1. E uqeti keda vakacava na 2 Korinica 3:1-3 meda mareqeta noda itavi meda vakavulica e dua me lai papitaiso? (Raica na iyaloyalo ena waqana.)

E DAU vakacava nomu rai ni o raica ni papitaiso e dua na vuli iVolatabu mai na yalava ni nomudou ivavakoso? E macala ga ni o marau vakalevu. (Maciu 28:19) Ke nomu vuli iVolatabu qori, o na marautaka ni sa papitaiso! (1 Ces. 2:19, 20) O ira na tisaipeli vou era papitaiso, era vaka na “ivola ni veivakadeitaki” vei ira na vakavulici ira, vei ira tale ga na lewe ni ivavakoso.—Wilika 2 Korinica 3:1-3.

2. (a) Na taro cava meda vakasamataka? Na vuna? (b) Cava na ibalebale ni vuli iVolatabu? (Raica na ivakamacala e ra.)

² Eda marau nida ripotetaka ena va na yabaki sa oti e rauta ni 10 na milioni na vuli iVolatabu * e veivula e veiyasa i vuravura. E sivia ni 280 na udolu tale ga era papitaiso e veiyabaki mera iVakadinadina i Jiova, mera tisaipeli i Jisu Karisito. Eda na vukei ira vakacava na vica vata na milioni na vuli iVolatabu qori mera papitaiso? Ke solia tiko na gauna o Jiova mera mai tisaipeli i Karisito e levu tale, eda na via solia noda vinaka taucoko meda vukei ira mera papitaiso ena gauna totolo duadua. Sa lekaleka na gauna!—1 Kor. 7:29a; 1 Pita 4:7.

3. Na cava eda na veivosakitaka ena ulutaga qo?

 ³ Me vakabibitaki na veivakatisaipelitaki, e tarogi ena veivalenivolavola ni tabana na ka e rawa ni caka mera vukei kina na vuli iVolatabu mera papitaiso. Eda na dikeva ena ulutaga qo kei na kena e tarava na ka eda rawa ni vulica vei ira na painia matua, daukaulotu, kei na ivakatawa ni tabacakacaka. * (Vkai. 11:14; 15:22) Era vakaraitaka na ka era rawa ni cakava na qasenivuli kei na nodra gonevuli me vuavuaivinaka kina na vuli. Eda na veivosakitaka e lima na ka mera cakava na gonevuli me rawa nira toso tiko ga mera papitaiso sara.

4. Na cava meda nanuma tiko me baleta na caka vuli iVolatabu e matanikatuba?

⁴ E levu na tacida era dau caka vuli iVolatabu e matanikatuba. E macala ni rawa ni uqeta me taleitaki na iVolatabu, ia e dau lekaleka sara na veivosaki, e rairai sega ni caka tale ga e veimacawa. Me rawa ni vukea nona toso o gonevuli, eso na tacida era dau kerea na nodra naba ni talevoni me rawa nira wasea eso na itukutuku vakaivolatabu ni bera nodra veisiko e tarava, era cakava qori nira qiri se vakau itukutuku. Eso na gauna ena rairai caka tiko qo me vica vata na vula ni bera ni toso vinaka sara na vuli. Ia ke lailai tiko ga va qori na sasaga kei na gauna e vakayagataka o gonevuli me vulica kina na iVolatabu, vakacava ena rawa ni toso sara me yalataki koya qai papitaiso? De dua ena sega.

5. Ena Luke 14:27-33, na cava e vakabibitaka o Jisu ena yaga ena noda veivakatisaipelitaki?

⁵ Dua na gauna e vakamacalataka o Jisu na ka meda cakava me rawa nida nona tisaipeli. E tukuna na ivakatautauvata me baleta e dua e via tara e dua na vale cecere, kei na dua na tui e via lako ina ivalu. E kaya o Jisu ni vinakati vua e taravale me “dabe mada me cakacakataka na kena isau,” me kila ke rawa ni vakaotia na vale. E vinakati tale ga vua na tui me “dabe mada me veivosakitaka” ke na vinaka na sasaga ni nona mataivalu se sega. (Wilika Luke 14:27-33.) E kila gona o Jisu ni bibi vei ira na vinakata mera nona tisaipeli mera vakasamataka vakavinaka na ka e okati kina. Me rawa qori, e bibi meda uqeti ira noda vuli iVolatabu mera vuli e veimacawa. Eda na cakava vakacava?

6. Na cava eda rawa ni cakava me toso kina noda vuli iVolatabu?

 ⁶ Ke o dau caka vuli iVolatabu e matanikatuba, saga mo vakabalavutaka na vuli. Ena sala cava? Ke o dau veivosakitaka ga e dua na tikinivolatabu, tovolea me rua ena nomu veisiko tarava. Ni sa matau vua na vuli e dede toka, taroga ke rawa ni drau dabe ena dua na vanua me tomani kina na vuli. O na kila ena ka e tukuna, ke raica tiko vakabibi nona vulica na iVolatabu. De dua ni toso na gauna, o rawa ni taroga ke via vuli vakarua ena dua na macawa me vukea nona toso. Ia e levu tale na ka e vinakati.

7. Me vakavakarau vinaka vakacava o qasenivuli ena vuli kece?

⁷ Ni o qasenivuli, e bibi mo vakavakarau vinaka ena vuli kece. O rawa ni tekivu ni o wilika na ka drau na vulica, wilika tale ga na kena veitikinivolatabu me matata vei iko na veitikina bibi. Vakasamataka na ulutaga levu, na ulutaga lalai, taro, tikinivolatabu me ‘wiliki,’ iyaloyalo, kei na vidio o rawa ni vakayagataka me vakamatatataka na ulutaga. Ni o nanumi nomu gonevuli tiko, vakasamataka na sala rawarawa mo vakamacalataka kina na ka e vulici me matata vua qai muria sara.—Niem. 8:8; Vkai. 15:28a.

8. Ena yaga vakacava na ka e vola na yapositolo o Paula ena Kolosa 1:9, 10 nida masulaki noda gonevuli?

⁸ Ni o vakavakarau, masulaki nomu gonevuli vei Jiova kei na ka ena rawa ni vukei koya. Kerea na veivuke i Jiova mo rawa ni vakavulici nomu gonevuli ena iVolatabu ena sala ena uqeta kina na lomana. (Wilika Kolosa 1:9, 10.) Vakasamataka na ka ena rairai dredre vua me kila se vakabauta. Mo nanuma tiko ni nomu isausau mo vukei koya me papitaiso.

9. Ena rawa ni vukei nona gonevuli vakacava o qasenivuli me vakavakarau ena vuli? Vakamacalataka.

⁹ Eda vakanuinui tu ni nona vuli wasoma o gonevuli, ena vakavinavinakataka kina na ka rau cakava o Jiova kei Jisu, ena uqeti koya tale ga me via kila eso tale na ka. (Maciu 5:3, 6) Me rawa ni yaga vua na gonevuli na ka e vulica, e bibi vua me kauaitaka. Ena rawa  vakacava? Vakamacalataka vua na bibi ni nona vakavakarau ena vuli kece, ya ni wilika qai vakasamataka na sala me muria kina. O na vukei koya vakacava me vakavakarau? Drau vakavakarau vata ena dua na lesoni me kila na kena icakacaka. * Vakamacalataka vua na sala me kila kina na isaunitaro donu, kei na sala me makataka ga kina na vosa se matavosa bibi, ena rawarawa kina me nanuma nona isaunitaro. Oti qai kerei koya me vakamacala ga ena nona vosa, me kua ni wilika na isaunitaro. O na rawa ni qai kila ena nona ivakamacala ke sa matata vua na ka e vulica. E dua tale na ka mo uqeti nomu gonevuli kina.

10. Na cava e bibi kina me wiliki e veisiga na iVolatabu? Cava me cakava o gonevuli me yaga kina nona wili iVolatabu?

¹⁰ Me ikuri ni nona vuli e veimacawa o gonevuli, ena yaga tale ga vua eso na ka e rawa ni cakava ga vakataki koya e veisiga. E bibi me dau veivosaki kei Jiova. Ena sala cava? Me vakarorogo vei Jiova, me vosa tale ga vua. E rawa ni rogoca na Kalou ni wilika e veisiga na iVolatabu. (Josua 1:8; Same 1:1-3) Vakaraitaka vua na ivakavakayagataki ni “iTuvatuva ni Wili iVolatabu” ena jw.org * e rawa ni tabaka me maroroya e dua na nona. Me yaga vua nona wili iVolatabu, uqeti koya me dau vakasamataka vakatitobu na ka e vulica kina me baleti Jiova, kei na sala me muria kina e veisiga na ka e vulica.—Caka. 17:11; Jeme. 1:25.

11. Ena vulica vakacava o gonevuli na ivakarau donu me masu kina? Cava e bibi kina me masu wasoma vei Jiova?

¹¹ Mo uqeti nomu gonevuli me dau vosa vei Jiova ni masu e veisiga. Me vu mai lomamu na ka o cavuta ni drau masu vata kei nomu vuli iVolatabu ena itekitekivu ni vuli, ena gauna tale ga e oti kina. Cavuta na yacana ena nomu masu. Ena yaga vakacava vua? Ena vulica me dau masu mai vu ni lomana, me masu tale ga vua na Kalou o Jiova ena vuku i Jisu Karisito. (Maciu 6:9; Joni 15:16) Vakasamataka na sala ena veivolekati kina kei Jiova o nomu gonevuli ni wilika e veisiga na iVolatabu (rogoci Jiova), masu tale ga vua (vosa  vei Jiova)! (Jeme. 4:8) Ni vakamatauna qori o nomu gonevuli, ena toso me lai yalataki koya sara qai papitaiso.

12. Ena vukei nona gonevuli vakacava o qasenivuli me veiwekani voleka kei Jiova?

¹² Ni vuli iVolatabu tiko o nomu gonevuli, e bibi me uqeta na nona vakasama kei na lomana na ka e vulica. Na vuna? Na lomada e okati kina na noda gagadre kei na ka eda vinakata, ena uqeti keda ena ka meda cakava. O Jisu e vakavulica na ka dina qai dreta na nodra vakasama nona veivakavulici. Ia era muri koya ni uqeta na lomadra. (Luke 24:15, 27, 32) E bibi me kila o nomu gonevuli ni bula dina tiko o Jiova, e rawa ni veiwekani voleka kei koya, me raici koya me Tamana, nona Kalou, nona iTokani tale ga. (Same 25:4, 5) Ni drau vuli tiko, vakabibitaka na itovo i Jiova. (Lako 34:5, 6; 1 Pita 5:6, 7) Se mani ulutaga cava drau vulica, vukei koya me kilai Jiova vinaka. Me matata tale ga vua na nona itovo talei me vaka na nona loloma, yalovinaka, kei na veinanumi. E kaya o Jisu “mo lomani Jiova na nomu Kalou,” qori “na ivunau levu duadua” na kena imatai tale ga. (Maciu 22:37, 38) Mo vukei nomu gonevuli gona me lomani Jiova mai vu ni lomana.

13. Tukuna e dua na sala eda rawa ni vukea kina noda gonevuli me kila na itovo i Jiova?

¹³ Ni drau veitalanoa kei nomu gonevuli, vakamacalataka vua na vuna o lomani Jiova kina vakalevu. Ena rawa ni kila kina o gonevuli ni bibi me bucina e dua na veiwekani voleka kei na Kalou. (Same 73:28) Kena ivakaraitaki, vakacava e uqeti iko e dua na matavosa ena ivolanivuli? Se dua na tikinivolatabu e vakavotuya na itovo i Jiova, me vaka na nona loloma, vuku, lewadodonu, se kaukaua? Vakaraitaka vua nomu gonevuli, tukuna vua ni qori e dua na vuna o lomana kina vakalevu na Tamamu vakalomalagi. E tiko e dua tale na ka ena vinakati vei ira na gonevuli me rawa nira toso mera papitaiso sara.

14. Ena yaga vakacava vei ira noda gonevuli na ka e tukuni ena Iperiu 10:24, 25 me baleta na soqoni?

¹⁴ Eda vinakata kece mera toso noda vuli iVolatabu mera papitaiso sara. Dua na sala eda rawa ni vukei ira kina oya nida uqeti ira mera dau tiko ena soqoni kece. Era kaya eso na qasenivuli matua  ni dau totolo sara na nodra toso na gonevuli era tiko ena soqoni. (Same 111:1) Eso na qasenivuli era vakamacalataka vei ira nodra gonevuli ni wase rua tiko na vuli, e dua e caka nira vuli iVolatabu tiko, na kena ikarua era na vulica ena gauna ni soqoni. Wilika vua nomu gonevuli na Iperiu 10:24, 25 qai tukuna vua na yaga ni nona tiko ena soqoni. Vakaraitaka vua na vidio Na Cava e Caka ena Vale ni Soqoni? * Vukei nomu gonevuli me raica vakabibi na nona dau tiko ena soqoni e veimacawa.

15. Eda na uqeti ira vakacava noda gonevuli mera tiko wasoma ena soqoni?

¹⁵ Na cava o rawa ni cakava ke se sega vakadua ni tiko ena soqoni o nomu gonevuli se dau gole ga mai ena so na gauna? Talanoataka vua na ka o marautaka ena soqoni sa oti. Qori ena uqeti koya sara vakalevu mai na nomu sureti koya ga. Solia vua Na Vale ni Vakatawa se na Noda iVola ni Soqoni ni Bula vaKarisito kei na Cakacaka Vakaitalatala e vulici tiko. Vakaraitaka na ka ena vulici ena soqoni e tarava qai taroga ke dua na ka e taleitaka kina. Ena duatani sara na ka e raica o nomu gonevuli ena imatai ni nona soqoni ni vakatauvatani kei na lotu kece e gole kina. (1 Kor. 14:24, 25) Ni gole ena soqoni, ena sotavi ira era ivakaraitaki vinaka, era na vukea tale ga nona toso me lai papitaiso sara.

16. Na cava meda cakava me rawa ni toso kina noda gonevuli me lai papitaiso sara? Cava ena vulici ena ulutaga e tarava?

¹⁶ Na cava meda cakava me rawa ni toso kina noda gonevuli mera lai papitaiso sara? Meda vukei ira yadua mera raica vakabibi na nodra vuli nida uqeti ira mera vuli e veimacawa, mera vakavakarau vinaka tale ga. Meda uqeta noda gonevuli me dau veivosaki kei Jiova e veisiga, me rau veiwekani voleka tale ga. Meda uqeti noda gonevuli me dau tiko ena soqoni kece. (Raica na kato “ Ka me Cakava o Gonevuli me Papitaiso Kina.”) Ena vakamacalataki ena ulutaga e tarava e lima tale na sala mera vukei nodra gonevuli kina na qasenivuli mera papitaiso.