ERAU taubale tiko e rua na goneyalewa ena dua na yalava ni bisinisi ena siti o Baguio, ena Yatu Filipaini. Erau raica sara e dua na qiqi ni vunau e matanalevu, ia erau sega ni lako kina. E matadredredre mai vei rau o Helen, e dua na tacida yalewa e duri volekata tiko na qiqi. Erau tomana sara na nodrau igolegole, ia erau taleitaka na nona matadredredre vei rau o Helen.

Ni rau vodo basi me rau lesu i vale, rau raica sara e dua na ivakatakilakila ni jw.org ena Vale ni Soqoni. Rau liaca sara ni rau raica tale ga na ivakatakilakila qori ena qiqi ni vunau. Rau mani sobu me rau raica na nodra gauna ni soqoni na duidui ivavakoso e toka ena matamata ni Vale ni Soqoni.

Erau mani tiko ena dua na gauna ni soqoni qori. Ni rau curu ga yani, erau raici Helen sara. Erau kilai koya ni a matadredredre vei rau. E kaya o Helen, “Au lomaleqa vakalailai ni rau lako yani vei au. Au nanuma deu cakava e dua na ka ca.” Ia erau qai vakamacalataka vei Helen ni rau a raici koya ena qiqi.

Erau marautaka na goneyalewa qori na soqoni kei na veimaliwai, rau sega ni vaka na vulagi. Nira sasamaki na mataveitacini ni oti na soqoni, erau kerea tale ga me rau veivuke. E dua vei rau sa biuta na Yatu Filipaini, e dua tale sa tekivu soqoni, sa tekivu vuli iVolatabu tale ga. E yaco na ka kece qori ena vuku ga ni nona matadredredre e dua na tacida!