▪ Nida solia wale na ivola kei na vidio vakaivolatabu, era nanuma kina eso ni donu mera lavetaka se kopitaka qori ena so tale na site se sala ni veikilai ena Internet. Ke da cakava qori, sa na beci kina na Ka Vakalawa * me baleta na vakayagataki ni noda website, rawa tale ga ni vakavu leqa vakalevu. Me baleta na vakayagataki ni noda website, qo na ka e vakamacalataki ena ka vakalawa, ni sega ni dodonu vua e dua me “biuta eso na ka mai na website qo ina dua tale na vanua ena Internet (se mani website cava, wasei ni itukutuku se so tale na ka, se sala ni veitaratara eso ena Internet).” Na cava e bibi kina na vakatatabu qori?

Na ka kece e biu ena noda website e tabu ni vakayagataki vakailoa. Era dau via vakayagataka na vukitani kei ira na dauveitusaqati na ivola kei na vidio vakaivolatabu mera rawai keda kina kei na so tale ena nodra website. Na inaki ni site qori mera vakatitiqataka kina na dauwiliwili na veika era wilika. (Same 26:4; Vkai. 22:5) Eso tale era vakayagataka na veika e tabaki ena noda website se ivakatakilakila ni jw.org ena nodra itukutuku ni veivoli, ena iyaya me volitaki, kei na porokaramu ena iyaya vovou. Nida doka na veika e vauci ena kena tabu ni vakayagataki vakailoa kei na ivakatakilakila, ena taqomaki kina vakalawa na kena vakayagataki vakatawadodonu. (Vkai. 27:12) Ia ke da vakalaiva mera vakayagataka eso se ira na tacida na veika e vakarautaka na isoqosoqo ra qai biuta ena so tale na site, se vakayagataka na ivakatakilakila ni jw.org mera volitaka kina nodra ivoli, ena rairai sega ni tokoni keda na mataveilewai nida saga meda tarovi ira na dauveitusaqati kei ira na daunibisinisi.

 E vakarerevaki meda lavetaka noda ivola mai na so tale na vanua. O Jiova e lesia duadua na “dauveiqaravi yalodina e vuku” me vakarautaka na kakana vakayalo. (Maciu 24:45) E tiko ga na website vakadonui e vakayagataka na “dauveiqaravi” me wasei kina na kakana vakayalo me vaka na www.dan124.com, tv.dan124.com, kei na wol.dan124.com. E tolu tale ga na porokaramu vakadonui, na JW Language®, JW Library®, kei na JW Library Sign Language®. Eda nuidei ni porokaramu qori e galala mai na itukutuku ni veivoli se vakadukadukalitaki ena vuravura i Setani. Ke da lavetaka na kakana vakayalo mai na dua tale na vanua, e dredre meda vakadeitaka ni veisau eso na ka se vakadukadukalitaki.—Same 18:26; 19:8.

Ni biu tale ga na ivola se vidio ena so tale na website era vakamacala kina eso, e rawarawa sara nira vakaraitaka kina na vukitani kei ira na dauveivakadiloi nodra sega ni nuitaka na isoqosoqo i Jiova. Era rawai eso na tacida mera vakaitavi ni veivosakitaki eso na ulutaga ena Internet, qori e beci ga kina vakalevu na yaca i Jiova. Me nanumi ni qori e sega ni vanua mera ‘vakavulici kina ena yalomalua o ira na talaidredre.’ (2 Tim. 2:23-25; 1 Tim. 6:3-5) E laurai tale ga ni buli eso na itukutuku se website qai vakayagataki kina na yaca ni isoqosoqo, iLawalawa Dauvakatulewa, kei ratou na lewena. Me nanumi, ni sega ni dua na lewe ni iLawalawa Dauvakatulewa e tiko nona Web page se dau sema ena sala ni veitaratara ena Internet.

Nida dusimaki ira na lewenivanua mera rai ga ena jw.org, e vakatetei kina na “itukutuku vinaka.” (Maciu 24:14) Na iyaya vovou eda vakayagataka ena cakacaka vakaitalatala e se vakavinakataki tiko. Eda vinakata me yaga vei ira kece na vakayagataka. Koya gona, me vaka e vakamacalataki ena Ka Vakalawa, o rawa ni vakauta vua e dua na ilavelave se vakauta vua na link me raica kina na ivola se so tale na ka ena jw.org. Nida dusimaki ira na tataleitaki ena noda website vakadonui, eda sa vagolei ira tiko vua e lesi me vakarautaka na kakana vakayalo, “na dauveiqaravi yalodina e vuku.”