E cavuti ena tikinivolatabu qori e ciwa na itovo vaKarisito: “E okati ena vua ni yalo tabu na loloma, marau, vakacegu, vosovoso, yalololoma, yalovinaka, vakabauta, yalomalua, lewai koya vinaka.” Ia meda kua ni nanuma ni qori ga na itovo vinaka e rawa ni uqeta na yalo tabu ni Kalou meda vakaraitaka.

Na vuna? Dikeva na ka e tukuna na yapositolo o Paula ni bera ni vakamacalataka na vua ni yalo tabu: “Na vua ni itovo vakayago, na veiyacovi tawadodonu, ivalavala dukadukali, ivalavala vakasisila, qaravi matakau, qaravi tevoro, veicati, veivala, vuvu, cudru, duiyaloyalo, veisei, muritamata, veivuvutaki, daumateni, marau vakalialia, kei na veika va ya.” (Kala. 5:19-21) A rawa gona ni cavuta o Paula e levu tale na itovo e okati me “vua ni itovo vakayago,” me vaka e tukuni ena Kolosa 3:5. E tukuna tale ga qori ni cavuta oti na ciwa na itovo vinaka, e kaya: “E sega na lawa e vakacala na ka kece qo.” Ena vosa vaKirisi, e rawa ni kena ibalebale tale ga “ka kece va qo.” E sega gona ni cavuta kece o Paula na itovo e uqeta na yalo tabu.

E matata qori nida vakatauvatana kei na ka e vola o Paula ina ivavakoso e Efeso: “Na vua ni rarama e okati kina na ivalavala vinaka kece, na yalododonu, kei na dina.” (Efeso 5:8, 9) Io, na “ivalavala vinaka,” salavata kei na yalododonu, kei na dina, e okati me “vua ni rarama,” e okati tale ga me “vua ni yalo tabu.”

E uqeti Timoci tale ga o Paula me “vakasaqara ga na veika e dodonu, na qarava na Kalou, na vakabauta, na loloma, na vosota, kei na yalomalua”—e ono na itovo vinaka. (1 Tim. 6:11) E tolu ga na itovo qori (vakabauta, loloma, kei na yalomalua) e cavuti ena “vua ni yalo tabu.” E macala ga ni na vinakata o Timoci na veivuke ni yalo tabu me vakaraitaka tale ga na vo ni itovo e cavuti, oya na veika e dodonu, na qarava na Kalou, kei na vosota.—Vakatauvatana Kolosa 3:12; 2 Pita 1:5-7.

Koya gona, e sega ni cavuti ena Kalatia 5:22, 23 na itovo kece mera vakaraitaka na lotu vaKarisito. Io, e rawa ni vukei keda na yalo tabu ni Kalou meda vakaraitaka na ciwa na itovo e cavuti ena “vua ni yalo tabu.” Ia ena vinakati meda vakaraitaka e levu tale na itovo vinaka me rawa nida lotu vaKarisito matua, meda tokara tale ga “na tamata vou e buli me vaka na loma ni Kalou e vauci kina na yalodina kei na yalododonu.”—Efeso 4:24.