1-2. E rawa vakacava nida muria na weniyava i Jisu? Tukuna e dua na kena ivakatautauvata.

VAKASAMATAKA mada ni o lewe ni dua na ilala, dou taubale tiko ena dua na vanua nukunuku e rerevaki. E liutaki kemudou tiko e dua e kila vinaka na vanua qori. Ni taubale tiko, e laurai na weniyavana ena nuku. Ni toso tiko na ilakolako sa sega ni laurai o koya e liu tiko. Ia o sega ni taqaya. Na vuna? Ni dou muria voleka na weniyavana!

² Nida lotu vaKarisito dina, e vaka ga nida taubale tiko ena dua na vanua nukunuku e rerevaki, ya na vuravura ca qo. Eda kalougata ni vakarautaka o Jiova e dua e rawa ni liutaki keda, ya na Luvena o Jisu Karisito, meda muria voleka na weniyavana. (1 Pita 2:21) E kaya e dua na ivakamacala ni iVolatabu ni vakayagataka eke o Pita na ivakatautauvata ni dua e liutaka tiko na ilakolako. Me vaka ga ni laurai tiko na weniyava i koya e liutaka tiko na ilakolako, o Jisu tale ga e biuta na ivakarau meda muria. Meda dikeva mada e tolu na taro nida muria tiko na weniyavana. Na cava na kena ibalebale meda muria na weniyava i Jisu? Na vuna? Eda na cakava vakacava?

3. Na cava na kena ibalebale meda muria na weniyavana e dua?

³ Na cava na kena ibalebale meda muria na weniyavana e dua? Ena iVolatabu na vosa “lako” kei na ‘yava,’ eso na gauna e dusia na nona ivakarau ni bula e dua. (Vkte. 6:9; Same 119:59) E rawa ni vakatauvatani na ivakarau ni nona  bula kei na weniyavana ni taubale tiko. Nida muria gona na weniyavana e dua, e kena ibalebale nida muria na nona ivakaraitaki, meda vakatotomuri koya.

4. Na cava na kena ibalebale meda vakatotomuria na weniyava i Jisu?

⁴ Na cava na kena ibalebale meda muria na weniyava i Jisu? Kena isau rawarawa ga, ya na noda vakatotomuria na nona ivakaraitaki. Ena tikinivolatabu e yavutaki kina noda vuli qo, e vakabibitaka na yapositolo o Pita na nona ivakaraitaki vinaka o Jisu ni dau vosota na veika rarawa, ia e levu tale na sala eda rawa ni vakatotomuri koya kina. (1 Pita 2:18-25) Na bula taucoko i Jisu, ya na ka kece e kaya kei na veika e cakava, e ivakaraitaki meda vakatotomuria.

5. Nida tamata ivalavala ca, vakacava eda rawa ni muria na ivakaraitaki uasivi i Jisu? Vakamacalataka.

⁵ Nida tamata ivalavala ca, vakacava eda rawa ni muria na ivakaraitaki i Jisu? Io, e rawa. Vakasamataka ni a uqeti keda o Pita meda ‘muria voleka na weniyava i Jisu,’ ia a sega ni tukuna meda uasivi me vakataki koya. Ke da muria na weniyavana nida sega ni uasivi, ya nida solia noda vinaka taucoko, eda sa muria tiko na ka e tukuna na yapositolo o Joni: “Muria tale ga na nona ilakolako [o Jisu].”—1 Joni 2:6, vmr.

6-7. Na cava eda rawa ni kaya kina nida na volekati Jiova ke da muria voleka na weniyava i Jisu?

⁶ Nida cakava qori eda na volekati Jiova kina. Na cava eda rawa ni tukuna kina qori? Kena imatai, e ivakaraitaki vinaka duadua o Jisu ena sala meda vakamarautaka kina na Kalou. (Joni 8:29) Nida vakatotomuria gona na weniyava i Jisu, eda na vakamarautaki Jiova.  Macala ga ni na toro volekati ira tale ga na saga mera nona itokani.—Jeme. 4:8.

⁷ Kena ikarua, e ucui Tamana vinaka sara ga o Jisu. Qori na vuna e rawa ni kaya kina: “O koya sa raici au sa raici Tamaqu tale ga.” (Joni 14:9) Nida vakatotomuria na itovo i Jisu kei na ka e cakava vei ira eso tale, kena ivakaraitaki nona lomana na vukavuka, kauaitaka na marama e tauvimate bibi tu, kei na nona kauaitaki ira na lolosi tiko, eda sa vakatotomuri Jiova sara tiko ga. (Mari. 1:40, 41; 5:25-34; Joni 11:33-35) Na levu ga ni noda saga meda muria na ivakaraitaki i Jiova, eda na volekati koya.

8. Vakamacalataka na vuna eda na “vakamalumalumutaki” vuravura kina nida muria na weniyava i Jisu.

⁸ Nida muria na weniyava i Jisu, eda na sega ni vakawelei ena vuravura ca qo. Ena iotioti ni bogi i Jisu e vuravura, a rawa ni tukuna: “Au sa vakamalumalumutaki vuravura.” (Joni 16:33) Na cava e vakaibalebaletaka o Jisu? E sega ni vinakata me muria na rai ni vuravura, isausau, kei na kena ivalavala. E dei tiko ga vua na vuna e talai mai kina, me vakarokorokotaka na yaca i Jiova. Vakacava o keda? E levu na ka ena vuravura qo e rawa ni veivakawelei. Ia ke da vakataki Jisu meda dei tiko ga ni vakayacora na loma i Jiova, eda na “vakamalumalumutaki” vuravura tale ga.—1 Joni 5:5.

9. Na cava meda cakava meda rawata kina na bula tawamudu?

⁹ Nida muria na weniyava i Jisu eda na rawata kina na bula tawamudu. E taroga e dua na cauravou vutuniyau na ka me cakava me rawata na bula tawamudu. E kaya o Jisu: “Mai muri au.” (Maciu 19:16-21) Eso na Jiu era sega ni vakabauta ni Karisito o Jisu, e kaya vei ira: ‘Era muri au na noqu sipi. Au solia vei ira na bula tawamudu.’ (Joni 10:24-29) E lewe ni Sanadrini o Nikotimo, e taleitaka na ivakavuvuli i Jisu. E kaya vua ‘ni o ira na vakaraitaka nodra vakabauti koya era na rawata na bula tawamudu.’ (Joni 3:16) Eda vakaraitaka nida vakabauti Jisu nida muria na ka e vakavulica da qai vakatotomuria na ka e cakava. Ke da cakava tiko qori, eda na nuitaka meda na bula tawamudu.—Maciu 7:14.

10. Na cava e okati ena noda “kilai” Jisu vakavinaka? (Joni 17:3)

¹⁰ Ni bera nida muria voleka na weniyava i Jisu, e bibi meda kilai koya mada vakavinaka. (Wilika Joni 17:3, vmr.) E sega ni vakaiyalayala na noda “kilai” Jisu. E vinakati meda kila e levu na ka me baleti koya, meda vulica nona itovo, rai, kei na nona ivakatagedegede. Se mani vakacava  na dede ni noda tiko ena dina, e bibi tiko ga meda saga meda kilai Jiova vakavinaka kei Luvena.

11. Na cava e tiko ena va na Kosipeli?

¹¹ Me rawa nida kilai Luvena vinaka, e vakarautaka vakayalololoma o Jiova ena nona Vosa e va na Kosipeli. E tiko kina na itukutuku ni bula i Jisu kei na nona cakacaka vakaitalatala. Eda na wilika ena Kosipeli na ka e tukuna, na ka e cakava, kei na ivakarau ni lomana. Eda na “vakasamataki koya vinaka” nida dikeva na va na ivola qori. (Iper. 12:3) Eda na raica kina na weniyavana. Nida vulica gona na Kosipeli, eda na kilai Jisu vinaka. Ena rawa gona nida muria voleka na weniyavana.

12. Na cava meda cakava me yaga vakalevu vei keda na Kosipeli?

¹² Me yaga vakalevu vei keda na Kosipeli, e sega ni vinakati meda wilika wale ga. E bibi me tiko na gauna meda vulica kina vakavinaka qai vakasamataka vakatitobu. (Vakatauvatana Josua 1:8, ivakamacala e ra.) Meda veivosakitaka mada qo e rua na vakatutu ena vukei keda meda vakasamataka vakatitobu na Kosipeli qai muria na ka eda wilika.

13. E rawa ni bulabula vakacava nomu wilika na itukutuku ena Kosipeli?

¹³ Kena imatai, me bulabula sara ga nomu wilika na Kosipeli. Raitayaloyalotaka na ka o wilika tiko me vaka sara ga o raica, rogoca, se vakila. O na rawa ni cakava qori ena nomu vakekeli ena ivola e vakarautaka na isoqosoqo i Jiova. Mo dikeva vinaka na ka e vakamacalataki kina, na veika era yaco e liu, se tarava. Saga mo kila e levu tale na itukutuku me baleti ira na tukuni kina se vanua e cavuti. Oti qai vakatauvatana na itukutuku qori kei na so tale na itukutuku ena Kosipeli era tautauvata. Ena so na gauna na itukutuku bibi e volai ena dua na Kosipeli, ena sega ni volai ena dua tale na wase ni Kosipeli.

14-15. Eda na muria vakacava na ka eda vulica ena Kosipeli?

 ¹⁴ Kena ikarua, muria na ka o vulica ena Kosipeli. (Joni 13:17) Ni o vulica oti e dua na itukutuku ena Kosipeli, mo taroga: ‘Dua na ka au vulica eke ena yaga ena noqu bula? Au na vakayagataka vakacava qo meu vukea kina e dua tale?’ Vakasamataka mada e dua, ena gauna veiganiti qai maqosataka nomu wasea vua na tikina qori, mo cakava tale ga ena yalovinaka.

¹⁵ Meda veivosakitaka mada e dua na ivakaraitaki eda na muria kina na vakatutu qori. Eda na dikeva na nona ivakaraitaki na yada dravudravua a raica o Jisu ena valenisoro.

16. Vakamacalataka na ka e volai ena Marika 12:41.

¹⁶ Me bulabula nomu wiliwili. (Wilika Marika 12:41.) Raitayaloyalotaka mada na ka e yaco tiko. Qo na Naisani 11, 33 G.V., sa vo ga e vica na siga me mate o Jisu. E veivakavulici tiko o Jisu ena valenisoro ena siga qori. Era tusaqati koya tiko na iliuliu ni lotu. Eso vei ira era tarogi koya se lewa i cei e cakava tiko kina nona cakacaka. Eso tale era vakatovolei koya ena taro dredre. (Mari. 11:27-33; 12:13-34) Qo sa tiko o Jisu ena dua tale na yasa ni valenisoro. Kena irairai ni tiko ena nodra Rara na Marama, e rawa ni raica kina na katonicau e lalaga. E dabe qai vakaraici ira na lewenivanua nira biuta nodra cau ena kato. E raica e levu na vutuniyau era biuta e levu na ilavo. De dua e dabe voleka sara tiko ga qai rogoca na kena rogo levu na taqiri ni nodra ilavo era biuta ena kato.

17. Na cava e cakava na yada dravudravua e tukuni ena Marika 12:42?

¹⁷ Wilika Marika 12:42. Oti vakalailai qori, e raica sara o Jisu e dua na yalewa. Qo e dua na “yada dravudravua,” e sega ni levu na ka e taukena. (Luke 21:2) E dredre dina na nona bula, e rairai lailai tale ga na nona ilavo me volia na ka me bula kina. Ia e gole ena katonicau me biuta lo e rua na ilavo lailai sara, sega mada ga ni rogo na kena taqiri. E kila vinaka o Jisu na levu ni ka e biuta, e rua na ilavo lailai sara e vakayagataki tiko ena gauna ya e kilai me lepta. Na ilavo qori e sega mada ga ni rauta e dua na siparo, ya e dua vei ira na manumanuvuka sau lailai duadua e dau volitaki me laukana.

18. Me vaka e tukuni ena Marika 12:43, 44, na cava e tukuna o Jisu ena cau ni yada dravudravua?

¹⁸ Wilika Marika 12:43, 44. E qoroya vakalevu o Jisu na yada dravudravua. E mani kacivi ratou mai na nona tisaipeli qai vakaraitaka vei ratou na ka e cakava na yada, e kaya: “Vei ira kece na mai biu ilavo . . . e levu duadua na kena e biuta na yada dravudravua qo.” E qai vakamacalataka tarava: “Nira biuta [na vutuniyau] na ivovo ni nodra ilavo, ia na yada qo e biuta na qavuna e toka vua, na ka sara ga me bula kina.” Ni biuta na yada yalodina qo na ivovo ni nona ilavo ena siga ya, e nuitaki Jiova vakatabakidua me vukei koya.—Same 26:3.

19. Na cava eda vulica ena vosa i Jisu me baleta na yada dravudravua?

¹⁹ Muria sara na ka o vulica. Mo taroga, ‘Na cava au vulica ena vosa i Jisu me baleta na yada dravudravua?’ Vakasamataki koya mada na yada. E rairai vinakata me solia tale e levu na ka vei Jiova. Ia e cakava ga na ka e rawata, e solia vei Jiova na nona vinaka. E kila tale ga o Jisu ni  nona cau e talei ena mata i Tamana. Na cava eda vulica vua? E marautaka o Jiova nida solia na noda vinaka, e vu mai lomada da qai cakava ena noda vinaka taucoko. (Maciu 22:37; Kolo. 3:23) E marau o Jiova ni raica nida solia tiko na noda vinaka! Qo e dusia tale ga na levu ni gauna kei na kaukaua eda vakayagataka ena noda sokalou, me vaka na cakacaka vakaitalatala kei na soqoni.

20. O na muria vakacava na veika o vulica me baleta na yada? Tukuna e dua na kena ivakaraitaki.

²⁰ O na muria vakacava na veika o vulica me baleta na yada? Vakasamataka eso era na rairai vinakata tu me tukuni vei ira ni marautaka o Jiova na nodra sasaga. Kena ivakaraitaki, o kila e dua na tacida yalewa itabaqase, e rairai rarawa se beci koya, e sega ni bulabula se me kaukaua ni vakaitavi ena cakacaka vakavunau me vaka e liu? Se dua na tacida tagane e tauvimate bibi, e mosi tu ga qai yalolailai ni sega ni tiko rawa ena soqoni kece ena Vale ni Soqoni? Mo uqeti ira ni o tukuna na veika ‘vinaka e veivakayaloqaqataki.’ (Efeso 4:29) Tukuna vei ira na veika eda vulica ena nona ivakaraitaki veiuqeti na yada dravudravua. Nomu veivakayaloqaqataki era na nuidei kina ni marautaka o Jiova na noda solia vua na noda vinaka kece. (Vkai. 15:23; 1 Ces. 5:11) Ni o vakacaucautaki ira ena nodra sasaga, se mani vakacava na kena lailai, o sa vakatotomuria tiko na weniyava i Jisu.

21. Na cava o vakadeitaka mo cakava?

²¹ Eda vakavinavinaka ni tu ena Kosipeli e levu na itukutuku ni bula i Jisu e rawa nida vakatotomuria, meda muria voleka na weniyavana! O rawa ni okata qori ena nomu vuli vakataki iko se Sokalou Vakavuvale. Me yaga vakalevu na vuli qori, e bibi me bulabula noda wiliwili, meda muria sara na ka eda vulica. Me ikuri ni noda vakatotomuria na ka e cakava o Jisu, e vinakati tale ga meda muria na ka e tukuna. Eda na veivosakitaka ena ulutaga e tarava na ka eda vulica ena iotioti ni ka e tukuna o Jisu ni bera ni mate.