1. Na cava e cakava ena vukumu o Jiova?

O MAI iVakadinadina i Jiova vakacava? De dua o rogoca “na itukutuku vinaka” ni rau tukuna vei iko na nomu itubutubu, dua drau cakacaka vata se vuli vata, se dua e vunau yani i vale. (Mari. 13:10) Oti qori, e dua e vakayagataka nona gauna kei na sasaga me vuli iVolatabu kei iko. Ni o vuli tiko, o sa na lomani Jiova, o vulica tale ga ni lomani iko. E vagolei iko mai o Jiova ina ka dina, ena gauna qo o sa tisaipeli i Jisu Karisito, o sa vakanamata tale ga ina bula tawamudu. (Joni 6:44) E macala ga ni o vakavinavinakataki Jiova ni uqeta e dua me vakavulici iko ena ka dina, e vakadonuya tale ga mo nona dauveiqaravi.

2. Na cava eda na veivosakitaka ena ulutaga qo?

² Nida sa mai kila na dina, e noda itavi meda vukea eso tale mera tomani keda ena sala ni bula. De dua e rawarawa meda vunau e veivale, ia e dredre toka meda veisureti ena vuli iVolatabu. E va beka qori na nomu rai? Ke vaka kina, ena yaga vei iko eso na vakatutu ena ulutaga qo. Eda na veivosakitaka na ka ena uqeti keda meda veivakatisaipelitaki. Eda na veivosakitaka tale ga na sala meda walia kina eso na ka e vakadredretaka noda caka vuli iVolatabu. Meda veivosakitaka mada qo na vuna meda vunautaka kina na itukutuku vinaka, meda veivakavulici tale ga.

3. Na cava eda vunau kina?

³ Ni se bula e vuravura o Jisu, e vakaroti ira na nona imuri ena dua na cakacaka e rua na kena iwasewase. Kena imatai, e tukuna vei ira mera vunautaka na itukutuku  vinaka ni Matanitu ni Kalou, e vakaraitaka tale ga na kena icakacaka. (Maciu 10:7; Luke 8:1) Kena ivakaraitaki, e tukuna o Jisu vei ira na nona tisaipeli na ka mera cakava ke ra vakarorogo na lewenivanua, kei na ka mera cakava nira sega ni vakarorogo. (Luke 9:2-5) E parofisaitaka tale ga na rabailevu ni nodra cakacaka vakavunau ni tukuna vei ira nona imuri mera vunau me “ivakadinadina ina veimatanitu kece.” (Maciu 24:14; Caka. 1:8) E nodra itavi na nona tisaipeli mera tukuna yani na itukutuku ni Matanitu ni Kalou kei na ka ena cakava, ke ra vakarorogo na lewenivanua se sega.

4. Me vaka e tukuni ena Maciu 28:18-20, na cava tale meda cakava nida vunautaka na Matanitu ni Kalou?

⁴ Na cava na ikarua ni iwasewase ni cakacaka e vakarota o Jisu? E tukuna vei ira na nona imuri mera vakavulici ira e rawa nira nona tisaipeli, mera muria tale ga na ka kece e vakarota. Vakacava ena vakayacori ga na vunau kei na veivakavulici ena imatai ni senitiuri me vaka era tukuna eso? Sega. E vakaraitaka o Jisu ni cakacaka bibi qo ena vakayacori me yacova mai na noda gauna, me “yacova na ivakataotioti ni veika vakavuravura.” (Wilika Maciu 28:18-20.) De dua e tukuna na ivakaro qo o Jisu ni rairai vei ira e sivia ni 500 na nona tisaipeli. (1 Kor. 15:6) E vakaraitaka vakamatata o Jisu vei Joni ena Vakatakila ni o ira kece na nona tisaipeli mera vakavulici ira eso tale me baleti Jiova.—Vkta. 22:17.

5. Na ivakatautauvata cava e vakayagataka o Paula ena 1 Korinica 3:6-9 me baleta na vunau kei na veivakavulici?

⁵ E vakatauvatana na yapositolo o Paula na veivakatisaipelitaki kei na teitei, ni vinakati kina e levu tale na ka. E tukuna vei ira e Korinica: “Au tea o yau, e vakasuasuataka o Apolosa . . . O kemuni na were teivaki ni Kalou.” (Wilika 1 Korinica 3:6-9.) Nida cakacaka ena ‘were ni Kalou,’ eda tea na itei, vakasuasuataka, eda dikeva wasoma tale ga na kena tubu. (Joni 4:35) Ena gauna vata qori, eda kila ni Kalou ga ena vakatubura na itei.

6. Na cava e okati ena noda veivakavulici?

⁶ Eda vaqarai ira na “yalomalumalumu era muria na sala mera bula tawamudu kina.” (Caka. 13:48) Meda vukei ira qori mera tisaipeli, e vinakati meda vukei ira mera (1) kila, (2) vakabauta, (3) mera muria tale ga na veika era vulica ena iVolatabu. (Joni 17:3; Kolo. 2:6, 7; 1 Ces. 2:13) Eda rawa ni vukei ira na gonevuli na lewe ni ivavakoso nida vakaraitaka noda lomani ira qai kauaitaki ira nira tiko ena soqoni. (Joni 13:35) E rawa tale ga ni levu na gauna kei na igu ena vakayagataka o qasenivuli me vukei gonevuli me talaraka na vakabauta kei na itovo sa “vakawakana tu” vua. (2 Kor. 10:4, 5) Ena rawa ni vica vata na vula nona dusimaki gonevuli me cakava na veiveisau me rawa ni rawata nona isausau me papitaiso. E yaga dina nona cakava o gonevuli na veisau qori.

7. Na cava e uqeti keda meda vunau qai veivakatisaipelitaki?

⁷ Na cava eda vunau kina qai veivakatisaipelitaki? Kena imatai, nida lomani Jiova. Ni o saga mo talairawarawa ena ivakaro mo vunau qai veivakatisaipelitaki, o sa vakaraitaka tiko nomu lomana na Kalou. (1 Joni 5:3) Vakasamataka qo: Nomu lomani Jiova a uqeti iko mo vunau e veivale. Vakacava e rawarawa nomu muria? De dua e sega. O rere ena imatai ni  gauna o lai vunau kina? E macala tu ga ni o rere! Ia o kila ni vinakata o Jisu mo cakava na cakacaka qo, o mani talairawarawa ena nona ivakaro. Kena irairai ni toso na gauna, sa matau vei iko na cakacaka vakavunau. Ia vacava na caka vuli iVolatabu? O lomaleqa ni o vakasamataka? De dua. Ni o kerei Jiova me vukei iko mo kua ni rere, mo doudou tale ga ni veisureti ena vuli iVolatabu, ena vukei iko o Jiova mo vinakata na veivakatisaipelitaki.

8. Me vaka e tukuni ena Marika 6:34, na cava tale ena uqeti keda meda veivakavulici?

⁸ Kena ikarua, noda lomani ira na kainoda ena uqeti keda meda vakavulici ira ena ka dina. Kena ivakaraitaki, e oca sara ga o Jisu kei ratou na nona tisaipeli ena cakacaka vakaitalatala. Eratou via lai vakacegu ena dua na vanua, ia e qai lako yani e dua na ilala levu. Dua na ka nona lomani ira o Jisu, mani vakavulici ira ena “levu sara na ka.” (Wilika Marika 6:34.) E gumatua tiko ga o Jisu ena gauna qori. Na vuna? Ni biuti koya ena kedra ituvaki. E vinakata sara ga me vukei ira ni kila na nodra rarawa, e vinakati mera vakacegui. Vakacava nikua? Levu tale ga era rarawa tu, e vinakati mera vakacegui. Meda kua ni nanuma nira marautaka tiko nodra bula. Era vaka na sipi lako sese, e sega na kena ivakatawa me veidusimaki. E vakamacalataki ira na yapositolo o Paula nira sega ni kila na Kalou, e sega tale ga na nodra inuinui. (Efeso 2:12) Era muria tiko na “sala e basika ina rusa”! (Maciu 7:13) Nida vakasamataka na kedra ituvaki vakayalo ena yalava, ena uqeti keda noda loloma kei na veinanumi meda vukei ira. Na sala vinaka duadua eda na vukei ira kina, ya nida sureti ira meda vulica vata na iVolatabu.

9. Me vaka e tukuni ena Filipai 2:13, ena vukei iko vakacava o Jiova?

⁹ De dua o lomalomarua mo veisureti ena vuli iVolatabu ni o kila na levu ni gauna o na vakayagataka kina. Ke va qori nomu rai, mo talaucaka na lomamu vei Jiova. Kerei koya me vukei iko mo vinakata na veivakavulici, mo raica e dua mo vakavulica ena iVolatabu. (Wilika Filipai 2:13.) E vakadeitaka vei keda na yapositolo o Joni ni na rogoca na Kalou na masu e salavata kei na lomana. (1 Joni 5:14, 15) Mo nuidei gona ni na vukei iko o Jiova mo vinakata na veivakatisaipelitaki.

10-11. Na cava ena rairai vakadredretaka noda caka vuli iVolatabu?

¹⁰ Eda kila ni bibi noda ilesilesi meda veivakavulici, ia ena rairai dredre meda cakava. Meda veivosakitaka mada eso na ka dredre qori kei na sala meda walia kina.

¹¹ Ena rawa ni lailai ga na ka eda rawata ena vuku ni keda ituvaki. Kena ivakaraitaki, eso na dautukutuku era sa qase, se tautauvimate. Vakacava o vakila tiko qori? Ke dina, vakasamataka mada na ka eda vulica mai na matedewa na COVID-19. Eda vulica ni rawa ni vuavuaivinaka noda caka vuli iVolatabu ena talevoni kei na so tale na iyaya vakalivaliva! Kena ibalebale o rawa sara ga ni tekivuna na vuli iVolatabu ni o tiko ga e vale. E tiko e dua tale na kena yaga. Eso era vinakata mera vuli iVolatabu, ia era osooso ena gauna era dau vunau yani kina na tacida. De dua era na galala ena matakalailai se bogi. Vakacava o rawa ni vuli kei na dua ena gauna qori? O Jisu  a vakavulici Nikotimo ena bogi, qori na gauna e veiganiti vei Nikotimo.—Joni 3:1, 2.

12. Na cava ena vukei iko mo qasenivuli vinaka?

¹² Eda na rairai nanuma nida sega ni rawa ni caka vuli iVolatabu. De dua eda nanuma ni vinakati me levu na ka eda kila se meda kenadau ena veivakavulici meda qai vakavulica e dua ena iVolatabu. Ke va qori nomu rai, qo e tolu na ka ena vukei iko. Kena imatai, e kila o Jiova ni o rawa ni veivakavulici. (2 Kor. 3:5) Kena ikarua, e vakarota o Jisu mo veivakavulici ni tu vua na “lewa kece mai lomalagi kei vuravura.” (Maciu 28:18) Kena ikatolu, mo nuitaka eso tale mera vukei iko. E nuitaka o Jisu na ka e vakavulici koya kina o Tamana me tukuna. Qori tale ga na ka mo cakava. (Joni 8:28; 12:49) O rawa ni kerea na ivakatawa ni nomu iwasewase lailai, dua na painia se dautukutuku matua me vukei iko mo tekivuna na vuli iVolatabu. Kena ibalebale, o na rawa ni dua na qasenivuli vinaka ni o veitomani ena vuli iVolatabu kei na dua vei ratou qori.

13. Na cava meda yalorawarawa kina ni veisau?

¹³ Ena rairai dredre meda muria na iwalewale vou se vakayagataka na ivukevuke vou. Sa veisau na iwalewale ni noda caka vuli iVolatabu. Eda na vakayagataka na ivola Marau me Tawamudu! E vinakati meda vakavakarau vinaka ena vuli, ni sa veisau na iwalewale eda muria. Sa na lailai na parakaravu me wiliki, ena levu ga noda veivosaki kei gonevuli. Eda na vakayagataka e levu na vidio kei na ivukevuke me vaka na JW Library^® nida veivakavulici. Ke o sega ni kila na kena ivakavakayagataki, o rawa ni kerea e dua me vukei iko. Eda dau vinakata ga meda muria na iwalewale sa matau tu vei keda, e sega ni rawarawa meda muria na iwalewale vou. Ia ena veivuke i Jiova kei ira na tacida, ena rawarawa mo veisau, o na marautaka tale ga na veivakavulici. Me vaka e tukuna e dua na painia, na iwalewale qo “erau na marautaka ruarua o gonevuli kei qasenivuli.”

14. Na cava meda nanuma tiko nira sega ni tataleitaki ena yalava? E vakayaloqaqataki keda vakacava na 1 Korinica 3:6, 7?

¹⁴ De dua eda tiko ena yalava e sega ni rawarawa me tekivu kina na vuli iVolatabu. Era na rairai sega ni taleitaka e levu na itukutuku eda kacivaka. Na cava ena vukei keda me donu tiko ga noda rai me baleta noda yalava? Meda nanuma tiko ni rawa ni veisau totolo na kedra ituvaki o ira ena vuravura veilecayaki qo. E rawa gona nira kauaitaka nodra bula vakayalo o ira na sega ni dau vakarorogo. (Maciu 5:3) Eso era sega ni dau vinakata na noda ivola vakaivolatabu era vinakata mera vuli iVolatabu. Eda kila tale ga ni o Jiova e Turaga ni tatamusuki. (Maciu 9:38) E vinakata meda teitei qai vakasuasuataka tiko ga, o koya ga ena vakatubura. (1 Kor. 3:6, 7) E veivakayaloqaqataki meda kila, ke sega mada nida caka vuli iVolatabu tiko ena gauna qo, o Jiova ena vakalougatataka noda sasaga. E sega ni vakatau ena levu ni ivola eda solia se levu ni vuli iVolatabu! *

15. Na cava e vakila o Jiova ni mai vulica na iVolatabu e dua qai muria na ka e vulica?

¹⁵ E marau o Jiova ni mai vakabauta e dua na ka dina qai wasea yani. (Vkai. 23: 15, 16) E marau tale ga vakalevu ni raici ira na nona tamata nira gumatua ena vunau kei na veivakavulici! Kena ivakaraitaki, ni veitakavi tiko na matedewa ena yabaki vakacakacaka ni 2020, era vulica tiko na iVolatabu e 7 na milioni 705 na udolu 765, mai na iwiliwili qori era yalataka nodra bula vei Jiova e 241 na udolu 994 ra qai papitaiso. Kena ibalebale o ira na tisaipeli vou qori, era na caka vuli iVolatabu tale ga, mera mai tisaipeli kina e levu tale. (Luke 6:40) E macala nida vakamarautaki Jiova nida vakaitavi tiko ena veivakatisaipelitaki.

16. Na cava e rawa ni noda isausau vinaka?

¹⁶ E sega ni cakacaka rawarawa na veivakatisaipelitaki, ia ena veivuke ga i Jiova eda rawa ni vakavulici ira na ka vou mera lomana na Tamada vakalomalagi. Vakacava e rawa ni noda isausau meda vakavulica mada ga e dua ena iVolatabu? De dua eda na kurabuitaka na ka ena yaco ke da vakayagataka na gauna veiganiti kece meda sureti ira eda sotava mera vulica na iVolatabu. Eda nuidei ni na vakalougatataka o Jiova na noda sasaga.

17. Na cava eda na vakila nida caka vuli iVolatabu?

¹⁷ E itavi dokai meda vunautaka na ka dina, meda veivakavulici tale ga! Qori e vakavu marau. Na yapositolo o Paula e vukea e levu e Cesalonaika mera mai tisaipeli. E tukuna: “Na cava me neitou inuinui se marau se isala ni reki ena mata ni Turaga o Jisu ni sa na tiko? Sega ni o kemuni? O kemuni dina na neitou isakisaki, na vu ni neitou marau.” (1 Ces. 2:19, 20; Caka. 17:1-4) Qori tale ga na ka era vakadinadinataka e levu nikua. Kena ivakaraitaki, na tacida o Stéphanie kei watina rau sa vukea e levu mera papitaiso. E kaya, “Sega ni vakatauvatani rawa na noda marau nida vukea eso mera yalataki ira vei Jiova.”