1. Na cava eda vinakata kece vei ira na wekada?

“ENA gauna au vulica kina na ka dina, au vinakata mera bula tale ga ena Parataisi na lewe kece ni noqu vuvale. Au vinakata sara ga me mai qaravi Jiova na watiqu o Wame, kei na luvequ tagane lailai,” e kaya e dua na tacida yalewa o Paulina. * Vakacava era tiko na wekamu era se bera ni kilai Jiova mera lomani koya? Me vakataki Paulina, de dua o na vinakata mera mai kilai Jiova tale ga.

2. Na taro cava eda na veivosakitaka ena ulutaga qo?

² Eda na sega ni vakasaurarataki ira na wekada mera rogoca na itukutuku vinaka. Ia eda na uqeti ira mera vakasamataka na itukutuku ena iVolatabu ra qai muria. (2 Tim. 3:14, 15) Na cava meda vunau kina vei ira na wekada? Na cava e bibi kina meda kauaitaki ira? Eda na vukei ira vakacava mera lomani Jiova tale ga? Era na veivuke vakacava na lewe ni ivavakoso?

3. Me vaka e cavuti ena 2 Pita 3:9, na cava meda vunau kina vei ira na wekada?

³ Sa voleka ni vakarusa o Jiova na ituvaki ca qo. Era na bula ga o “ira na yalomalumalumu era muria na sala mera bula tawamudu kina.” (Caka. 13:48) Eda dau vakayagataka e levu na gauna kei na igu meda vunau kina vei ira eda sega ni kila, e macala gona nida vinakata mera mai  qaravi Jiova tale ga na wekada. Na Tamada dauloloma o Jiova e “sega ni vinakata me rusa e dua, e vinakata ga [mera] veivutuni kece.”—Wilika 2 Pita 3:9.

4. Ena rairai vakacava noda vosa nida vunau vei ira na wekada?

⁴ E bibi meda nanuma ni tiko na iwalewale donu meda wasea kina na itukutuku ni veivakabulai, e tiko tale ga na iwalewale e cala. De dua eda na vosa vakayalovinaka nida vunau vua e dua eda sega ni kila, ia eda vosa vakaukaua nida vunau vei ira na wekada.

5. Na cava meda nanuma tiko ni bera nida wasea na ka dina vei ira na wekada?

⁵ Kena irairai ni levu vei keda eda veivutunitaka na sala eda wasea kina vei ira na wekada na itukutuku vinaka ena imatai ni gauna, eda diva ga meda vosa vakayalovinaka vei ira. E vakasalataki keda na lotu vaKarisito na yapositolo o Paula: “Moni vosa ena yalovinaka ena gauna kece, me vakamasima, moni kila kina na ka moni tukuna vua na tamata yadua.” (Kolo. 4:5, 6) Meda kua mada ga ni guilecava na ivakasala qo nida vunau vei ira na wekada. Ke sega eda na rawa ni vakacudrui ira, eda sega ni vukei ira mera vakarorogo.

6-7. Tukuna e dua na ivakaraitaki e bibi kina mera kauaitaki na isa ni vakawati era sega ni tiko ena dina.

⁶ Mo dau veikauaitaki. E kaya o Paulina sa cavuti oti mai: “Au dau via wasea tu ga na ka vakayalo vei watiqu. Keirau sega ni dau veivosakitaka eso tale na ka.” Ia e sega ni kila vinaka na iVolatabu o Wame, e sega gona ni matata vua na ka e dau vakamacalataka o Paulina. E nanuma o Wame ni sa kauaitaka tu ga o Paulina na nona  lotu. E leqataka de sa vakacalai o watina, sa lewena tale ga e dua na isoqosoqo lotu rerevaki.

⁷ E tukuna o Paulina ni dau vakayagataka e levu na yakavi kei na muanimacawa kei ira na mataveitacini ena soqoni, cakacaka vakavunau, kei na veimaliwai. E kaya, “Ni lesu mai vale o Wame sa lala tu ga na vale, e galili kina.” E macala ni vinakata me veimaliwai kei rau na nona veitinani. E sega ni kilai ira na veimaliwai tiko kei Paulina, e nanuma ni sa kauaitaki ira vakalevu, sa lailai nona kauaitaki koya. E mani tukuna o Wame me rau sa veisere. Vakacava o raica na sala e rawa ni kauaitaki watina kina vakalevu o Paulina?

8. Me vaka e cavuti ena 1 Pita 3:1, 2, na cava era dau kauaitaka vakalevu na wekada?

⁸ Me vosa na nomu itovo. Era dau kauaitaka vakalevu na wekada na ka eda cakava, sega soti na ka eda tukuna. (Wilika 1 Pita 3:1, 2.) Qori na ka e qai liaca o Paulina. E kaya, “Au kila ni lomani keirau o Wame, e sega ni vinakata dina na veisere. Ia ni tukuna me keirau sa veisere, au qai liaca ni dodonu meu muria na ka e tukuna o Jiova me baleta na vakawati. Me sa kua ni levu noqu vosa, e bibi me vinaka na noqu itovo.” Sa sega ni vakasaurarataki Wame o Paulina me rau veivosakitaka na iVolatabu, rau sa veivosakitaka ga eso tale na ka me baleta na bula ni veisiga. E raica o Wame ni sa malua na itovo nei Paulina, sa talairawarawa o luvedrau, e vakaitovo tale ga. (Vkai. 31:18, 27, 28) Ni raica o Wame na yaga ni itukutuku ena iVolatabu vei rau na nona veitinani, e tekivu kauaitaka na ka e kaya na Vosa ni Kalou  kei na sala me muria kina.—1 Kor. 7:12-14, 16.

9. Na cava meda kua kina ni soro?

⁹ Kua ni soro ni vukei ira na wekamu. O Jiova e ivakaraitaki vinaka vei keda. E “wasoma” ni vukei ira nona tamata mera rogoca na itukutuku vinaka mera bula kina. (Jere. 44:4) E tukuna tale ga vei Timoci na yapositolo o Paula me kua ni soro ni vukei ira tiko ga eso tale. Na vuna? Ena vakabulai kina kei ira na rogoci koya. (1 Tim. 4:16) Eda lomani ira na wekada, eda vinakata gona mera kila na ka dina ena Vosa ni Kalou. Me vakataki Paulina, e yaga dina ena nona vuvale na ka e tukuna kei na nona itovo. Dua na ka na nona marau ni sa tomani koya o watina me qaravi Jiova. Rau sa painia tiko ena gauna qo, e qase ni ivavakoso tale ga o Wame.

10. Na cava e bibi kina na vosovoso?

¹⁰ Mo dau vosovoso. Nida vakatulewataka meda muria na ivakatagedegede ni Kalou, ena rairai dredre vei ira na wekada mera ciqoma na noda vakabauta kei na ivakarau ni bula vou. Na imatai ni ka era na liaca nida sa sega ni tomani ira ena nodra soqo ni lotu kei na veika vakapolitiki. De dua era na cudruvi keda kina eso na wekada. (Maciu 10:35, 36) Ia meda kua ni soro ni vukei ira mera kila na ka eda vakabauta. Ke da soro, sa vaka meda lewa tiko ni sega ni ganiti ira mera bula tawamudu. E sega ni lesi keda o Jiova meda vakataulewa, e lesia na itavi qori vei Jisu. (Joni 5:22) Ke da vosovoso, de dua era na yalorawarawa ni rogoca na itukutuku vinaka.—Raica na kato “ Meda Vunau Nida Vakayagataka na Noda Website.”

11-13. Na cava o vulica ena itovo nei Alisi vei rau na nona itubutubu?

¹¹ Mo yalovinaka, mo dei tale ga. (Vkai. 15:2) Dikeva mada na ivakaraitaki nei Alisi. E vulici Jiova ni yawa tu mai vei rau na nona itubutubu, erau dau tokona na veika vakapolitiki, erau sega tale ga ni vakabauta na Kalou. E kila o Alisi ni dodonu me tukuna vakatotolo vei rau na veika vinaka e vulica tiko. E kaya, “Ke o sega ni tukuna totolo vei ira na wekamu na nomu vakabauta vou kei na ka o dau cakava, era na rarawa vakalevu.” E vakasamataka eso na ulutaga erau na taleitaka na nona itubutubu me vaka na loloma. Oti sa qai volavola vei rau, e tukuna na ka e kaya na iVolatabu me baleta na ulutaga qori qai taroga se cava na nodrau rai. (1 Kor. 13:1-13) E vakavinavinakataka nodrau veisusu, e vakau iloloma tale ga. Ni gade vei rau, e dau vukei tinana vakalevu ena cakacaka ni vale. Erau a sega ni taleitaka ena imatai ni gauna ni tukuna o Alisi na nona vakabauta vou.

¹² Ni tiko o Alisi kei rau na nona itubutubu, e dei tiko ga na nona ituvatuva ni wili iVolatabu. E kaya, “Niu cakava qori, e kila kina o Na ni bibi vei au na iVolatabu.” E vinakata o tamai Alisi me vulica eso na ka ena iVolatabu me kila na vuna e veisau kina o luvena, e saga tale ga me vakacala na iVolatabu. E kaya o Alisi, “Au solia vua e dua na iVolatabu, au ciqira tale ga e loma e dua na ivola lekaleka.” Na cava e yaco? E uqeti tamai Alisi na ka e wilika ena Vosa ni Kalou, e sega tale ga ni vakacala.

¹³ E vinakati meda dei, meda vosa tale ga vakayalovinaka nida vakacacani. (1 Kor. 4:12b) Kena ivakaraitaki o Alisi, e  vosota nona veitusaqati o tinana. E kaya, “Na gauna au papitaiso kina, e tukuna o Na niu ‘gone ca.’” Na cava e cakava? E tomana: “Au sega ni tu suka, au vakamacalataka ena veidokai niu sa vakatulewataka meu iVakadinadina i Jiova, ena sega ni veisau na noqu vakatulewa. Au saga meu vakadeitaka vei Na niu lomani koya vakalevu. Keirau veitagicaki, au saqara tale ga na kakana e dau taleitaka vakalevu. Tekivu ena gauna qori, e vakadinata o Na ni veisautaki au na iVolatabu.”

14. Na cava meda kua ni vakamalumalumu kina vei ira na wekada?

¹⁴ Ena rairai taura na gauna mera qai kila na wekada na bibi ni noda qaravi Jiova. Kena ivakaraitaki, e vakatulewataka o Alisi me painia. E tagi tale o tinana ni sega ni digia na cakacaka erau vinakata. Ia e dei tu ga o Alisi. E kaya, “Ke o vakamalumalumu ena dua na ituvaki era uqeta na wekamu, de dua era na lewai iko ena so tale na ka. Ke o dei, o yalovinaka tale ga vei ira, e rawa nira vakarorogo eso.” Qori na ka e cakava o Alisi. Erau sa painia ruarua tiko ena gauna qo na nona itubutubu, e qase ni ivavakoso o tamana.

15. Me vaka e cavuti ena Maciu 5:14-16 kei na 1 Pita 2:12, ena uqeti ira vakacava na wekada na noda “cakacaka vinaka”?

¹⁵ E vakayagataka o Jiova na noda “cakacaka vinaka” na lewe ni ivavakoso vaKarisito me vagolei ira mai na lewenivanua mera mai kilai koya. (Wilika Maciu 5:14-16; 1 Pita 2:12.) Ke sega ni iVakadinadina  i Jiova o kemu isa, vakacava sa bau sotavi ira mada na lewe ni nomu ivavakoso? O Paulina sa cavuti oti mai, e dau sureti ira na mataveitacini ina nona vale mera veikilai kei Wame na watina. E vakasamataka lesu o Wame na ka e cakava e dua na tacida tagane me veisautaka na nona rai: “E cegu mai na cakacaka ena dua na siga me keirau mai sara qito. Au kaya, ‘Eda tautauvata ga!’”

16. Na cava meda sureti ira kina na wekada ena soqoni?

¹⁶ E dua na sala vinaka meda vukei ira kina na wekada oya nida sureti ira ena soqoni. (1 Kor. 14:24, 25) Na imatai ni soqoni e tiko kina o Wame, oya na iVakananumi ni vakayacori ni suka na cakacaka, e lekaleka tale ga. E kaya, “Au sega ni nanuma na ka e vunautaki, ia au nanumi ira vinaka na tiko kina. Era mai vakabula, era lululu tale ga. Au vakadeitaka nira dau dina.” E dua na veiwatini erau dau kauaitaki Paulina, rau dau vukei rau vakaveitinani ena soqoni kei na cakacaka vakaitalatala. Ni vakatulewataka o Wame me kila eso tale na ka ena vakabauta vou nei Paulina, e kerea me rau vulica vata na iVolatabu kei na tacida tagane qori.

17. Na cava ena sega ni beitaki vei keda? Cava meda kua kina ni soro ni vukei ira na wekada?

¹⁷ Eda nuitaka tu nira na mai qaravi Jiova tale ga na wekada. Ia se mani vakacava na noda sasaga, de dua era na sega ni gole mai ina dina. Ke yaco qori eda na sega ni beitaki kina, nida sega ni vakasaurarataka e dua me ciqoma na noda vakabauta. Ia ena rawa ni uqeti ira nira raica nida marautaka tiko na noda qaravi Jiova. Meda masulaki ira, vosa vakayalovinaka, meda kua tale ga ni soro ni vukei ira! (Caka. 20:20) Eda nuidei ni na vakalougatataka o Jiova na noda sasaga. Ke ra vakarorogo na wekamu, era na bula!