1, 2. Na cava era vakila nikua na dauveiqaravi ni Kalou? (Raica na imatai ni iyaloyalo.)

LEVU na vuniwai era qaravi ira na tauvi matedewa. Era via veivuke, ia era qaqarauni me kua ni dewavi ira. E va tale ga qori nikua, levu era vakaitikotiko se cakacaka kei ira era vakaitovotaka na ivakarau e sega ni vakalou. Qo e ka ni sasaga.

² Sa qai torosobu ga na itovo ena iotioti ni veisiga qo. E vakamacalataka na yapositolo o Paula ena ikarua ni nona ivola vei Timoci na nodra ivalavala se itovo o ira na yawaka na Kalou. Ena qai laurai levu ga qori ena gauna sa tu qo e matada. (Wilika 2 Timoci 3:1-5, 13.) De dua ena votivoti vei keda, ia eda na rawa ni rawai ena itovo kei na nodra ivakarau ni rai. (Vkai. 13:20) Eda na veivosakitaka ena ulutaga qo na kena veibasai na itovo era vakaitovotaka e levu ena iotioti ni veisiga qo kei na nodra itovo na dauveiqaravi ni Kalou. Eda na vulica tale ga na sala meda taqomaki keda kina me kua nida rawai ena itovo ca nida veivuke tiko vakayalo.

3. O cei era vakaitovotaka na itovo e vakamacalataki ena 2 Timoci 3:2-5?

 ³ E vola na yapositolo o Paula: “Ni na duatani sara na iotioti ni veisiga, ena vakilai kina e levu na ka dredre.” E qai vola tarava e 19 na itovo ca era na vakaitovotaka e levu ena gauna qo. Qori e tautauvata kei na itovo e volai ena Roma 1:29-31. Na ka e vakamacalataki ena nona ivola vei Timoci, e volai kina na itovo e sega ni laurai ena dua tale na ivola ena iVolatabu vaKirisi. E vola o Paula na itovo ca qai tekivuna ena matavosa ‘o ira na tamata era na dau . . . ’ Na vosa “tamata” e dusi ira na “lewenivanua,” wili kina na tagane kei na yalewa era vakaitovotaka qori. E sega ni dusi ira na lewenivanua kece. Ia e duidui na nodra itovo na lotu vaKarisito.—Wilika Malakai 3:18.

4. O na vakamacalataki ira vakacava na dokadoka?

⁴ Ni cavuta oti o Paula nira na lomani ira ga e levu, era na lomana na ilavo, e vola tale ga nira na dau tukutukuni ira, qaciqacia, era na dokadoka. E laurai ena nodra itovo nira via uasivi ira na kena vo ena ka era rawata, kedra irairai, iyau, se itutu. Dua na ka nodra vinakata mera dokai se qoroi kina. E vola e dua na vuku me baleti koya e dau va qori: “E tiko e lomana e dua na icabocabonisoro lailai me dau cuva kina.” Era kaya eso ni sega ni taleitaki na itovo na dokadoka. O ira mada ga na dau dokadoka era vuvu nira raica na itovo qori vei ira eso tale.

5. Era rawai vakacava ena dokadoka o ira na yalodina?

⁵ E sevaka o Jiova na dokadoka. E cata na “mata viavialevu.” (Vkai. 6:16, 17) Ni vakadredretaka na itovo qori meda torova na Kalou. (Same 10:4) E itovo ni Tevoro. (1 Tim. 3:6) Ka ni rarawa nira rawai kina eso na dauveiqaravi ni Kalou. Kena ivakaraitaki o Usaia na tui Juta. A yalodina tu me vica vata na yabaki. “Ia” e kaya na iVolatabu, “ni kaukaua ga o koya, e qaciqacia mai na lomana me leqa kina, e sega ni yalodina vei Jiova na nona Kalou ni curu ena valenisoro i Jiova me vakama na ka boivinaka ena icabocabo ni ka boivinaka.” E rawai tale ga o Tui Esekaia ena qaciqacia, ia ena dua ga na gauna lekaleka.—2 Vei. 26:16; 32:25, 26.

6. Vakacava a rawa ni dokadoka o Tevita? Na cava e yalomalumalumu tiko ga kina?

⁶ Eso tale era dokadokataka na kedra irairai, irogorogo, kenadau ena ivakatagi, kaukaua, se itutu. Na ka kece qori e kilai kina o Tevita, ia e yalomalumalumu tiko ga ena nona bula taucoko. Ni vakamatei Koliaci oti o Tevita, a soli vua na luvei Tui Saula me watina, e kaya: “O cei o yau, o cei o ira na wekaqu, na vuvale i tamaqu e Isireli meu vugona na tui?” (1 Sam. 18:18) Na cava e uqeti Tevita me yalomalumalumu tiko ga? E kila ni ka vinaka kece e taukena e solia vua o Jiova. Nona itovo, ka e rawata, kei na itavi e lesi vua, e rawa ga qori ni “cuva sobu” na Kalou se yalomalumalumu me kauaitaki koya.—Same 113:5-8; vakatauvatana 1 Korinica 4:7.

7. Na cava ena uqeti keda meda yalomalumalumu?

⁷ Era vakatotomuri Tevita na tamata i Jiova nikua nira vakaraitaka na yalomalumalumu. Eda qoroqoro ga nida kila ni dau yalomalumalumu na Kalou o Jiova, na Turaga Cecere Duadua ni lomalagi kei na vuravura. (Same 18:35) Meda nanuma matua na ivakasala qo: “Moni vakaisulu ena yalo ni veikauaitaki  dina, yalololoma, yalomalumalumu, yalomalua, kei na vosovoso.” (Kolo. 3:12) Eda kila tale ga ni loloma e “sega ni tukutukuni koya, e sega ni dokadoka.” (1 Kor. 13:4) Nida dau yalomalumalumu, era na via kilai Jiova e levu. Me vaka ga na kena rawa ni veisautaki ira na tagane vakawati na nodra itovo vinaka na watidra, era na via toro voleka vua na Kalou eso tale nira raica nodra yalomalumalumu na nona tamata.—1 Pita 3:1.

8. (a) E raici vakacava nikua nodra talaidredre na gone vei rau na itubutubu? (b) Cava e vakaroti ira kina na gone na iVolatabu?

⁸ E vakamacalataka o Paula na ivakarau ni bula ena iotioti ni veisiga qo. E vola ni o ira na gone era na talaidredre vei ira nodra itubutubu. Ena so na gauna e vakaraitaki se uqeti vakalevu na itovo qori ena iyaloyalo, ivola, kei na porokaramu ni tivi ena gauna qo. Ia na talaidredre ena sega ni dei kina na vuvale. Sa balavu sara na kena kilai voli mai na ivakavuvuli qo. Kena ivakaraitaki e Kirisi makawa, ena kau tani na nona dodonu vakalewenivanua o koya e mokuti rau na nona itubutubu. Ena lawa ni Roma, o koya e mokuti tamana e tautauvata ga kei na laba. Koya gona e vakaroti ira na gone na iVolatabu mera rokovi ira na nodra itubutubu.—Lako 20:12; Efeso 6:1-3.

9. Na cava ena uqeti ira na gone mera talairawarawa vei rau na itubutubu?

⁹ Nira vakasamataka na gone na ka era cakava na nodra itubutubu ena vukudra, era na qarauna mera kua ni rawai ena yalo ni talaidredre. Era na vakavinavinaka ga vakalevu nira kila ni vinakata o Jiova, na Tamada kece mera talairawarawa. Nira talanoataka na veika vinaka me baleta nodra itubutubu, ena uqeti ira na vo ni gone me donu nodra rai me baleta nodra itubutubu. Macala ga ke ra sega ni vakaraitaka na itubutubu vei luvedra na veilomani vakaveiwekani, ena dredre mera talairawarawa mai vu ni lomadra. Ia ni kila na gone ni lomani koya dina na nona itubutubu, ena uqeti tale ga me vakamarautaki rau ni temaki mada ga me talaidredre. E kaya o Austin: “So na gauna au nanuma ni na sega ni kilai na ka au cakava, ia rau dau vakamacalataka vinaka noqu itubutubu na idusidusi kei na vuna rau biuta kina eso na lawa, keitou dau veivosaki tale ga. E vukei au meu dau talairawarawa. Au raica ni rau kauaitaki au dina, au via vakamarautaki rau tale ga.”

10, 11. (a) Na itovo cava e laurai kina nodra sega ni dau veilomani e levu? (b) Ena vakacava na rabailevu ni noda loloma na lotu vaKarisito dina?

¹⁰ E vola tale o Paula eso na itovo ca e laurai kina nira sega ni dau veilomani e levu. Sa rauta me veitaravi na sega ni vakavinavinaka kei na “talaidredre vei ira nodra itubutubu” ni dusia na nodra itovo o ira na sega ni dau vakavinavinaka. Era na sega ni yalodina. Era na sega ni via okati ena dua na veiyalayalati, e dusia na nodra yalodredre mera veiyaloni. Era na dau veibeci, era na dau veiliumuritaki, era na dau vosavakacacataka eso tale, vaka kina na Kalou. Era na dau vakauvosa, nira kaseta e dua me rogo ca kina. *

¹¹ Levu nikua era sega ni dau veilomani, ia o ira na sokaloutaki Jiova era  vakaraitaka na veilomani dina. Sa vakadinadinataki qori. E kaya o Jisu ni mataqali loloma na a·ga’pe, ya noda lomana na kainoda e ikarua ni ivakaro levu duadua ena Lawa e vola o Mosese, e veitaravi ga kei na noda lomana na Kalou. (Maciu 22:38, 39) E tukuna tale ga o Jisu nida kilai tani na lotu vaKarisito dina ena noda dau veilomani. (Wilika Joni 13:34, 35.) Eda na vakaraitaka mada ga na loloma qori vei ira na keda meca.—Maciu 5:43, 44.

12. E vakaraitaka vakacava o Jisu na loloma?

¹² Dua na ka na loloma e vakaraitaka o Jisu. E lako ina veikoro me kacivaka na itukutuku vinaka ni Matanitu ni Kalou. E vakabulai ira na mataboko, lokiloki, vukavuka, didivara, kei ira na mate. (Luke 7:22) E levu era cati koya, ia e solia mada ga nona bula ena vukuda. E ucui Tamana vinaka o Jisu ena nona dauloloma. Eda vakaraitaka gona na iVakadinadina i Jiova na loloma qori e veiyasa i vuravura.

13. Ena veiuqeti vakacava na noda loloma mera qaravi Jiova kina eso tale?

¹³ Na loloma eda vakaraitaka ena uqeta eso tale mera kila na Tamada vakalomalagi. Kena ivakaraitaki e dua na turaga ni Tailadi. E uqeti koya na nodra veilomani na tacida ena dua na soqo ni veiwasewase. Ni lesu i nodratou, a kerea me vulica vakarua na iVolatabu e veimacawa. E vunau vei ira kece na wekana, oti tale e ono na vula, sa vakaitavi ena wili iVolatabu ena Vale ni Soqoni. E bibi meda kila na ivakarau ni noda loloma, nida taroga: ‘Au sa saga tiko meu vukei ira noqu vuvale, ena ivavakoso, kei ira ena yalava? Au saga meu raici ira ena rai i Jiova?’

14, 15. Na itovo vakamanumanu cava era dau vakaraitaka e levu, ia era veisau vakacava?

¹⁴ Eso tale na itovo e laurai nikua ena vinakati sara ga kina vei keda na lotu vaKarisito meda yawaki ira na vakaitovotaka. O ira na tawavakabauta era na  sega ni vinakata na ka dodonu, se tukuni ena so tale na vakadewa nira “cata na ka vinaka” se “sevaka na ka vinaka kece.” Era na sega ni lewa vinaka na yalodra, era na voravora. Eso tale era na domoqa, se vakatulewa vakariri se vakaveitalia.

¹⁵ Era sa veisau na dau vakaitovotaki ira ena itovo vakamanumanu va qori. Sa tukuni makawa tu ena iVolatabu na veisau qori. (Wilika Aisea 11:6, 7.) Eda wilika kina na nodra veilomani na manumanu kila me vaka na olifa kei na laione, kei na manumanu manoa me vaka na lami kei na luvenibulumakau. Ena yaco dina na bula vakacegu “ni na robota na vuravura na kilaka me baleti Jiova.” (Aisea 11:9) Nira sega ni vulica rawa na manumanu na veika me baleti Jiova, kena ibalebale ni dusi keda na tikinivolatabu qo.

16. E veisautaka vakacava na iVolatabu na nodra itovo e levu?

¹⁶ Levu tale era dau voravora e liu me vaka na olifa, ia era sa veiyaloni nikua. E tiko na kedra italanoa ena ulutaga “E Veisautaka na Bula na iVolatabu” ena jw.org. Era duatani o ira na kilai Jiova ra qai qaravi koya, ni vakatauvatani kei ira na vakarairai ga na nodra qarava na Kalou, e sega vei ira na kena dina. O ira na dau voravora e liu, era sa “tokara na tamata vou e buli me vaka na loma ni Kalou e vauci kina na yalodina kei na yalododonu.” (Efeso 4:23, 24) Nira vulica na veika me baleta na Kalou, era kila ni vinakati mera muria na nona ivakatagedegede. Era uqeti mera veisautaka nodra vakabauta, rai, kei na itovo. E ka ni sasaga mera veisau, ia era veisau rawa ga ena veidusimaki ni yalo tabu, ni dau tokoni ira na via vakayacora na loma ni Kalou.

17. Na cava eda na cakava meda kua ni rawai ena itovo ca?

¹⁷ Sa qai kilai levu ga na kedra duidui o ira na qarava na Kalou kei ira na sega ni qaravi koya. E bibi meda qarauna o keda na qarava na Kalou me kua nida rawai ena itovo tawadodonu. E ka vakayalomatua meda muria na ivakasala vakalou meda lako tani mai vei ira e vakamacalataki ena 2 Timoci 3:2-5. E macala ni dredre meda lako tani vakadua vei ira e ca nodra itovo. De dua eda cakacaka vata kei ira, vuli vata, se tiko kei ira. Ia meda qarauna me kua ni takavi keda na nodra rai kei na ivakarau. Eda na cakava qo nida vaqaqacotaka noda vakabauta nida vulica na iVolatabu da qai maliwai ira era vakadeitaka mera qaravi Jiova.

18. Ena yaga vakacava na noda vosa kei na itovo?

¹⁸ Meda saga tale ga ni vukea eso tale. Qara na gauna meda vunau kina, meda masuti Jiova me vukei keda meda tukuna na ka dodonu ena gauna veiganiti. Meda vakaraitaka nida iVakadinadina i Jiova. Na noda itovo vinaka ena vakalagilagi kina na Kalou, ia eda na sega ni qoroi kina. Eda vakavulici meda “biuta na ka kece e sega ni salavata kei na loma ni Kalou kei na gagadre ca vakavuravura, e vakavulici keda tale ga meda yalomatua, meda yalododonu, meda qarava na Kalou nida tu ena vuravura qo.” (Taito 2:11-14) Ni vinaka na noda itovo, era na raici keda eso ra qai kaya: “Keitou via lako vata kei kemudou, ni keitou rogoca ni tiko vata kei kemudou na Kalou.”—Saka. 8:23.