1. Me vakataki Tui Tevita, na cava e rawa nira taroga eso vei keda?

EDA vinakata meda vakila na vakacegu ena noda bula. E sega ni dua e via nuiqawaqawa. Ia eda na rawa ni nuiqawaqawa ena so na gauna. E rawa sara mada ga nira taroga na dauveiqaravi i Jiova na taro vata ga e tarogi Jiova kina o Tui Tevita: “Ena vakacava na dede ni noqu nuiqawaqawa, ni rarawa voli na lomaqu e veisiga?”—Same 13:2.

2. Na cava eda na veivosakitaka ena ulutaga qo?

² E macala nida na nuiqawaqawa ena so na gauna, ia eda rawa ni cakava eso na ka me vakalailaitaka. Eda na veivosakitaka ena ulutaga qo eso na ka ena rairai vakavuna meda nuiqawaqawa. Eda na qai veivosakitaka e ono na vakatutu yaga meda vakila tiko ga na vakacegu nida sotava na veika dredre.

3. Na cava eso na veika dredre eda sotava? Vakacava eda na lewa rawa?

³ De dua eda rawa ni cakava eso na ka ena veika eda nuiqawaqawataka, eso tale eda sega ni lewa rawa. Kena ivakaraitaki, eda sega ni lewa rawa na tubu ni isau ni kakana, isulu, kei na vale e veiyabaki. Eda sega ni lewa rawa na levu ni gauna era saga kina o ira eda vuli vata se cakacaka vata meda lawaki se cakava na itovo vakasisila. Eda sega ni rawa tale ga ni tarova na levu ni basulawa ena noda itikotiko. Eda sotava na veika dredre qori, ni levu e vuravura e sega ni salavata nodra rai kei na ivakavuvuli vakaivolatabu. E kila tu o Setani na kalou ni veika vakavuravura  qo, nira na sega ni qaravi Jiova eso nira ‘nuiqawaqawataka na bula ena gauna qo.’ (Maciu 13:22; 1 Joni 5:19) Sa rauta me yaco tu e vuravura e levu na ka e vakavu nuiqawaqawa!

4. Na cava e rawa ni yaco nida vakasamataka tiko ga na veika dredre?

⁴ Ena rawa sara ga nida lomaleqa vakalevu nida vakasamataka tu ga na veika dredre. Kena ivakaraitaki, eda na rairai leqataka ni na sega ni veirauti na ilavo meda bula kina. Se da leqataka nida na tauvimate qai vakalutu cakacaka, se vakacegui mai na noda cakacaka. De dua eda leqataka tale ga nida na tawayalodina nida temaki meda beca na lawa ni Kalou. Sa na vakarau uqeti ira na nona ito o Setani me ravuti keda na tamata ni Kalou. Eda na rairai leqataka gona na ka eda na cakava ena gauna qori. De dua eda na vaqaqa, ‘E cala meu leqataka eso na ka va qo?’

5. Na cava e vakaibalebaletaka o Jisu ni tukuna: “Dou kua ni lomaocaoca”?

⁵ Eda kila ni a tukuna o Jisu vei ratou na nona imuri: ‘Dou kua ni lomaocaoca.’ (Maciu 6:25) Vakacava e namaka o Jisu nida na sega sara ga ni lomaocaoca? Sega! Eso mada ga na dausokalou yalodina i Jiova ena gauna makawa era lomaocaoca se nuiqawaqawa, ia e vakadonui ira tiko ga o Jiova. * (1 Tui 19:4; Same 6:3) O Jisu e vakayaloqaqataki keda tiko. Ena sala cava? E sega ni vinakata meda lomaocaoca se nuiqawaqawa vakalevu me lai vakawaleni kina noda veiqaravi vua na Kalou. Na cava gona meda cakava ke da lomaocaoca se nuiqawaqawa?—Raica na kato “ Kena iCakacaka.”

6. Me vaka e tukuni ena Filipai 4:6, 7, eda na vakacegui vakacava nida nuiqawaqawa?

⁶ (1) Masu wasoma. Nida lomaocaoca se nuiqawaqawa, meda masu vagumatua vei Jiova qai kerea nona veivuke. (1 Pita 5:7) E rawa ni sauma nomu masu o Jiova ni solia vei iko “na vakacegu ni Kalou e uasivia na vakasama kece [ni tamata].” (Wilika Filipai 4:6, 7.) Ena vakaceguya nomu vakasama o Jiova ni vakayagataka nona igu kaukaua na yalo tabu.—Kala. 5:22.

7. Na cava meda nanuma tiko nida masu vua na Kalou?

⁷ Ni o masu vei Jiova, talaucaka vua na lomamu. Mo tukuna kece vua na ka o lomaleqataka tiko, vakamacalataka vua nomu rai me baleta na leqa qori. Ke rawa ni wali, kerea vua na vuku mo kila na ka mo cakava kei na kaukaua mo cakava sara. Ke o sega ni lewa rawa na leqa qori, kerei Jiova me vukei iko mo kua ni lomaleqataka vakalevu. Ni o tukuna vakamatata vei Jiova na ka o masulaka, ena matata tale ga vei iko na sala e sauma kina o Jiova nomu masu ni toso na gauna. Ke se bera ni o raica na isau ni nomu masu, kua ni soro. E sega ni vinakata wale ga o Jiova mo vakamatatataka na leqa, e vinakata tale ga mo cikecike.—Luke 11:8-10.

8. Na cava meda masulaka?

⁸ Ni o biuta vei Jiova nomu lomaocaoca se nuiqawaqawa, kua ni guilecava mo vakavinavinakataki koya. Ke mani dredre vakacava na ituvaki, e vinaka  meda dau vakasamataka tiko ga na veika eda vakalougatataki kina. Ke dau dredre mo vakamacalataka na ivakarau ni lomamu, nanuma tiko o Jiova ena sauma nomu masu ke o mani tukuna mada ga ‘kerekere moni vukei au!’—2 Vei. 18:31; Roma 8:26.

9. Na cava meda cakava nida lomaleqa?

⁹ (2) Nuitaka na vuku i Jiova, sega ni nomu. Ena ikawalu ni senitiuri B.G.V., era leqataka na lewe i Juta nodra ravuravu na kai Asiria. Era sega sara ga ni vinakata me vakamalumalumutaki ira o Asiria. Era mani kere veivuke ina matanitu lotu butobuto o Ijipita. (Aisea 30:1, 2) E vakasalataki ira o Jiova nira na sotava na leqa ke ra murilomadra mera nuitaki Ijipita. (Aisea 30:7, 12, 13) E qai vakayagataki Aisea o Jiova me tukuna vei ira na lewe i Juta na ka mera cakava nira lomaleqa. E kaya: “Oni na kaukaua ke oni tiko vakacegu, oni vakanuinui tiko” vei Jiova.—Aisea 30:15b.

10. Na cava eso na ituvaki meda vakaraitaka kina noda nuitaki Jiova?

¹⁰ O rawa ni vakaraitaka vakacava ni o vakanuinui tiko vei Jiova? Dikeva e vica na ivakaraitaki. Kaya mada ke soli vei iko e dua na cakacaka saulevu ena kania vakalevu nomu gauna, ena vakaleqa tale ga nomu ituvatuva vakayalo. Se kaya mada e vakaraitaka e dua drau cakacaka vata ni domoni iko, ia e se sega ni papitaiso me qaravi Jiova. Se kaya mada ke dua na lewenivuvale e tukuna vei iko qo: “O yau se na nomu Kalou. O cei o na digia?” E macala ga ni sega ni rawarawa mo vakatulewa ena ituvaki va qori, ia ena dusimaki iko o Jiova ena ka mo cakava. (Maciu 6:33; 10:37; 1 Kor. 7:39) Na taro bibi ga qo, O na nuitaki Jiova qai muria nona veidusimaki?

11. Na ivakaraitaki vakaivolatabu cava eda rawa ni vulica ena vakacegui keda nida tusaqati?

¹¹ (3) Vuli ena ivakaraitaki vinaka kei na ivakaraitaki ca. E tu ena iVolatabu e levu na ivakaraitaki ena bibi ni noda tiko vakacegu da qai nuitaki Jiova. Ni o vulica, dikeva na sala era vakila tiko ga kina na vakacegu na dauveiqaravi i Jiova nira tusaqati vakaukaua. Kena ivakaraitaki, eratou sega ni rere na yapositolo ni vakarota na nodra mataveilewai levu na Jiu me ratou kua tale ni vunau. Eratou tukuna ga ena doudou: “E dodonu me keitou talairawarawa ga vua na Kalou ni iliuliu, sega vua na tamata.” (Caka. 5:29) Eratou sega mada ga ni tavaiyaya ni ratou kuitalaki. Na vuna? Eratou kila ni tokoni ratou tiko o Jiova, e marautaki ratou tale ga. Eratou tomana tiko ga kina nodratou vunautaka na itukutuku vinaka. (Caka. 5:40-42) Ni vakarau vakamatei tale ga o Sitiveni, e lomavakacegu tu ga qai “vaka na mata ni agilosi.” (Caka. 6:12-15) Na vuna? E nuidei ni vakadonui koya o Jiova.

12. Me vaka e tukuni ena 1 Pita 3:14; 4:14, na cava meda marau kina nida tusaqati?

¹² Eratou vakadinadinataka na yapositolo ni tokoni ratou tiko o Jiova. E solia vei ratou na kaukaua me ratou cakamana. (Caka. 5:12-16; 6:8) Ia sa sega ni solia qori o Jiova vei keda nikua. Ke da mani vakararawataki ena vuku ni ka dodonu, e vakadeitaka vei keda o Jiova ena nona Vosa ni marautaki keda, e tiko tale ga kei keda nona yalo tabu. (Wilika 1 Pita 3:14; 4:14.) Meda kua gona ni leqataka na ka eda na cakava  nida tusaqati ena veigauna se bera mai. Ia meda vaqaqacotaka noda vakabauta ena gauna qo ni na tokoni keda o Jiova, ena vakabulai keda tale ga. Me vakataki ira ga na tisaipeli ena gauna e liu, meda nuitaka na yalayala i Jisu: “[Au] na solia vei kemudou na gusu kei na vuku era na sega ni sabaya rawa se veibataka na kemudou meca kece.” E vakadeitaka: “Na nomudou vosota ga dou na vakabulai kina.” (Luke 21:12-19) Kua tale ga ni guilecava ni nanuma vinaka tu o Jiova na veika matailalai me baleti ira na nona dauveiqaravi era yalodina me yacova nodra mate, ena qai vakaturi ira.

13. Ena yaga vakacava noda vulica nodra ivakaraitaki na sega ni lomavakacegu mera nuitaki Jiova?

¹³ Eda rawa ni vuli tale ga vei ira na sega ni lomavakacegu mera nuitaki Jiova. Nida vulica na nodra ivakaraitaki ca, eda na sega sara ga ni via sikalutu ena cala vata ga era cakava. Kena ivakaraitaki, ni se qai tekivu veiliutaki e Juta o Tui Esa, e saga e dua na mataivalu levu me ravuti ira e Juta. E nuitaki Jiova o Tui Esa, e qai vukei koya o Jiova me qaqa. (2 Vei. 14:9-12) Ia ena dua na gauna e muri, ni via ravuravu o Tui Pasa ni liutaka na mataivalu lailai ni Isireli, e saumi ira na kai Siria o Tui Esa me kerea na veivuke ni nodra mataivalu. E sega ni nuitaka na veivakabulai i Jiova me vaka eliu. (2 Vei. 16:1-3) E tauvimate levu tale ga ena dua na gauna e muri ni sa voleka ni mate, ia e sega ni nuitaki Jiova me vukei koya.—2 Vei. 16:12.

14. Na cava eda vulica ena cala nei Tui Esa?

¹⁴ A dau nuitaki Jiova o Esa ni sotava na veika dredre. Ia ni toso na gauna, e nuitaki koya ga, e sega ni nuitaka na Kalou. Ena rairai nanumi ni yaga vakalevu nona kere veivuke vei Siria ni ravuravu o Isireli. Ia e lekaleka ga nona tiko vakacegu. E vakayagataka e dua na parofita o Jiova me tukuna vua: “Ni oni vakararavi vua na Tui Siria oni sega ni vakararavi vei Jiova na nomuni Kalou, e dro bula kina mai ligamuni na mataivalu nei Tui Siria.” (2 Vei. 16:7) Meda qarauna sara meda kua ni nuitaki keda ga nida walia noda leqa, da sega kina ni nuitaka na veidusimaki Jiova ena nona Vosa. Ke yaco mada ga vakasauri e dua na leqa, meda lomavakacegu da nuitaki Jiova, ena qai vukei keda o koya meda vakatulewa vinaka.

15. Na cava eda rawa ni cakava nida wili iVolatabu?

¹⁵ (4) Nanuma eso na tikinivolatabu. Ni o wilika ena so na tikinivolatabu na yaga ni noda lomavakacegu meda nuitaki Jiova, saga mo nanuma vinaka na ka e tukuni kina. O na cakava vakacava qori? O rawa ni wilika vakadomoilevu, se mo vola qai dau taleva wasoma. E tukuna vei Josua o Jiova me wasoma nona dau wilika toka e ra na ivola ni Lawa, ena qai vakatulewa kina vakavuku. Na ka e wilika ena vukei koya me kua ni rere, ia me yaloqaqa ni liutaki ira na tamata ni Kalou. (Josua 1:8, 9) Ni yaco na ituvaki e vakavu nuiqawaqawa se rere, ena rawa ni vakaceguya na lomamu kei na nomu vakasama e levu na tikinivolatabu ena Vosa ni Kalou.—Same 27:1-3; Vkai. 3:25, 26.

16. E vukei keda vakacava o Jiova meda lomavakacegu qai nuitaki koya?

¹⁶ (5) Maliwai ira na tamata ni Kalou. E dau vakayagataki ira na tacida  o Jiova mera vukei keda meda lomavakacegu, da qai nuitaki koya. Nida tiko ena soqoni, ena yaga vei keda na ka eda rogoca ena ivunau, na ivakamacala, kei na noda veitalanoa veiuqeti kei ira na tacida. (Iper. 10:24, 25) Eda na vakayaloqaqataki tale ga nida talaucaka na lomada vei ira na itokani eda nuitaka ena ivavakoso. “Na vosa vinaka” e tukuna e dua na itokani, e rawa ni vakalailaitaka sara ga noda nuiqawaqawa.—Vkai. 12:25.

17. Me vaka e tukuni ena Iperiu 6:19, ena yaga vakacava noda inuinui meda tudei kina?

¹⁷ (6) Me dei tiko ga nomu inuinui. Na noda inuinui e vaka na “ikelekele ni noda bula,” ena vukei keda meda tudei ni yaco na ituvaki dredre se nida nuiqawaqawa. (Wilika Iperiu 6:19.) Dau vakananuma na yalayala i Jiova me baleta na gauna se bera mai sa na sega kina na nuiqawaqawa. (Aisea 65:17) Dau raitayaloyalotaka ni o sa bula tu ena vuravura vou ni vakacegu sa sega kina na veika ca. (Maika 4:4) Ena dei tale ga nomu inuinui ni o wasea vei ira eso tale. Solia nomu vinaka taucoko ena cakacaka vakavunau kei na veivakatisaipelitaki. Ena yaga vakacava? Ena ‘dei kina na nomu inuinui me yacova sara na icavacava.’—Iper. 6:11.

18. Na cava e rawa yaco nida volekata yani na icavacava? Eda na vosota vakacava?

¹⁸ Nida volekata yani na icavacava ni veika ca ena vuravura qo, sa na qai levu ga na ituvaki dredre e vakavu nuiqawaqawa. Na noda tikinivolatabu ni yabaki 2021, e vakayaloqaqataki keda meda vosota, meda lomavakacegu tiko ga nida nuitaki Jiova, sega ni noda kaukaua. Ena loma ni yabaki qo, meda vakaraitaka mada ga ena ka eda cakava nida vakabauta na yalayala i Jiova: “Oni na kaukaua ke oni tiko vakacegu, oni vakanuinui tiko.”—Aisea 30:15.