E raica o María, Raúl, Arne, kei na so tale ni masu e dua na iloloma talei. Era kila ni gauna era masu kina, era na rawa ni vosa vua na Kalou, vakavinavinakataki koya, qai kerea nona veivuke. Era vakabauta ni dina na ka e tukuna qo na iVolatabu me baleta noda masu vua na Kalou: “Ena levu ni noda nuitaki koya, eda kila se cava ga eda kerea me salavata kei na lomana, ena rogoci keda o koya.”—1 Joni 5:14.

Ia e levu tale era sega ni vakabauta na ka e kaya na iVolatabu me baleta na masu. Kena ivakaraitaki, qo na ka e nanuma tu o Steve me baleta na masu: “Gauna au yabaki 17 kina, ratou mate vakacalaka e tolu noqu itokani, e dua e  laucoqa, e rua tale rau luvu.” Cava e qai cakava o Steve? E kaya, “Au masu vua na Kalou niu via kila se cava na vuna e yaco kina ya, ia e sega ni saumi noqu masu. Au vakasamataka gona, ‘Se cava na yaga ni masu?’” Levu era nanuma ni sega ni saumi nodra masu, ya na vuna era sa sega kina ni via masu.

Ia e tiko eso tale na vuna era sa vakawalena kina e levu na masu. Eso era nanuma ni sa sega ni yaga na masu ni Kalou e kila kece na ka, e kila tale ga na ituvaki dredre eda sotava.

Eso tale era nanuma ni sega ni via rogoca na Kalou na nodra masu ena vuku ni nodra cala makawa. Kena ivakaraitaki, e kaya o Jenny: “Dua na leqa e dau tarai au vakalevu na noqu nanuma niu tawayaga. Au rarawataka e levu na ka au dau cakava tu eliu, au nanuma gona ni Kalou ena sega sara ga ni via rogoci au.”

Na cava na nomu rai me baleta na masu? Ke dau va tale tu ga qori nomu rai se o vakatitiqataka na yaga ni masu, ena rawa ni vakacegui iko na ka e tukuna iVolatabu. Ni tu kina e levu na itukutuku nuitaki me baleta na masu, * ena rawa tale ga ni sauma eso na taro va qo:

• E dau rogoca na Kalou na noda masu?

• Na cava e sega ni rogoci kina eso na masu?

• Na cava mo cakava me rogoci kina na nomu masu?

• Ena yaga vakacava vei iko na masu?