1-2. E uqeti keda vakacava na vosa i Jiova ena Aisea 65:16, 17 meda kua ni soro?

“KUA NI SORO!” Qori na usutu veiuqeti ni soqo ni veiwasewase ni 2017. E vakaraitaka vei keda na porokaramu qori na sala meda vosota kina na ituvaki dredre. Sa oti qo e va na yabaki, eda se vosota tiko ga na ituvaki ca ni vuravura qo.

² Vakacava e dua na ituvaki o se qai sotava ga qo? E takali e dua na lewe ni nomu vuvale se nomu itokani voleka? O tauvimate bibi? Na ituvaki ni bula vaqase? Na leqa tubukoso, na itovo voravora, se veitusaqati? Se na revurevu ni matedewa me vaka na COVID-19? Eda vakanamata tu ena siga me na oti kece kina na leqa qo, meda guilecava vakadua qai sega ni yaco tale!—Wilika Aisea 65:16, 17.

3. Na cava meda cakava ena gauna qo? Na vuna?

³ Sa dredre na bula ena gauna qo, eda na rairai sotava e levu tale na ituvaki dredre ena gauna se bera mai. (Maciu 24:21) E matata gona ni vinakati meda vulica meda vosota vakalevu. Na vuna? E tukuna o Jisu: “Na nomudou vosota ga dou na vakabulai kina.” (Luke 21:19) Nida vakasamataka na sala era vosota kina eso na ituvaki e tautauvata kei na ka eda sotava tiko, ena uqeti keda meda vosota.

4. Na cava eda tukuna kina ni o Jiova e ivakaraitaki vinaka ni vosota?

⁴ O cei na ivakaraitaki vinaka ni vosota? Na Kalou o Jiova. Vakacava o kurabui ena isaunitaro qori? De dua. Ia ni o vakasamataka vinaka, ena matata vei iko. E lewa tiko na Tevoro na vuravura qo, e levu kina na leqa. E tu vei Jiova na kaukaua me vakaotia totolo, ia e waraka tiko na siga me qai cakava kina qori. (Roma 9:22) E vosota tiko me yacova na gauna lokuci qori. Meda veivosakitaka mada e ciwa na ka e vosota tiko o Jiova.

5. E beci vakacava na yaca ni Kalou? Na cava nomu rai?

⁵ Na beci ni yacana. O Jiova e dau sakitaka na yacana, e vinakata meda doka kece. (Aisea 42:8) Ia sa rauta qo ni 6,000 na yabaki na kena beci. (Same 74:10, 18, 23) E tekivu qo ena were o Iteni ni beitaka na Kalou na Tevoro (kena ibalebale “Dauvakaucaca”) ni sega ni solia vei Atama kei Ivi na ka me rau marau kina. (Vkte. 3:1-5) Tekivu mai na gauna qori e beitaki vakailasu o Jiova ni sega ni vakarautaka na ka me marau kina na tamata. E kauaitaka vakabibi o Jisu na beci ni yaca i Jiova. Oya na vuna e vakavulici ira kina na nona tisaipeli mera masulaka: “Tamai keimami mai lomalagi, me vakarokorokotaki na yacamuni.”—Maciu 6:9.

6. Na cava e vakatara kina o Jiova e dua na gauna balavu me vakadinadinataki ni dodonu ga me veiliutaki?

⁶ Na saqati ni nona veiliutaki. O Jiova duadua ga e dodonu me liutaka na lomalagi kei na vuravura qai vinaka duadua na nona veiliutaki. (Vkta. 4:11) Ia e saga na Tevoro me vakacalai ira na agilosi kei na kawatamata mera nanuma ni sega ni tiko vua na Kalou na dodonu qori. Ena taura toka na gauna me vakadinadinataki kina ni tu vei Jiova na dodonu me veiliutaki qai vinaka duadua. E vuku gona na Kalou ni vakatara me veiliutaki na tamata ena dua na gauna balavu mera kila kina ni dredre mera liutaki ira ga nira sega ni vakarorogo vua na Dauveibuli. (Jere. 10:23) Ni Kalou vosovoso o Jiova, ena qai macala kina na ile qori. Eda na kila kece ni totoka vakaoti na ivakarau ni veiliutaki i Jiova, na nona Matanitu ga ena kauta mai na vakacegu kei na sautu e vuravura.

7. O cei era talaidredre vei Jiova? Cava ena cakava vei ira?

⁷ Era talaidredre eso na luvena. O Jiova e buli ira na luvena, ya o ira na agilosi kei na tamata mera uasivi. Ia e qai temaki rau na tamata uasivi o Atama kei Ivi, na agilosi talaidredre o Setani (kena ibalebale “Dauveivorati”) me rau talaidredre vei Jiova. Era veitomani ena veivorati qori eso tale na agilosi kei na tamata. (Juta 6) Toso na gauna, o ira mada ga na lewe ni matanitu digitaki o Isireli, era saqati koya ra qai sokalou vua na kalou lasu. (Aisea 63:8, 10) Sa rauta me rarawa o Jiova. Ia e vosota voli ga, ena vosota tiko ga me yacova na gauna ena vakarusai ira kece kina na talaidredre. Era na marau o ira na yalodina era vosota tale ga na veika dredre ena ituvaki ca qo!

8-9. Na lasu cava e tukuni me baleti Jiova? Cava eda cakava kina?

⁸ Sega ni cegu nona lasu na Tevoro. O Setani e beitaki Jope na dauveiqaravi yalododonu i Jiova. E kaya tiko ni o ira kece na dausokalou yalodina i Jiova era qaravi koya mera rawaka kina. (Jope 1:8-11; 2:3-5) E sega ni cegu nona veibeitaki na Tevoro me yacova mai qo. (Vkta. 12:10) Eda rawa ni vakalasui Setani nida vosota na ituvaki dredre da qai yalodina tiko ga vei Jiova nida lomani koya. E vakalougatataki Jope, ena vakalougatataki keda tale ga nida vosota.—Jeme. 5:11.

⁹ O Setani e vakayagataki ira na iliuliu ni lotu lasu mera kaya ni dau veivakalolomataki o Jiova, e vakavuna na noda rarawa. Eso era kaya mada ga ni gauna era mate kina na gone, e kauti ira na Kalou ni vinakata eso tale na agilosi e lomalagi. Qori e beci kina na Kalou! Ia eda kila ni tama dauloloma o Jiova.  Na gauna eda tauvimate bibi kina, se ni mate e dua eda lomana eda sega ni beitaka na noda Kalou. Kena veibasai, eda vakabauta ni dua na siga ena vakabulai ira na tauvimate qai vakaturi ira na mate. Eda tukuna vei ira kece na vakarorogo ni Kalou dauloloma o Jiova, me rawa ni tukuna e dua na ka vei koya e veibeitaki tiko.—Vkai. 27:11.

10. Na cava e tukuni me baleti Jiova ena Same 22:23, 24?

¹⁰ Nodra rarawa nona dauveiqaravi mareqeti. E Kalou dauyalololoma o Jiova. E sega ni taleitaka nida tagi ena vuku ni rarawa eda vosota voli, de dua eda tusaqati, se da tauvimate, se na vuku ni noda malumalumu (Wilika Same 22:23, 24.) E vakila o Jiova na noda rarawa, e vinakata me vakaotia, ena qai vakaotia ena dua na gauna. (Vakatauvatana Lako Yani 3:7, 8; Aisea 63:9.) Ena yaco na gauna ena “qusia tani . . . na wainimata kece mai na matada, sa na sega tale na mate, na lolosi, na tagiyaso, kei na mosi.”—Vkta. 21:4.

11. Na cava nona rai o Jiova me baleti ira nona dausokalou yalodina era sa takali?

¹¹ Nira takali nona itokani. Na cava nona rai o Jiova me baleti ira na tagane kei na yalewa yalodina era takali? E vinakata sara ga me raici ira tale! (Jope 14:15) Vakasamataka mada nona vinakata sara tu ga o Jiova me raica tale nona itokani o Eparama. (Jeme. 2:23) Se o Mosese, ni dau vosa sara ga vua e “matana.” (Lako 33:11) E vakanamata tu me rogoci Tevita kei na vo ni daunisame mera lagata na sere totoka ni vakacaucau! (Same 104:33) Era sa mate tu qo na itokani i Jiova, ia e sega ni guilecavi ira. (Aisea 49:15) E nanuma vinaka tu na  veika kece me baleti ira. E kaya na iVolatabu nira “se bula tu ga mai na nona rai.” (Luke 20:38, vmr.) Dua na siga, ena vakaturi ira tale mera bula, ena rogoca tale nodra masu mai vu ni lomadra qai vakadonuya nodra sokalou. Ke sa takali e dua o lomana, me vakacegui iko mada ga na vakasama qo.

12. Na cava e vakararawataki Jiova sara ga ena iotioti ni veisiga ca qo?

¹² Nodra veivakalolomataki na tamata ca. Ni tekivu na talaidredre mai Iteni, e kila tu o Jiova ni na ca tiko ga na ituvaki. E cata o Jiova na ivakarau ca, na veika tawadodonu, kei na ivalavala voravora e vakayacori tu nikua. E dau nanumi ira sara ga na malumalumu kei ira na sega ni taqomaki ira rawa, me vakataki ira na luveniyali kei na yada. (Saka. 7:9, 10) E rarawa sara ga o Jiova ni raica nira vakalolomataki na nona dausokalou yalodina ra qai biu e valeniveivesu. Moni nuidei ni lomani kemuni kece na vosota tiko vata kei koya.

13. E vakalolovirataki vakacava na kawatamata ena mata ni Kalou? Cava ena cakava?

¹³ E torosobu tiko ga na ivakarau ni tamata. E taleitaka o Setani me vakalolovirataki keda na tamata nida buli meda ucuya na Kalou. Ni raica na Kalou ni “levu sara na ivakarau ca ni tamata” ena siga i Noa, e “veivutuni o Jiova ni a bulia na tamata ena vuravura, e mosi na lomana.” (Vkte. 6:5, 6, vmr., 11) Sa bau veisau na ituvaki? E sega sara ga! E taleitaka sara ga na Tevoro me raica na torosobu ni ivakarau ni veiyacovi ena kena veimataqali, vaka kina na nodra veiyacovi na tagane kei na yalewa, nodra veimoceri na tagane, kei na nodra veimoceri na yalewa! (Efeso 4:18, 19) E marau sara ga o Setani ni temaki ira na dausokalou dina mera valavala ca bibi. Ni sa oti nona yalovosovoso o Jiova, ena vakaraitaka sara ga nona cata na ivalavala vakasisila kece.

14. Na cava e cakava tiko na tamata ena ka e bulia na Kalou e vuravura?

¹⁴ Ni vakacacani na nona ibulibuli. E tini ca nona veiliutaki na tamata. Kena ikuri, e vakaleqa na vuravura kei na manumanu e tataunaka vei keda o Jiova meda maroroya. (Dauv. 8:9; Vkte. 1:28) Era veivakasalataki eso na kenadau ni rawa ni kawaboko e dua na milioni na mataqali manumanu kei na kau ena vica na yabaki mai qo, ena vuku ni ka e cakava na tamata. Sa rauta mera leqataka e levu na veika bula! Ka ni marau ni sa yalataka o Jiova me ‘vakawabokotaki ira na vakarusai vuravura tiko’ qai veisautaka na vuravura taucoko me parataisi.—Vkta. 11:18; Aisea 35:1.

15-16. Na cava ena uqeti keda meda vosota vata kei Jiova? Vakatauvatana.

¹⁵ Vakasamataka mada na leqa kece e vosota voli na Tamada vakalomalagi me vica vata na udolu na yabaki. (Raica na kato “ Ka e Vosota Tiko o Jiova.”) E rawa vei Jiova me vakaotia ena dua ga na gauna na ituvaki ca qo. Ia eda kalougata ena vuku ni nona yalovosovoso. Eda rawa ni vakatauvatana va qo. Kaya mada ni tukuni vua e dua na veiwatini ni na tautauvimate na luvedrau e se bera ni sucu. Ena sega ni rawarawa nona bula na gone, ena toso na gauna ena matedole. E sega ni rawarawa nodrau qaravi koya, ia rau marautaka nona sucu mai. Nodrau lomani luvedrau e uqeti rau me rau vosota  na ka dredre me rau vakarautaka vua na ka vinaka duadua.

¹⁶ Era ivalavala ca tale ga na kawa kece i Atama kei Ivi ena gauna era sucu mai kina. Ia se lomani ira tiko ga o Jiova qai karoni ira. (1 Joni 4:19) O Jiova e sega ni vakataki rau na itubutubu ena vosa vakatautauvata, e rawa vua me cakava e dua na ka. Sa lokuca tu na tikinisiga me vakaotia na leqa kece e tarai keda tu na kawatamata. (Maciu 24:36) Me uqeti keda mada ga na loloma i Jiova meda vosota tiko ga.

17. E uqeti keda vakacava na ka e vakamacalataki me baleti Jisu ena Iperiu 12:2, 3 meda vosota tiko ga?

¹⁷ E ivakaraitaki vinaka ni vosota o Jiova. E vakatotomuria vinaka o Jisu na ivakaraitaki ni vosota i Tamana. Ni se bula e vuravura e vosota na vosa ni veivakalialiai, me vakamaduataki, kei na kaunirarawa ena vukuda. (Wilika Iperiu 12:2, 3.) E macala ga ni uqeti Jisu na ivakaraitaki ni vosota i Jiova. Ena uqeti keda tale ga.

18. E uqeti keda vakacava na 2 Pita 3:9 meda kila na ka e rawati ena yalovosovoso i Jiova?

¹⁸ Wilika 2 Pita 3:9. E kila o Jiova na gauna vinaka me vakarusai kina na ituvaki ca qo. Ena vuku ni nona yalovosovoso e rawa kina ni kumuni e dua na isoqosoqo levu e vica vata na milioni na kedra iwiliwili, era sokalou ra qai vakacaucautaki koya. Era vakavinavinakataka kece ni vosota vakabalavu o Jiova, e rawa kina nira sucu, era vulica mera lomani koya, ra qai yalataki ira vua. Nira vosota me yacova na icavacava e vica vata na milioni, e macala ni donu nona vakatulewa o Jiova me vosota voli!

19. Na cava mo vakadeitaka? O na vakalougatataki vakacava?

¹⁹ Eda vulica vei Jiova na sala meda vosota kina ena marau. E vakavuna o Setani na mosi ni yalo kei na rarawa, ia se “Kalou mamarau” tiko ga o Jiova. (1 Tim. 1:11) Eda rawa tale ga ni marau tiko ga nida yalovosovoso meda waraki Jiova ni vakarokorokotaka na yacana, me kua tale ni vakalewai nona veiliutaki, me vakaotia na ca kei na noda leqa kece ena gauna qo. Meda vakadeitaka mada ga meda vosota, meda vakacegui tale ga nida kila ni vosota tiko ga na Tamada vakalomalagi. Nida cakava qori, ena dina kina vei keda na vosa qo: “E marau o koya e vosota tiko na veivakatovolei, ena gauna e vakadonui kina ena soli vua na isala ni bula a yalataka o Jiova vei ira na lomani koya tiko ga.”—Jeme. 1:12.