EDA vakadinadinataka ni liutaki ira tiko na nona tamata o Jiova ena “iotioti ni veisiga” qo, e tokoni ira tale ga me dei nodra veiwekani kei koya. (2 Tim. 3:1) Ia e bibi meda talairawarawa vua. Eda vakataki ira na Isireli ena vanua talasiga. E vinakati mera talairawarawa ena rorogo ni biukila.

E tukuna vei Mosese o Jiova me cakava e rua na biukila ena siliva tukilaki “mera soqoni mai kina na isoqosoqo qai tokitaki kina na keba.” (Tiko 10:2) E duidui na iwalewale ni nodra uvuca na biukila na bete mera kila na Isireli na ka mera cakava. (Tiko 10:3-8) Nikua tale ga, e vica na iwalewale era dusimaki kina na tamata ni Kalou. Dikeva mada e tolu na iwalewale qori, meda vakatauvatana kei na rorogo ni biukila ena gauna makawa. Dua oya nida sureti na tamata ni Kalou nikua ena soqo lelevu, kena ikarua nira vakavulici na ivakatawa era lesi, kena ikatolu, ni veisau se vakavoui na ituvatuva ena ivavakoso taucoko.

Ni vinakata o Jiova me soqoni yani na “isoqosoqo taucoko” ena icurucuru ni valeniveitavaki ena tokalau, era na uvuca ruarua na bete na biukila. (Tiko 10:3) Era na rogoca na domo ni biukila qori na yavusa kece era keba wavokita na valeniveitavaki, ya na va na iwasewase. O ira na keba volekata na icurucuru era na rawa ni lako totolo yani. Eso tale era tiko vakayawa ena rairai vinakati na gauna kei na sasaga mera yaco yani. Koya gona, ke ra yawa se voleka, e vinakata ga o Jiova mera soqoni kece yani, mera rogoca nona veidusimaki.

Nikua, eda sega ni soqoni ena valeniveitavaki, ia eda sureti ena nodra soqo na tamata ni Kalou. Qo e okati kina na soqo ni veiwasewase kei na so tale na soqo namaki, eda rogoca kina na itukutuku kei na veidusimaki e yaga. Era marautaka na tamata i Jiova na porokaramu qori e veiyasa i vuravura. O ira na ciqoma na veisureti qo, era marau ni duavata kei ira na gole yani. Eso era lako sara mai vakayawa, ia era vakadinata kece na tiko ena soqo qori na kena yaga.

Vakacava e yaga tale ga na soqo qo vei ira na iwasewase lalai tu yawa? Eda marau ni sa tu na iyaya vakalivaliva nikua me rawa kina qori. Era marautaka dina e levu na tacida, era vakila nira duavata tiko kei ira na vo ni tacida ena soqo. Kena ivakaraitaki, ena dua na veisiko ni mata mai na itikotiko liu, e tuvanaka na vale ni tabana e Benin mera sema yani na tiko e Arlit, Niger mera rogoca na porokaramu. Qo na tauni ena vanua talasiga  na Sahara, e dau keli kina e dua na mataqali iyaubula. Era soqoni yani e le 21, era wili kina na tacida kei ira na tataleitaki. Era tu vakayawa, ia era marau nira duavata kei na le 44,131 na tiko ena soqo qori. E vola e dua na tacida tagane: “Vinaka vakalevu nomuni veivuke ena neimami rogoca rawa na porokaramu. E vakaraitaka dina na levu ni nomuni lomani keimami.”

Nira uvuca na bete e dua ga na biukila, era na soqoni yani ena valeniveitavaki na “turaga, o ira na iliuliu ni veiudolu ni Isireli.” (Tiko 10:4) Ena dusimaki ira e keri o Mosese, e vakavulici ira tale ga. E yaga na veivakavulici qori mera qarava vinaka na nodra itavi ena nodra yavusa. Ke o dua vei ira na turaga qori, vakacava o na sasaga mo tiko e kea, me na yaga vei iko?

Nikua, o ira na qase ni ivavakoso era sega ni “turaga,” era sega tale ga ni vakacolasau vei ira na qelenisipi ni Kalou. (1 Pita 5:1-3) Ia era solia na nodra vinaka kece mera vakatawana na qelenisipi. Era tu vakarau gona mera lako nira sureti mera lai vuli, me vaka na Koronivuli ni Cakacaka Vakaitalatala ni Matanitu. Ena gauna qori, era vulica na qase na iwalewale mera qarava vinaka kina na nodra itavi ena ivavakoso. E yaga vakacava? Era toro volekati Jiova na qase kei ira na lewe ni ivavakoso. Ke o se bera ni tiko ena vuli qori, o sa na rairai vakila na kena yaga nira mai vakayagataka ena ivavakoso na tacida na ka era vulica.

Ena so na gauna era uvuca na biukila na bete ni Isireli me veitubuyaki na kena rorogo. Qori e vakaraitaka ni vinakata o Jiova mera biubiu na Isireli, se na isoqosoqo taucoko. (Tiko 10:5, 6) E vinakati kina na tuvatuvanaki vinaka, ia e tamani cakacaka. Eso na gauna e rawa nira lomalomarua mera toki. Na vuna?

De dua era nanuma eso ni sa rui veitaravi na ivakaro mera biubiu, e vakasauri tale ga. “So na gauna ena tiko voli ga na o mai na bogi me yacova na mataka.” Ena so tale na gauna, ena “rua na siga, se dua na vula, se dede sara.” (Tiko 9:21, 22) Era toki vakavica na isoqosoqo taucoko? E tukuni ena Tiko Voli Mai na Lekutu wase 33 e rauta ni 40 na vanua era keba kina na Isireli.

Eso na gauna, era na raica e dua na vanua ni vakaruru vinaka. Qori e yaga vakalevu ena “vanua talasiga vakaitamera qai vakarerevaki.” (Vkru. 1:19) Ena rawa gona nira nanuma ni na vakavu leqa ke ra toki.

Ni sa kena gauna mera biubiu, e vinakati mera vosovoso eso na yavusa nira waraka na gauna mera biubiu. Era sa rogoca kece na veitubuyaki ni rorogo ni biukila, ia e sega ni rawa nira biubiu vata ga ena dua na gauna. Na veitubuyaki ni rorogo ni biukila e vakaraitaka mera biubiu na yavusa era keba tiko ena tokalau, oya o ira na Juta, Isakari, kei Sepuloni. (Vkru. 2:3-7; 10:5, 6) Nira sa biubiu oti, era na uvuca ena ikarua ni gauna na bete na biukila me veitubuyaki, e vakaraitaka mera biubiu na keba tiko ena ceva. Era na cakava tiko qori na bete me yacova nira biubiu kece.

O rairai vakatitiqataka eso na veiveisau e vakayacora na isoqosoqo. De dua o nanuma ni sa rui sivia tale. Se o nanuma ni vinaka cake na veika sa vakayacori tiko mai, e sega ni vinakati me veisau. E rairai vakatovolei kina na nomu vosovoso, e taura tale ga na gauna mo ciqoma. Eda kila ni bibi meda muria na veiveisau, ke da saga gona vagumatua meda cakava qori eda na raica ni na vakalougatataki keda na Kalou.

Ena gauna i Mosese, e dusimaka o Jiova e dua na iwiliwili levu ni tagane, yalewa, kei na gone ena vanua talasiga. Era na bula ke karoni ira o Jiova qai dusimaki ira. Nikua, eda taqomaki tale ga vakayalo ena veidusimaki i Jiova. E vukei keda me dei noda veiwekani kei koya, e vaqaqacotaka tale ga noda vakabauta! Koya gona, meda vakadeitaka mada ga meda talairawarawa me vakataki ira na Isireli yalodina ina rorogo ni biukila!