Eda na Lomani Ira Vakacava na Wekada?
Nida kawa i Atama, eda lewe ni dua ga na vuvale. E dodonu mera veilomani qai veidokai na lewe ni vuvale, ia sa sega ni laurai qori nikua. Qori na ka e sega ni vinakata noda Kalou dauloloma.
KA E KAYA NA IVOLATABU ME BALETA NA LOLOMA
‘Mo lomana na wekamu me vaka nomu lomani iko.’—VUNAU NI SORO 19:18.
“Lomani ira tiko ga na kemudou meca.”—MACIU 5:44.
IBALEBALE NI NODA LOMANI IRA NA WEKADA
Dikeva na ka e kaya na Kalou me baleta na loloma ena 1 Korinica 13:4-7:
“Na loloma e vosovoso qai yalovinaka.”
Vakasamataka mada: Cava o vakila ni dua e vosovoso qai yalovinaka vei iko, e sega tale ga ni cudruvaka nomu cala?
“Na loloma e sega ni vuvu.”
Vakasamataka mada: Cava o vakila nira kasamitaki iko vakasivia eso tale se vuvutaki iko?
Na loloma “e sega ni kauaitaka ga na ka e baleti koya.”
Vakasamataka mada: Cava o vakila nira doka nomu rai eso tale ra qai sega ni usuraka na nodra nanuma?
Na loloma e “sega ni katona na ca.”
Vakasamataka mada: E tu vakarau na Kalou me vosoti ira na veivutunitaka nodra ivalavala ca. “E sega ni dau vaqara cala o koya, se cudru tiko me tawamudu.” (Same 103:9) Eda dau marautaka ni vosoti keda e dua eda vakacudruya. Meda tu vakarau tale ga ni vosoti ira na vakacudrui keda.—Same 86:5.
Na loloma “e sega ni marautaka na ka e sega ni dodonu.”
Vakasamataka mada: Eda sega ni taleitaka mera marautaka eso tale na ka ca eda sotava. Eda na sega gona ni marautaka na ka ca era sotava eso tale ke ra dau vakalolomataki keda mada ga.
E dodonu gona meda lomani ira eso tale se vanua cava era cavutu mai kina me rawa ni vakalougatataki keda na Kalou. Dua na sala eda na cakava kina qori noda vukei ira na vinakata tu na veivuke.
