1. Na cava e solia vei keda o Jiova?

E SOLIA vei keda o Jiova na galala meda digia na ka meda cakava. E vakavulici keda ena sala meda vakatulewa kina vakavinaka, e vukei keda tale ga me tini vinaka na noda sasaga nida vakatulewataka na ka e vakamarautaki koya. (Same 119:173) Nida muria e veigauna na ivakasala vuku ena Vosa ni Kalou, ena vinaka tiko ga na noda vakatulewa.—Iper. 5:14.

2. Na cava e rawa ni yaco nida vakatulewa oti?

² Ke vinaka mada ga na noda vakatulewa, ena rairai dredre meda vakaotia na ka eda tekivuna. Qo eso na kena ivakaraitaki: E vakatulewataka e dua na tacida tagane itabagone me wilika taucoko na iVolatabu. E toso vinaka sara na nona wiliwili me vica na macawa, oti ga sa lai cegu tu. E vakatulewataka e dua na tacida yalewa me painia tudei, ia e lokuyara tiko ga ena tikinisiga me tekivu kina. E duavata na ilawalawa qase me vakayacori na veivakatawani ena ivavakoso, ia e sega ni tekivu rawa ni oti e vica na vula. E duidui kece na ituvaki qori, ia dua na ka e tautauvata kina. Na cava ya? Sa vakatulewataki oti na ka, e sega ga ni caka. E yaco tale ga qori vei ira na lotu vaKarisito ena imatai ni senitiuri. Meda dikeva mada se cava eda vulica vei ira.

3. Na cava era vakatulewataka e Korinica? Cava e qai yaco?

³ Ena rauta na 55 G.V., era vakatulewataka e Korinica e dua na ka bibi. Era rogoca ni dredre sara na ituvaki era sotava tiko na tacidra e Jerusalemi kei Jutia, era dravudravua tale ga. Era soqoni ilavo eso tale na ivavakoso mera vukei kina. Ena nodra lomasavu kei na nodra veikauaitaki e Korinica, era  vakatulewataka mera veivuke tale ga, era mani kerei Paula ena sala mera veivuke kina. E vakamacalataka ena ivavakoso o Paula na ka me caka, sa qai lesi Taito me veivuke ena kumuni cau. (1 Kor. 16:1; 2 Kor. 8:6) Ni oti e vica na vula, e qai rogoca o Paula nira se sega ni cau e Korinica me vaka era yalataka. Na cava e qai yaco? Na gauna me sa kau kina na iloloma e Jerusalemi, se bera tu ga ni kumuni na nodra cau e Korinica ni vakatauvatani kei na vo ni ivavakoso.—2 Kor. 9:4, 5.

4. Me vaka e tukuni ena 2 Korinica 8:7, 10, 11, na cava e tukuna o Paula vei ira e Korinica?

⁴ Dua na vakatulewa vinaka era cakava e Korinica, e vakacaucautaki ira o Paula ena dei ni nodra vakabauta kei na gu ni lomadra mera soli ka. Ia e uqeti ira tale ga o Paula mera vakaotia sara na ka era tekivuna. (Wilika 2 Korinica 8:7, 10, 11.) Na cava eda vulica ena nodra ivakaraitaki? Ena rawa ni ka ni sasaga tale ga vei keda na lotu vaKarisito yalodina meda cakava na ka vinaka eda vakatulewataka.

5. Na taro cava meda sauma?

⁵ Me vakataki ira e Korinica, ena rairai ka ni sasaga tale ga meda cakava na ka eda vakatulewataka. Nida ivalavala ca, ena rawa nida lokuyara. Se, so na gauna ni dau yaco na ka e sega ni namaki, eda na sega ni cakava kina na ka eda vakatulewataka. (Dauv. 9:11; Roma 7:18) Eda na dikeva tale vakacava na noda vakatulewa meda kila ke vinakati me veisau? Eda na vakadeitaka vakacava meda vakaotia sara na ka eda tekivuna?

6. Na cava ena rairai veisau kina na noda vakatulewa?

⁶ Eso na noda vakatulewa bibi ena sega ni rawa ni veisau. Me vaka na cava? Eda na dei tiko ga ena noda vakatulewa meda qaravi Jiova, eda na vakadeitaka tale ga meda yalodina tiko ga vei watida. (Maciu 16:24; 19:6) Ia eso tale na vakatulewa ena rairai vinakati me veisau. Na vuna? Ni dau veisau na ituvaki. Na cava gona meda cakava meda vakatulewa kina vakavinaka?

7. Na cava meda kerea? Na vuna?

⁷ Kerea na vuku. E uqeti Jemesa o Jiova me vola: “Ke dua vei kemuni e lailai vua na vuku, me kerea tiko ga vua na Kalou, ni na soli vua. Ni lomasavu o koya vei keda kece.” (Jeme. 1:5) E dau ‘lailai vei keda kece na vuku.’ Kena ibalebale, ena vinakati meda nuitaki Jiova ena gauna eda vakatulewa kina kei na gauna me veisau kina e dua na ka eda sa vakatulewataka oti. Ena vukei keda o Jiova meda vakatulewa vakavinaka.

8. Eda na vakekeli vakacava ni bera nida vakatulewa?

⁸ Vakekeli vinaka. Dau rai ena Vosa ni Kalou, wilika na ivola e vakarautaka na isoqosoqo i Jiova, qai kere ivakasala vei ira o nuitaka. (Vkai. 20:18) E bibi dina na vakekeli va qori ni bera nida vakatulewataka me veisau na noda cakacaka, meda toki, se digia na vuli me tokona noda cakacaka vakaitalatala.

9. Ena yaga vakacava nida dau dina?

⁹ Vakalewa nomu inaki. E bibi vei Jiova na noda inaki. (Vkai. 16:2) E vinakata meda dina ena ka kece. Kena ibalebale, nida vakatulewataka e dua na ka me baleti keda se so tale, e bibi meda dau dina ena noda inaki. Ke da sega ni dau dina, ena rawa ni dredre meda dei ena noda vakatulewa. Kena ivakaraitaki, ena rairai vakatulewataka e dua na tacida tagane itabagone me painia tudei. Ia ni toso na gauna, sa dredre vua me rawata na aua e lavaki vei ira na painia. Sa sega ni marautaka na nona cakacaka vakaitalatala. De dua e nanuma ni inaki ni nona painia me vakamarautaki Jiova. Ia e rairai  painia ga ni via vakamarautaki rau nona itubutubu se dua tale.

10. Na cava e vinakati me rawa nida veisau?

¹⁰ Dikeva mada e dua na ituvaki qo: E vakatulewataka e dua na vuli iVolatabu me sa muduka nona vakatavako. E ka ni sasaga ni se qai tekivu. E sega ni vakatavako tu me dua se rua na macawa, ia e qai vakatavako tale. Toso na gauna sa qai biuta vakadua! E muduka rawa ga na vakatavako ni lomani Jiova, e gu tale ga na lomana me vakamarautaki koya.—Kolo. 1:10; 3:23.

11. Na cava me matata kina na nomu isausau?

¹¹ Me matata na nomu isausau. Ke matata na nomu isausau, ena rawarawa sara mo vakaotia na ka o tekivuna. Kena ivakaraitaki, de dua o rairai vakatulewataka mo wilika vakalevu na iVolatabu. Ke sega ni dua na nomu ituvatuva, o na rairai sega ni cakava rawa na ka o vakatulewataka. * Se, ratou rairai vakatulewataka na qase me ratou veivakatawani vakalevu ena ivavakoso, ia ni toso na gauna, eratou sega tale ni dei ena nodratou vakatulewa. Me kua ni yaco qori, ena vinaka me ratou taroga: “Vakacava keitou sa vola rawa tu na yacadra na mataveitacini mera vakatawani? Keitou sa lokuca oti tu na gauna?”

12. Na cava ena rairai vinakati meda cakava? Na vuna?

¹² Me donu nomu rai. O keda kece e sega na noda gauna, iyau, kei na kaukaua meda vakayacora kina na ka kece eda vinakata. E bibi gona me donu noda rai, meda yalorawarawa tale ga. E tiko na gauna ena rairai vinakati meda veisautaka noda vakatulewa nida sega ni cakava rawa. (Dauv. 3:6) Ia kaya mada ni o sa dikeva na nomu vakatulewa, o veisautaka, o qai nanuma ni o rawa ni cakava. Dikeva mada e lima na ka mo cakava, mo vakaotia kina na ka o tekivuna.

13. O na vakaukauataki vakacava mo cakava na ka o vakatulewataka?

¹³ Kerea vei Jiova na kaukaua mo cakava sara. O Jiova ga ena solia vei iko na kaukaua mo “cakava sara” na ka o vakatulewataka. (Fpai. 2:13) Kerea gona vua me solia vei iko na nona yalo tabu me vakaukauataki iko. Ke o nanuma ni berabera ni saumi na nomu masu, masu tiko ga. Me vaka e tukuna o Jisu: “Dou kerekere tiko ga, ena qai soli [na yalo tabu] vei kemudou.”—Luke 11:9, 13.

14. Ena yaga vakacava na Vosa Vakaibalebale 21:5 mo cakava na nomu vakatulewa?

¹⁴ Me dua nomu ituvatuva. (Wilika Vosa Vakaibalebale 21:5.) Me vakaoti e dua na cakacaka, ena vinakati me dua na ituvatuva. Oti me muri sara. E va tale ga qori ni o vakatulewa. E vinakati mo vola kece na ka mo cakava, mo rawa ni vakaotia vinaka. Wasewasea vakalalai na cakacaka e dau kania na gauna mo kila na toso ni cakacaka. E uqeti ira e Korinica o Paula mera biuta vakatikitiki eso na ka me nodra cau “ena imatai ni siga kece e veimacawa,” mera kua ga ni qai kumuni ilavo ni sa yaco yani. (1 Kor. 16:2) Ni o wasewasea vakalalai na ka mo cakava, o na sega ni vakacauoca.

15. Na cava mo vola kina na ka o lalawataka?

¹⁵ Ke o vola na ka o lalawataka, ena rawarawa sara mo cakava. (1 Kor. 14:40) Kena ivakaraitaki, e dusimaki na ilawalawa qase me lesia e dua na qase ni ivavakoso me vola na ka kece eratou dau vakatulewataka, wili kina o cei e lesi me cakava, kei na tikinisiga me vakaoti kina. Nira muria qori na qase ni ivavakoso, ena rawarawa sara mera cakava  na ka e vakatulewataki. (1 Kor. 9:26) Mo cakava tale ga qori ni o qarava eso na nomu itavi ni veisiga. Kena ivakaraitaki, o rawa ni vola na ka mo cakava ena veisiga yadua, mo vola sara e cake na ka mo cakava e liu. Ni o cakava qori, o na vakaotia vinaka na ka o tekivuna, o na vakabula gauna tale ga.

16. Na cava e vinakati meda cakava kina na noda vakatulewa? E tokona vakacava qori na Roma 12:11?

¹⁶ Mo sasaga tiko ga. E vinakati na sasaga mo cakava na ka o lalawataka, mo vakaotia kina na ka o tekivuna. (Wilika Roma 12:11.) Me qasenivuli vinaka o Timoci, e kaya vua o Paula me “gumatua tiko ga” me “tudei kina.” Na ivakasala qori e yaga tale ga vei keda nikua ena noda isausau vakayalo.—1 Tim. 4:13, 16.

17. E yaga vakacava na Efeso 5:15, 16 meda cakava kina na ka eda vakatulewataka?

¹⁷ Vakayagataka vinaka nomu gauna. (Wilika Efeso 5:15, 16.) Lokuca na gauna mo cakava kina na ka o vakatulewataka, mo dei tale ga. Kua ni waraka me vinaka sara na ituvaki mo qai cakava, ena rairai sega ni veisau na ituvaki. (Dauv. 11:4) Mo qarauna me kua ni kania nomu gauna eso na ka e sega ni bibi, ena sega kina na igu mo cakava eso na ka era bibi sara. (Fpai. 1:10) Ke rawa, lokuca na gauna era na rairai sega ni vakasosani iko kina eso tale. Tukuna vei ira ni bibi vei iko na gauna qori mo cakava kina na ka o lalawataka. Rawa ni bokoca nomu talevoni, raica malua tale ga nomu imeli se sala ni veikilai ena Internet. *

18-19. Na cava mo cakava mo kua kina ni soro ni basika na ituvaki dredre?

¹⁸ Vakasamataka na kena yaga. Na ka e rawati se na yaga ni nomu vakatulewa e vaka e dua na vanua o lako tiko kina. Ke o via yaco ena vanua qori, o na tomana tiko ga na nomu ilakolako ke vinakati mada ga mo muria e dua tale na gaunisala. E va tale ga qori nida vakasamataka na yaga ni noda vakatulewa, eda na sega vakadua ni soro se vakacauoca ni basika na ituvaki dredre se vakalatilati eso na ka.—Kala. 6:9.

¹⁹ E sega ni rawarawa meda vakatulewa vinaka, e ka ni sasaga tale ga meda muria sara. Ia o Jiova ga ena solia vei iko na vuku kei na kaukaua mo vakaotia na ka o tekivuna.