1. Na cava eda rawa ni vakatauvatani Setani kina kei na dauvakasasa?

E NONA inaki levu na dauvakasasa me tobo manumanu se vakamatea. De dua ena duidui na nona dai, me vaka e tukuna e dua na itokani lasu i Jope. (Jope 18:8-10) Ena rairai bacana vakacava na dauvakasasa na manumanu ena nona dai? Ena vakaraica tiko na ka e cakava. E dau lako e vei? Cava e taleitaka? Na dai vinaka cava me vakayagataka? E vaka sara ga na dauvakasasa qori o Setani. Ena saga me kila na noda ivakarau ni bula. Ena vakaraica tiko na vanua eda lako kina kei na ka eda taleitaka. Oti ena biria nona dai meda coriti kina nida wele sara tu ga. Ia e vakadeitaka na iVolatabu nida se rawa tiko ga ni dro ke da coriti ena nona dai. E vakavulici keda tale ga ena sala meda dro tani kina.

2. Na cava na rua na dai i Setani e mana vakalevu?

² E rua na dai nei Setani e mana vakalevu ya na dokadoka kei na kocokoco. * Sa vica vata na udolu na yabaki nona rawai ira tiko e levu ena itovo ca qori. E vaka ga na daubiri dai e bacani ira na manumanu se tagavi ira. (Same 91:3) Ia e sega ni dodonu meda coriti ena dai i Setani. Na vuna? Sa vakaraitaka vei keda o Jiova na dai e dau vakayagataka o Setani.—2 Kor. 2:11.

3. Na cava e okata kina o Jiova ena iVolatabu eso na ivakaraitaki ni dokadoka kei na kocokoco?

³ Dua na sala e vakasalataki keda kina o Jiova me baleta na dokadoka kei na kocokoco, ya meda vuli ena nodra ivakaraitaki eso tale. O na raica ena ivakaraitaki eda na vulica ni o Setani e bacani ira sara ga na dauveiqaravi matua i Jiova. Kena ibalebale ya ni na dredre noda dro  tani mai na dokadoka kei na kocokoco? Sega, ni okata sara ga o Jiova eso na ivakaraitaki vakaivolatabu “me ivakasala vei keda.” (1 Kor. 10:11) E kila nida rawa ni vuli kina da qai dro tani mai na dai nei Setani.

4. Na cava na itinitini ni dokadoka?

⁴ E vinakata o Setani meda dokadoka. E kila ke da rawai ena dokadoka, eda na vakataki koya, da qai sega ni rawata na bula tawamudu. (Vkai. 16:18) E veivakasalataki na yapositolo o Paula ni rawa vua e dua me “dokadoka qai tau vua na itotogi e sa tau vua na Tevoro.” (1 Tim. 3:6, 7) E rawa ni yaco qori vei keda kece, ke da vou ena dina se da qaravi Jiova tiko mai vakadede.

5. Me vaka e tukuni ena Dauvunau 7:16, 20, ena vakaraitaka vakacava e dua na dokadoka?

⁵ O koya e dokadoka e nanumi koya ga. E saga o Setani meda nanumi keda ga nida kauaitaka vakalevu na ka e baleti keda, vakauasivi nida sotava na ka dredre da qai guilecavi Jiova. Kena ivakaraitaki, o sa bau beitaki vakailasu? E vakayacori vei iko na ka tawadodonu? E vinakata o Setani mo beitaki Jiova se ira na tacimu. E vinakata tale ga mo nanuma ni kena iwali duadua ga mo lewa tu ga na ka o cakava, mo kua ni muria na veidusimaki i Jiova ena nona Vosa.—Wilika Dauvunau 7:16, 20.

6. Na cava o vulica vua na tacida yalewa mai Necaladi?

⁶ Vakasamataka mada e dua na tacida yalewa mai Necaladi, e dau votivoti vua na nodra malumalumu eso na tacida. E nanuma ni sa sega sara ga ni vosota rawa. E kaya: “Dua na ka noqu galili, e sega ni veisau rawa na lomaqu. Au tukuna vei watiqu me keirau toki ina dua tale na ivavakoso.” Ia e qai sarava na porokaramu ni JW Broadcasting^® ni Maji 2016. E vakamacalataki kina eso na sala me vosoti kina nodra malumalumu eso tale.  E kaya na tacida qori: “Au raica ni dodonu meu kauaitaka mada ga na noqu malumalumu mai na noqu saga meu veisautaki ira na taciqu ena ivavakoso. E uqeti au na porokaramu qori meu kauaitaka na rai nei Jiova kei na nona veiliutaki cecere.” Cava eda vulica? Ni o sotava na ka dredre, mo dau nanumi Jiova. Kerei koya me vukei iko mo vakatotomuria nona rai me baleti ira na mataveitacini. E raica tu na Tamada vakalomalagi na nodra malumalumu, ia e tu vakarau ni vosoti ira. E vinakata tale ga mo vakatotomuri koya.—1 Joni 4:20.

7. Na cava e yacovi Tui Usaia?

⁷ Na dokadoka e vakavuna me talaidredre ina ivakaro o Tui Usaia e Juta qai siova na ka e sega ni dodonu me cakava. E turaga rawaka o Usaia. E qaqa ena ivalu, tara vale cecere, e levu tale ga na nona iteitei. “E tokoni koya na Kalou dina me rawa na nona sasaga.” (2 Vei. 26:3-7, 10) Ia e kaya na iVolatabu: “Ni kaukaua ga o koya, e qaciqacia mai na lomana me leqa kina.” A vakarota o Jiova ni o ira ga na bete mera vakama na ka boivinaka ena icabocabonisoro. Ia e siova o Tui Usaia na itavi qori ni curu e loma ni valenisoro qai cabora na ka boivinaka. E cudru o Jiova, mani totogitaka na turaga viavialevu qori me vukavuka tiko ga me yacova ni mate.—2 Vei. 26:16-21.

8. Me salavata kei na 1 Korinica 4:6, 7, eda na qarauna vakacava na dokadoka?

⁸ Vakacava eda rawa ni dokadoka me vakataki Usaia? Vakasamataka mada na ivakaraitaki nei José. E vakabisinisi levu, e dokai tale ga ni qase ni ivavakoso. E dau vunau ena soqo ni tabacakacaka kei na soqo ni veiwasewase, ra qai kere ivakasala vua na ivakatawa ni tabacakacaka. E kaya: “Au nuitaka ga na noqu taledi kei na ka au kila. Au sega ni vakararavi vei Jiova. Au nanuma niu sa dei, mani sega ni vakarorogo ena nona veivakadreti kei na ivakasala i Jiova.” E valavala ca bibi o José mani vakasivoi. Oti e vica na yabaki e vakalesui mai. E kaya: “E vakavulici au o Jiova ni sega ni bibi na itutu, e bibi ga meda cakava na ka e tukuna vei keda.” Meda nanuma tiko ni solia o Jiova na taledi kei na ilesilesi ena ivavakoso.  (Wilika 1 Korinica 4:6, 7.) Kevaka eda dokadoka ena sega ni vakayagataki keda.

9. Na cava rau cakava o Setani kei Ivi ena vuku ni nodrau kocokoco?

⁹ Ni tukuni na kocokoco eda na rairai vakasamataki Setani na Tevoro. Ni agilosi i Jiova, e rairai levu sara na itavi dokai e vakacolati kina. Ia e sivia tale na ka e vinakata. E vinakata me nona na sokalou e dodonu me caka ga vei Jiova. E saga mada ga meda vakataki koya, meda kua ni lomavakacegu ena ka sa tu vei keda. E tekivu nona sasaga ena gauna e vosa kina vei Ivi. E vakarautaka vakayalololoma o Jiova vei Ivi kei watina e levu na kakana me rau mamau kina “mai na vunikau kece ga e tu ena were,” vakavo ga e dua. (Vkte. 2:16) Ia e temaki Ivi o Setani me nanuma ni dodonu me kana tale ga mai na vunikau a vakatabui vei rau. E sega ni lomavakacegu o Ivi ena ka sa tu vua, e vinakata e levu tale na ka. Eda kila vinaka na kena itinitini. E valavala ca mani mate kina.—Vkte. 3:6, 19.

10. E rawai vakacava o Tui Tevita ena kocokoco?

¹⁰ Na kocokoco e vakavuna me guilecava o Tui Tevita na ka e solia vua o Jiova, okati kina na iyau, rogo kei na nona qaqa vei ira e levu na kena meca. E bau kaya mada ga o Tevita ni nona iloloma na Kalou vua e “sega ni tukuni rawa!” (Same 40:5) Ia dua na gauna e guilecava o Tevita na veika e solia qori vua o Jiova. E sega ni lomavakacegu kina, e vinakata e levu tale na ka. E levu na watina, ia e kocova na watina e dua tale na turaga. Qori o Pacisepa, na wati Uraia na Itaiti. Ni nanumi koya ga o Tevita e veiyacovi kina kei Pacisepa mani bukete. Sa veibutakoci mada qai ca sara ni tuvanaka me vakamatei o Uraia! (2 Sam. 11:2-15) Na cava mada e vakasamataka tu o Tevita? E nanuma ni sega ni raici koya tiko o Jiova? E yalodina tiko mai ia qai rawai ena kocokoco, mani vakaleqai kina. E vinaka ga ni a vakatusa nona cala qai veivutuni. Dua na ka nona vakavinavinaka ni vakadonui koya tale o Jiova!—2 Sam. 12:7-13.

11. Me vaka e tukuni ena Efeso 5:3, 4, eda na qarauna vakacava meda kua ni kocokoco?

¹¹ Na cava eda vulica vei Tevita? Eda  na sega ni kocokoco ke da dau vakavinavinakataka na ka kece e solia vei keda o Jiova. (Wilika Efeso 5:3, 4.) Meda lomavakacegu gona ena ka sa tu vei keda. Era uqeti na vuli iVolatabu vou mera vakasamataka e dua na ka era vakalougatataki kina, oti mera vakavinavinakataki Jiova. Ke ra cakava qori ena veisiga ena dua na macawa, kena ibalebale nira na vakavinavinakataka e vitu na ka. (1 Ces. 5:18) Vakacava o dau cakava qori? Ke o dau vakasamataka vakatitobu na ka kece sa cakava vei iko o Jiova, ena uqeti iko sara ga mo dau vakavinavinaka. Ni o lomavakacegu tale ga ena ka sa tu vei iko, o na sega ni rawai ena kocokoco.

12. Na cava e cakava o Jutasa ena vuku ni kocokoco?

¹² Na kocokoco e vakavuna nona cakava o Jutasa Isikarioti na itovo lolovira me liumuri. Ia a sega ni dau va tu qori o koya. (Luke 6:13, 16) A digitaki koya o Jisu me nona yapositolo. E dau cakacaka qai nuitaki me maroroya tiko na katonicau. E dau vakayagataka o Jisu kei ratou na yapositolo na ilavo qori me saumi kina na veika e vauca nodratou cakacaka vakavunau. Nikua, qori e vaka tiko na cau me baleta na cakacaka vakavunau e vuravura raraba. Yaco na gauna me tekivu butakoca na ilavo qori o Jutasa, ia sa rogoca vinaka tiko nona dau veivakasalataki o Jisu me baleta na kocokoco. (Mari. 7:22, 23; Luke 11:39; 12:15) E sega ni via rogoca na ivakasala qori o Jutasa.

13. E vakavotui vakacava na kocokoco i Jutasa?

¹³ E vakavotui na kocokoco nei Jutasa ena ka e yaco ni bera toka ga ni mate o Jisu. A sureti o Jisu kei ratou na nona tisaipeli, okati kina o Meri kei Marica, ina vale i Saimoni na vukavuka. Ni ratou kana tiko, e tucake o Meri qai livia e ulu i Jisu na waiwai boivinaka e saulevu. Qori e vakacudrui Jutasa kei ratou na vo ni tisaipeli. Ratou nanuma na vo ni tisaipeli ni rawa ni vakayagataki vinaka na isau ni waiwai qori ena cakacaka vakaitalatala. Ia e duatani na inaki nei Jutasa. E “daubutako” qai via butakoca na ilavo e tiko ena kato. Na kocokoco qori e vakavuna me volitaki Jisu kina ena isau ni dua na bobula.—Joni 12:2-6; Maciu 26:6-16; Luke 22:3-6.

14. Rau muria vakacava e dua na veiwatini na ivakavuvuli ena Luke 16:13?

¹⁴ E tukuna o Jisu vei ratou na nona imuri me ratou nanuma tiko na ka dina qo: “Dou na sega ni qarava rawa na Kalou kei na iYau.” (Wilika Luke 16:13.) Se dina tiko ga qori nikua. Vakasamataka mada e dua na veiwatini mai Romania, e uqeti rau na vosa i Jisu. Rau sureti me rau lai cakacaka vakalekaleka ena dua na vanua vutuniyau. Rau kaya: “E tiko e dua na neirau dinau levu ena baqe me saumi, keirau a nanuma ni qo e veivakalougatataki levu mai vei Jiova.” Ia e dua ga na leqa. Na cakacaka qori ena vakalatilati ena nodrau qaravi Jiova. Ni rau wilika oti ga na ulutaga “Yalodina Tiko ga ena Lomamu Taucoko” ena Vale ni Vakatawa ni Okosita 15, 2008, rau vakatulewa sara. Erau kaya: “Ke neirau inaki me keirau rawailavo vakalevu ena cakacaka e vanuatani, sa ikarua tiko ni ka na neirau veiwekani kei Jiova. Keirau vakadeitaka ni na vakaleqa neirau bula vakayalo.” Rau mani vakasuka na cakacaka qori. Cava e yaco? E raica o tagane e dua na cakacaka ena nona vanua e veiganiti vinaka kei na nodrau bula. E kaya sara o yalewa: “E sega ni lekaleka na liga i Jiova.” Rau  marau na veiwatini qo ni nodrau Turaga o Jiova, sega ni ilavo.

15. Eda vakadeitaka vakacava nida rawa ni dro tani mai na dai nei Setani?

¹⁵ Vakacava ke da kila nida sa dokadoka tiko se kocokoco? Eda se rawa tiko ga ni dro tani mai kina. E kaya o Paula ni rawa nira dro tani o ira na “coko bulabula tu” ena dai ni Tevoro. (2 Tim. 2:26) E rogoca o Tevita nona veivakadodonutaki o Necani, veivutunitaka nona kocokoco, rau qai veitokani voleka tale kei Jiova. Kua vakadua ni guilecava ni o Jiova e kaukaua sara vei Setani. Ke da ciqoma qo na veivuke nei Jiova, eda na dro tani mai na icori se dai kece ni Tevoro.

16. Na cava ena vukei iko mo kua ni coriti ena dai nei Setani?

¹⁶ E macala ni dodonu meda qarauna na dai nei Setani na dokadoka kei na kocokoco. Ena rawa ga qori ena veivuke ni Kalou. Ia meda kua ni nuitaki keda vakasivia! Eso mada ga na dauveiqaravi i Jiova era sa dede tu ena dina era rawai ena dokadoka kei na kocokoco. Mo masuti Jiova gona e veisiga mo kidava totolo ke sa vakamua tiko nomu rai kei na ka o cakava na itovo ca qori. (Same 139:23, 24) Mo kua vakadua ni coriti ena itovo qori!

17. Na cava ena vakarau yaco vua na keda meca na Tevoro?

¹⁷ Sa vica vata na udolu na yabaki nona dauvakasasa tiko o Setani. Sa voleka sara qo me vesu qai vakarusai. (Vkta. 20:1-3, 10) Eda vakanamata tu ena siga qori. Ia ena gauna qo, e bibi meda kila tiko na dai i Setani. Mo qarauna tiko ga mo kua ni rawai ena dokadoka se kocokoco. Mo “vorata na Tevoro, ena qai dro tani” vei iko.—Jeme. 4:7.