na cava e vakasakiti kina noda qarava na Kalou ni vakatauvatani kei na isausau vakayago?

¹³ Nida vakaliuca na ka vakayalo, eda sa vakaitavi tiko ena cakacaka e marautaki, e vakainaki tale ga. E vola na yapositolo o Paula: “Ni tudei, kua ni yavala, dau vakaitavi vakalevu ena cakacaka ni Turaga ni sega ni ka wale na nomuni veiqaravi ena cakacaka ni Turaga.” (1 Kor. 15:58) Ena rairai levu noda ilavo, eda rogo tale ga nida vakaliuca na isausau vakayago, ia e ka wale kece. (Luke 9:25) Eda vakadinadinataka qori ena nona ivakaraitaki o Tui Solomoni.—Roma 15:4.

14. Na cava eda vulica ni vakatovolea o Solomoni na ka e vakavu marau?

¹⁴ E iliuliu kaukaua o Solomoni, e vutuniyau tale ga. E kaya: “Meu tovolea mada na veika e vakavumarau, meu raica kina na ka vivinaka.” (Dauv. 2:1-10) E tara nona vale, vakarautaka nona were kei na vanua ni gade, e cakava na ka kece e vinakata. Vakacava e marau kina qai lomavakacegu? Ena sauma ga vei keda o Solomoni. E vola: “Niu vakananuma na cakacaka kece ni ligaqu . . . , au raica ni ka wale kece . . . E sega na kedra yaga.” (Dauv. 2:11) Eda vuli sara ga kina! Vakacava o na kauaitaka na ka e tukuna?

15. Me vaka e tukuni ena Same 32:8, na cava e bibi kina na vakabauta, e yaga vakacava?

¹⁵ E sega ni vinakata o Jiova mo tara sara na we ni ivako mo qai vuli. E bibi gona na vakabauta mo talairawarawa vua na Kalou, mo vakaliuca tale ga na lomana. Ena yaga dina, o na sega vakadua ni veivutunitaka. O Jiova ena sega vakadua ni guilecava ‘na loloma o vakaraitaka ena vuku ni yacana.’ (Iper. 6:10) Koya gona, saga mo vaqaqacotaka nomu vakabauta, o na vakadinata ni kauaitaki iko dina na Tamamu vakalomalagi.—Wilika Same 32:8.

16. Na cava meda mareqeta kina na galala qai vakayagataka vakavuku?

¹⁶ E vola o Paula: “Na vanua e tiko kina na yalo i Jiova, e vakilai kina na galala.” (2 Kor. 3:17) Io, e marautaka o Jiova na galala, e buli iko mo marautaka tale ga. Ia e vinakata mo vakayagataka vakavuku na nomu galala, qori e itataqomaki. O na rairai kila eso na itabagone era dau sara iyaloyalo vakasisila, veiyacovi tawadodonu, vakaitavi ena qito rerevaki, vakayagataka na wainimate gaga se gunu vakasivia. De dua era na marautaka, ia e dau tini ga ina  leqa nira bobula kina, tauvimate, se mate sara. (Kala. 6:7, 8) Era sega ni vakila na “galala” dina.—Taito 3:3.

17, 18. (a) Eda galala vakacava nida talairawarawa vua na Kalou? (b) Sala cava rau a galala kina vakalevu o Atama kei Ivi vei keda na kawatamata nikua?

¹⁷ Ena yasana adua, vakacava o kila eso era tauvimate nira muria na ivakatagedegede vakaivolatabu? Eda vakadinata ni yaga dina noda talairawarawa vei Jiova nida vakila kina na galala. (Same 19:7-11) Ena nuitaki iko tale ga o Jiova kei rau nomu itubutubu ni o vakayagataka vakavuku nomu galala, ya ni o muria na lawa uasivi ni Kalou kei na nona ivakavuvuli. De dua erau na solia tale vei iko nomu itubutubu eso na galala. E inaki sara ga ni Kalou me solia vei ira nona dauveiqaravi na galala uasivi e vakamacalataki ena iVolatabu me “galala lagilagi era vakila tu na luve ni Kalou.”—Roma 8:21.

¹⁸ Rau a vakila o Atama kei Ivi na galala qori. E dua ga na ka e vakaroti rau kina na Kalou ena were o Iteni, me rau kua ni kana mai na dua ga na vunikau. (Vkte. 2:9, 17) Vakacava sa rui dredre na ivakaro qori? Sega sara! Vakasamataka mada na levu ni lawa e bulia na tamata me vulici qai muri.

19. Eda vakavulici vakacava meda vakila na galala?

¹⁹ E vakaraitaka o Jiova na vuku ni sega ni solia vei keda e levu na lawa, e vakavulici keda ga meda muria na lawa ni loloma. E vinakata meda muria na ivakavuvuli vakaivolatabu, meda cata tale ga na ka ca. (Roma 12:9) Eda raica qori ena nona Vunau ena Ulunivanua o Jisu, e vakavulici keda meda kila na ka e vakavuna na ivakarau ca. (Maciu 5:27, 28) Ni Tui ni Matanitu ni Kalou o Karisito, ena vakavulici keda tiko ga ena vuravura vou meda vakatotomuria nona rai me baleta na ivalavala dodonu kei na ka e vauca na beci ni lawa. (Iper. 1:9) Ena vakavuna tale ga me uasivi noda vakasama kei na yagoda. Vakasamataka mada, eda na sega tale ni temaki ena ka ca, se meda rarawa ena vuku ni ivalavala ca. Eda na marautaka ga na “galala lagilagi” e yalataka tu o Jiova.

20. (a) E vakayagataka vakacava o Jiova nona galala? (b) O na vakatotomuria vakacava nona ivakaraitaki?

²⁰ E matata ni vakaiyalayala ga na noda galala, ni yavutaki ena noda lomana na Kalou kei ira na kainoda. E vinakata o Jiova meda vakatotomuri koya. E tawavakaiyalayala nona galala, ia e yavutaki ena loloma na nona ivalavala vei ira nona ibulibuli vuku. (1 Joni 4:7, 8) Koya gona, ena qai taucoko noda galala ni yavutaki ena loloma vakalou.

21. (a) Na cava nona rai o Tevita me baleti Jiova? (b) Cava eda na veivosakitaka ena ulutaga tarava?

²¹ Vakacava o marautaka na “veika vinaka” e vakarautaka o Jiova, me vaka na kakana vakayalo, itokani vinaka, isausau yaga, kei na galala uasivi ena gauna se bera mai? (Same 103:5) O na rairai duavata kei na masu i Tevita ena Same 16:11 ni kaya: “Oni vakatakila vei au na sala ni bula. E uasivi na marau ni oni tiko, sa tu na marau e ligamuni imatau me tawamudu.” Ena veivosakitaki ena ulutaga tarava eso tale na iyau vakayalo ena Same 16. O na vulica na sala mo marautaka kina na bula vinaka duadua.