ULUTAGA NI VULI 17
E Vakamareqeti Iko o Jiova!
“Dau marautaki ira na nona tamata o Jiova.”—SAME 149:4.
SERE 108 Na Dei ni Loloma ni Kalou
KA ENA VULICI *
“Dau marautaki” keda yadudua na Tamada vakalomalagi (Raica na parakaravu 1)
1. Na cava e kila o Jiova me baleti ira nona tamata?
NA KALOU o Jiova e “marautaki ira na nona tamata.” (Same 149:4) Eda marautaka qori! E kila o Jiova na noda itovo vinaka kei na ka eda rawa ni cakava, qai vukei keda meda toro volekati koya. Nida yalodina tiko ga vua, ena volekati keda tiko ga me tawamudu!—Joni 6:44.
2. Na cava e dredre kina mera vakabauta eso ni lomani ira o Jiova?
2 Era na rairai kaya eso, ‘Au kila ni lomani ira vakailawalawa nona tamata o Jiova, ia au vakadeitaka vakacava ni lomani au?’ Na cava e vakavuna me tarogi qori? E vakalolomataki e dua na tacida yalewa o Oksana * ni se gone, e kaya: “Au marau niu sa papitaiso, au painia sara. Ia ni oti e 15 na yabaki au rarawataka niu vakasamataka lesu noqu vakalolomataki niu se gone. Au nanuma kina ni sega ni vakadonui au o Jiova qai sega ni ganiti au na nona loloma.” E vakalolomataki tale ga o Yua ni se gone, e dua na tacida yalewa e painia tiko, e kaya: “Au yalataki au vei Jiova niu via vakamarautaki koya. Ia au kila tu ga ni sega ni lomani au.”
3. Na cava eda na veivosakitaka ena ulutaga qo?
3 O lomani Jiova tale ga vakalevu me vakataki rau na tacida yalodina qori, ia o rairai vakatitiqataka ni lomani iko. Na cava mo vakadeitaka kina ni kauaitaki iko dina o Jiova? Na cava tale ga ena vukei iko ni o nanuma ni sega ni lomani iko? Meda dikeva mada na kena isau.
KUA NI VAKATITIQATAKA NA LOLOMA I JIOVA
4. Na cava meda kua ni vakatitiqataka kina na loloma i Jiova?
4 E dau uqeti keda na loloma. Nida vakadeitaka ni lomani keda o Jiova e tokoni keda tale ga, eda na via qaravi koya sara ga mai vu ni lomada se mani vakacava na veika dredre eda sotava. Ia ke da vakatitiqataka ni lomani keda o Jiova, ena ‘lailai na noda kaukaua.’ (Vkai. 24:10) Nida yalolailai tale ga qai luluqa noda vakabauta na loloma ni Kalou, ena rawarawa ni temaki keda o Setani.—Efeso 6:16.
5. E vakaleqa vakacava nodra bula eso nira vakatitiqataka na loloma ni Kalou?
5 Era malumalumu vakayalo eso na tacida era yalodina ena gauna qo nira vakatitiqa. E kaya e dua na qase ni ivavakoso o James: “Au veiqaravi tiko e Peceli, au marautaka tale ga noqu cakacaka vakavunau ena ivavakoso e vakayagataki kina e dua tale na vosa. Ia au dau lomatarotarotaka ke marautaka o Jiova na noqu veiqaravi. Dua mada ga na gauna au sega ni vakadeitaka ke rogoca tiko o Jiova na noqu masu.” E kaya o Eva, e veiqaravi tale ga vakatabakidua: “Au kila ni ririkotaki ke da vakatitiqataka na loloma i Jiova. Baleta ni vakaleqa sara ga na veika kece eda cakava, e vakaleqa noda bula vakayalo, vaka kina noda marautaka na qaravi Jiova.” E kaya e dua na painia tudei o Michael, e qase tale ga ni ivavakoso: “Ke o sega ni vakabauta ni kauaitaki iko na Kalou, o na ciri tani.”
6. Na cava meda cakava nida vakatitiqataka ni lomani keda na Kalou?
6 Eda raica ena ivakaraitaki kece sa tukuni mai qori ni veivakaleqai noda dau rai cala. Ia na cava meda cakava ke tekivu buroro ena noda vakasama na rai cala? Meda cavuraka tani totolo sara ga! Kerei Jiova me sosomitaka na “veilecayaki ni [nomu] vakanananu” ena “vakacegu ni Kalou” e ‘taqomaka na lomamu kei na nomu vakasama.’ (Same 139:23; vmr.; Fpai. 4:6, 7) Nanuma tiko ni so tale ga e va qori nodra rai. Levu na tacimu yalodina era dau rai cala. So mada ga na dauveiqaravi i Jiova ena gauna sa oti era saga me kua ni va qori nodra rai. Meda dikeva mada na ka eda rawa ni vulica vua na yapositolo o Paula.
KA EDA VULICA VEI PAULA
7. Na cava eso na leqa e vakila o Paula?
7 O dau lomaocaocataka e levu na itavi qai dredre mo qarava kece? Ke va qori nomu rai, o na kila na ka e sotava o Paula. E sega ni lomaleqataka ga e dua na ivavakoso, ia na “ivavakoso kece.” (2 Kor. 11:23-28) Vakacava o rarawataka nomu tautauvimate? O Paula tale ga e vakararawataki koya tiko e “dua na votonikau,” e rairai vakavuna nona tauvimate qai vinakata me kau laivi. (2 Kor. 12:7-10) Vakacava e vakayalolailaitaki iko nomu malumalumu? E vakila tale ga qori o Paula. E kaya mada ga ni “vakaloloma dina” baleta ni veivala tiko ga kei na yagona sega ni uasivi, ni saga me caka dodonu.—Roma 7:21-24.
8. Na cava e vukei Paula me vosota na veika dredre?
8 E vosota o Paula e levu na ka dredre, e yalolailai tale ga, ia e qaravi Jiova tiko ga. Na cava e vukei koya? E kila vinaka tu nona malumalumu, ia e dei tu ga nona vakabauta na ivoli. E kila vinaka na yalayala i Jisu ni o ‘ira kece na vakaraitaka nodra vakabauti koya era na rawata na bula tawamudu.’ (Joni 3:16; Roma 6:23) Dua gona vei ira na vakaraitaka nona vakabauta na ivoli o Paula. E vakadeitaka ni o Jiova e tu vakarau me vosoti ira na ivalavala ca bibi ke ra veivutuni.—Same 86:5.
9. Na cava eda vulica ena vosa i Paula ena Kalatia 2:20?
9 E vakabauta tale ga o Paula na levu ni loloma ni Kalou e mai vakaraitaka o Karisito. (Wilika Kalatia 2:20.) Dikeva mada na veiuqeti ni itinitini ni tikinivolatabu qori. E kaya o Paula: “Na Luve ni Kalou . . . e lomani au, e solia tale ga nona bula ena vukuqu.” E sega ni tukuna o Paula ni yalani na loloma ni Kalou, me kaya, ‘Au kila ni lomani ira na taciqu o Jiova, ia sa sega tu ga ni lomani au rawa.’ E kaya vei ira e Roma mera nanuma tiko qo: “Ni mai mate na Karisito ena vukuda nida se ivalavala ca tu.” (Roma 5:8) E sega gona ni vakaiyalayala na loloma ni Kalou!
10. Na cava eda vulica ena Roma 8:38, 39?
10 Wilika Roma 8:38, 39. E vakadeitaka o Paula na levu ni nona lomani keda na Kalou. E vola ni sega ni dua na ka “me tawasei keda mai na loloma ni Kalou.” E kila o Paula ni dau yalovosovoso o Jiova vei ira na Isireli. E kila tale ga nona yalololoma vua. Eda rawa ni kaya ni va qo na rai nei Paula, ‘Ke solia mai na Luvena o Jiova me mate ena vukuqu, na yavu cava meu vakatitiqataka kina nona loloma?’—Roma 8:32.
E bibi vua na Kalou na ka eda cakava ena gauna qo, vaka kina na gauna se bera mai, sega ni noda cala sa oti (Raica na parakaravu 11) *
11. E levu na ivalavala ca i Paula e tukuni ena 1 Timoci 1:12-15, ia e nuidei vakacava ni lomani koya na Kalou?
11 Wilika 1 Timoci 1:12-15. Eso na gauna e vakayalolailaitaki Paula nona bula e liu. Sa rauta me tukuna ni “torosobu duadua” vei ira na ivalavala ca! Ni se bera ni kila na ka dina o Paula e gumatua ni vakasaqarai ira na lotu vaKarisito e veikorokoro, e balata eso e valeniveivesu, e tokona tale ga nodra totogimate eso. (Caka. 26:10, 11) O bau vakasamataka nona rai ke sotava e dua na lotu vaKarisito gone e vakadonuya nodrau vakamatei na nona itubutubu? E veivutunitaka o Paula na nona cala, ia e kila ni sega ni veisautaka rawa na ka sa yaco oti. E kila ni mate o Karisito ena vukuna, e nuidei kina me vola: “Ena loloma soli wale ga ni Kalou, au mai yacova kina na vanua au sa tu kina qo.” (1 Kor. 15:3, 10) Na cava eda vulica kina? Meda ciqoma nona mate ena vukuda o Karisito, me rawa kina nida veiwekani voleka kei Jiova. (Caka. 3:19) E bibi vua na Kalou na ka eda cakava ena gauna qo kei na gauna se bera mai, sega ni noda cala sa oti, se da mani iVakadinadina i Jiova ena gauna ya se sega.—Aisea 1:18.
12. Ena vukei keda vakacava na 1 Joni 3:19,20 meda kua ni nanuma nida sega ni yaga se lomani?
12 Ni o vakasamataka nona mate o Jisu ena vuku ni noda ivalavala ca, o na rairai kaya, ‘E sega ni ganiti au na iloloma talei qori.’ Na cava e rawa ni va kina qori noda rai? Rawa ni vakacalai keda na lomada e dau veivakaisini, meda nanuma kina nida sega ni yaga se lomani. (Wilika 1 Joni 3:19, 20.) Na gauna va qori e bibi meda nanuma tiko ni “uasivia na lomada na Kalou.” Na nona dauloloma kei na nona dauveivosoti na Tamada vakalomalagi, e uasivia na noda rai cala. Meda vakabauta ni lomani keda o Jiova. Eda na rawata ga qori nida vulica na nona Vosa, masu wasoma, eda veimaliwai wasoma tale ga kei ira na qaravi koya tiko ena yalodina. Na cava e bibi kina qori?
YAGA NA VULI IVOLATABU, MASU, KEI IRA NA ITOKANI YALODINA
13. E yaga vakacava noda vulica na Vosa ni Kalou? (Raica na kato “Yaga Vei Ratou na Vosa ni Kalou.”)
13 Vulica na Vosa ni Kalou e veisiga, o na qai kila vinaka na itovo talei i Jiova. O na vulica tale ga na levu ni nona lomani iko. Ni o vakasamataka vakatitobu na Vosa ni Kalou e veisiga, ena vinaka kina nomu vakasama ni ‘vakadodonutaka’ nomu rai kei na lomamu. (2 Tim. 3:16) E kaya e dua na qase ni ivavakoso o Kevin, e dau beci koya: “E veisautaka noqu rai niu wilika na Same 103 qai vakasamataka vakatitobu, au kila kina na ka dina e nanuma tu o Jiova me baleti au.” E kaya o Eva, sa tukuni oti mai: “Ni mai cava e dua na siga, au dau vakasamataka vakatitobu na rai i Jiova. Au lomavakacegu kina, e vaqaqacotaki tale ga noqu vakabauta.”
14. E yaga vakacava vei keda na masu?
14 Masu wasoma. (1 Ces. 5:17) Na veiwekani e dei e yavutaki ena veivosaki wasoma qai vu mai lomada. E va tale ga qori na veitokani kei Jiova. Nida masu qai tukuna vua na lomada, noda rai, kei na ka eda kauai kina, e vakaraitaka nida nuitaki koya, eda kila tale ga ni lomani keda. (Same 94:17-19; 1 Joni 5:14, 15) E kaya o Yua, sa tukuni oti mai: “Niu masu au sega wale ga ni tukuna na veika au cakava ena dua na siga. Au talaucaka sara ga na lomaqu kece vei Jiova. Au raici Jiova me dua na Tama e lomani ira dina na luvena, sega ni vaka na manidia ni dua na kabani levu.”—Raica na kato “O sa Wilika?”
15. E kauaitaki keda vakacava o Jiova?
15 Dau veimaliwai kei ira na itokani yalodina nira isolisoli mai vei Jiova. (Jeme. 1:17) E kauaitaki keda na Tamada vakalomalagi ni vakarautaka e dua na vuvale vakayalo era dau “loloma ena veigauna.” (Vkai. 17:17) Ena ivola i Paula vei ira e Kolosa, e cavuta eso na lotu vaKarisito era tokoni koya, e kaya nira “dau vakacegui” koya. (Kolo. 4:10, 11) A vinakata tale ga na veivakacegui o Karisito Jisu, qai vakavinavinakataka nodra veitokoni na nona itokani kei ira na agilosi.—Luke 22:28, 43.
16. Era vukei keda vakacava na itokani yalodina meda veivolekati kei Jiova?
16 Vakacava era yaga tiko vei iko na itokani e vakarautaka mai o Jiova? Na nomu dau tukuna vei ira na itokani matua vakayalo na veika o kauai kina e sega ni vakaraitaka ni malumalumu na nomu vakabauta. E itataqomaki ga. Dikeva mada na ka e kaya o James, sa cavuti oti mai: “E vukei au vakalevu noqu veitokani vinaka kei ira na lotu vaKarisito matua. Ni vakayalolailaitaki au na rai cala, era dau vosovoso ni vakarorogo vinaka na itokani talei va qo era vakadeitaka tale ga nira lomani au. Ena vukudra ga au raica kina nona lomani au o Jiova, e kauaitaki au tale ga.” E bibi gona meda veitokani kei ira na tacida vakayalo, me dei tale ga noda veitokani!
ENA LOMANI IKO TIKO GA O JIOVA
17-18. O cei meda vakarorogo vua? Na vuna?
17 E saga o Setani meda soro meda kua ni caka dodonu. E vinakata meda vakabauta ni sega ni lomani keda o Jiova, meda kua tale ga ni vakabulai. Ia me vaka eda sa raica mai, e lasu kece qori.
18 E lomani iko o Jiova. Dua na ka nona mareqeti iko. Ke o muria nona vosa, ena ‘lomani iko tiko ga’ me tawamudu, me vaka nona lomani iko o Jisu. (Joni 15:10) Kua sara ni vakarorogo vei Setani, se na ka o nanuma ga. Ia mo vakarorogo vei Jiova, ni dau raica ga na ka eda vinaka kina. Mo nuidei ni “dau marautaki ira na nona tamata,” wili kina o iko!
SERE 141 iSolisoli Talei ni Bula
^ para. 5 Eso na tacida e dredre mera vakabauta ni rawa ni lomani ira o Jiova. Eda na veivosakitaka ena ulutaga qo na vuna meda vakadeitaka kina ni lomani keda yadudua sara ga o Jiova. Eda na dikeva tale ga na sala meda kua kina ni dau vakatitiqataka ni lomani keda.
^ para. 2 Sa veisau eso na yaca.
^ para. 67 IVAKAMACALA NI IYALOYALO: Ena gauna e liu e dau tokona o Paula nodra biu e valeniveivesu e levu na lotu vaKarisito. Ni vakabauta na ka e cakava ena vukuna o Jisu, e veisau qai uqeti ira na tacina lotu vaKarisito, so era rairai wekadra e vakacacana.
