O IRA na dauvola iVolatabu era dau cavuta vakavica eso na matavosa ena iVolatabu. Dikeva mada e tolu na vuna era rairai cakava kina qori:

Na gauna e volai kina. Levu e Isireli makawa e sega na nodra ilavelave ni Lawa. Era dau rogoca ga ni wiliki na Lawa nira soqoni vata ena valeniveitavaki. (Vkru. 31:10-12) Kena irairai nira na vakawelei nira vakarorogo tiko ra qai duri tu vakalewe levu me dua na gauna balavu. (Niem. 8:2, 3, 7) Ena gauna va qori, ena tokaruataki na matavosa bibi mera nanuma kina na tikinivolatabu, mera muria tale ga. Kena tokaruataki qori era na nanuma vinaka kina eso na tikina bibi ena lawa e vinakata o Jiova mera rogoca.—Vunau 18:4-22; Vkru. 5:1.

Na ivakarau ni volavola. Eso na wase ni iVolatabu e tu kina na sere, me vaka na ivola na Same, Sere i Solomoni, kei na Lele i Jeremaia. Eso na sere qori e tokaruataki mera nanuma vinaka na vakarorogo tiko. Kena ivakaraitaki na Same 115:9-11: “Kemuni na Isireli, ni nuitaki Jiova—E dau vukei ira qai nodra isasabai o koya. Kemuni na mataqali i Eroni, ni nuitaki Jiova—E dau vukei ira qai nodra isasabai o koya. Kemuni na rerevaki Jiova, ni nuitaki Jiova—E dau vukei ira qai nodra isasabai o koya.” E macala ni nodra tokaruataka va qori na daulagasere na matavosa, era tugana kina e lomadra kei na nodra vakasama na ka dina.

E vakamatatataka na tikina bibi. Eso na gauna era dau tokaruataka na dauvola iVolatabu na matavosa bibi. Kena ivakaraitaki, ni vakaroti ira na Isireli o Jiova mera kua ni kania na dra, e tukuna vei Mosese me tokaruataka vakavica vata. E vinakata na Kalou me vakabibitaka ni tiko ena dra na bula ni kabula. (Vunau 17:11, 14) Dua na gauna e muri nira vola na yapositolo kei ira na qase e Jerusalemi na ka ena vakacudruya na Kalou, era vakabibitaka tale mera vakatabui ira mai na dra.—Caka. 15:20, 29.

E sega ni kena ibalebale qori meda tokaruataka eso na matavosa ena iVolatabu, ni sega ni inaki i Jiova. Kena ivakaraitaki e tukuna o Jisu: “Ni o masu, kua ni cavuta tiko ga e dua na qaqanimasu.” (Maciu 6:7) Oti sa qai tukuna eso na ka meda dau masulaka me salavata kei na inaki ni Kalou. (Maciu 6:9-13) Koya gona, nida sega ni tokaruataka eso na matavosa ena noda masu, se rawa tiko ga nida tokaruataka vakavica e dua na tikina bibi eda masulaka tiko.—Maciu 7:7-11.

E tiko na vuna vinaka e tokaruataka kina na Vosa ni Kalou eso na vosa kei na matavosa. Qori e dua na iwalewale e vakavulici keda kina na Dauniveivakavulici Levu meda vinaka kina.—Aisea 48:17, 18.