1. Na veika vinaka cava era cakava e levu na gone?

 ERA papitaiso ena veiyabaki e vica vata na udolu na gone. Vakacava o dua vei ira? Macala ga nira marautaka qori na mataveitacini, vaka kina o Jiova. (Vkai. 27:11) Vakasamataka mada e levu na ka vinaka o sa cakava. De dua e vica na yabaki nomu vulica vagumatua na iVolatabu, o vakadeitaka tale ga ni Vosa ni Kalou na iVolatabu. E bibi sara nomu mai kilai koya e vakavuna na iVolatabu, o lomani koya tale ga. E uqeti iko nomu lomani Jiova mo saga mo toso mo yalataki iko vua qai papitaiso mo nona dauveiqaravi. Sa bau totoka dina qori!

2. Na cava eda na veivosakitaka ena ulutaga qo?

 ² E macala ni na vakatovolei vakalevu nomu vakabauta ni o saga tiko mo papitaiso. Ia ni o sa qase cake ena levu tale na veivakatovolei vou o na sotava. Ena saga o Setani mo kua ni lomani Jiova vakalevu, me vakamuai iko tani mai na nomu sokalou. (Efeso 4:14) Mo qarauna sara qori. Na cava ena vukei iko mo yalodina tiko ga mo vakayacora na ka o yalataka? E bibi mo toso tiko ga vakayalo, mo “saga sara” mo lotu vaKarisito matua. (Iper. 6:1) Ia o na rawata vakacava qori?

3. Na cava mera saga kece na lotu vaKarisito nira papitaiso oti?

³ Nida sa papitaiso oti, ena vinakati meda muria kece nona ivakasala na yapositolo o Paula vei ira na lotu vaKarisito e Efeso. E uqeti ira mera “tamatabula” vakayalo.  (Efeso 4:13) E vaka me kaya tiko vei ira, ‘Moni saga moni matua.’ Eda rawa ni kila na ka e tukuna tiko o Paula ni vakatauvatana na tubu vakayalo kei na nona tubu vakayago e dua na gone. E nodrau isakisaki na itubutubu na luvedrau sucu vou, rau marautaki koya tale ga. Ia ena sega ni gonedramidrami tiko ga. Yaco na gauna sa na biuta kina na “itovo vagonegonea.” (1 Kor. 13:11) Eda va tale ga qori na lotu vaKarisito. Nida papitaiso oti ena vinakati meda saga meda matua. Meda veivosakitaka mada qo eso na sala eda rawa ni cakava kina qori.

4. Na itovo cava ena vukei keda meda matua vakayalo? Vakamacalataka. (Filipai 1:9)

⁴ Saga mo lomani Jiova vakalevu. Sa kilai tiko ni o lomani Jiova. Ia e vinakati mo saga mo lomani koya vakalevu. Ena sala cava? E dua na sala e tukuna na yapositolo o Paula ena Filipai 1:9. (Wilika.) E masulaka o Paula me “tubu vakalevu” nodra loloma na lewe i Filipai. E rawa gona ni vakalevutaki na noda loloma. Eda na cakava qori nida ‘kila na veika dina’ kei na noda “kila vinaka na loma ni Kalou.” Na levu ga ni noda kilai Jiova, eda na lomani koya vakalevu, eda na taleitaka tale ga na nona itovo kei na ka e dau cakava. Eda na vinakata meda vakamarautaki koya tiko ga, eda na sega ni via vakararawataki koya. Eda na saga meda kila na nona inaki kei na sala meda tokona kina.

5-6. Ena rawa vakacava nida lomani Jiova vakalevu? Vakamacalataka.

⁵ Eda na lomani Jiova vakalevu nida kilai Luvena vinaka, e ucuya vinaka na itovo nei Tamana. (Iper. 1:3) Na sala vinaka duadua eda na kilai Jisu kina oya nida vulica na va na Kosipeli. Ke o sega ni vakamatauni iko ena wili iVolatabu e veisiga, vakacava mo tekivu sara ga qo? Ni o wilika na itukutuku kei Jisu, vakasamataka vakabibi nona itovo. E dau torovi rawarawa, e lomani ira na gone, e keveti ira tale ga. (Mari. 10:13-16) Ni tiko kei ratou nona tisaipeli, e dau yalovinaka vei ratou, ratou sega ni rere ni tukuna na lomadratou. (Maciu 16:22) Ni cakava qori, e vakatotomuri Tamana vakalomalagi vinaka kina. O Jiova e dau torovi rawarawa tale ga. Eda rawa ni masu vua. Nida masu, eda rawa ni talaucaka vua na lomada. Eda nuidei gona ni na sega ni vakalewai keda. E lomani keda, e kauaitaki keda tale ga.—1 Pita 5:7.

⁶ E dau lomani ira vakalevu na lewenivanua o Jisu. E vola na yapositolo o Maciu: “Ni raici ira na ilala levu, e lomani ira nira suivotu qai biu wale tu me vaka na sipi e sega na kena ivakatawa.” (Maciu 9:36) Vakacava na rai nei Jiova? E kaya o Jisu: “E sega tale ga ni taleitaka na Tamaqu mai lomalagi me rusa e dua vei ira na lalai qo.” (Maciu 18:14) Sa bau veivakauqeti dina! Nida kilai Jisu vinaka, eda na lomani Jiova kina vakalevu.

7. Ena yaga vakacava nomu veimaliwai kei ira na lotu vaKarisito matua?

⁷ O na vulica tale ga mo dau loloma mo lotu vaKarisito matua, ni o kilai ira vinaka na tacida matua ena ivavakoso. Mo raica nodra dau mamarau. Era sega ni veivutunitaka nodra vakatulewa mera qaravi Jiova. Kerei ira mera talanoataka na veika era sotava nira veiqaravi tiko vei Jiova. Ni vinakati mo vakatulewataka e dua na ka bibi, kere ivakasala vei ira. E dau “rawa na sasaga ni levu na daunivakasala.”—Vkai. 11:14.

8. Na cava mo cakava ke o vakatitiqataka na ka e kaya na iVolatabu?

 ⁸ Kua ni vakatitiqa. Me vaka e tukuni ena  parakaravu 2, ena saga o Setani mo kua ni toso tiko vakayalo. Dua na sala ena rairai cakava kina qori nona vakavuna mo vakatitiqataka eso na ivakavuvuli vakaivolatabu. Kena ivakaraitaki, toso na gauna o na vulica na ivakavuvuli e beci kina na Kalou, ya na bula vakaidewadewa. De dua o sega ni vakasamataka qori ni o se gone, ia qo ni o sa qase o na rairai vakavulici kina e koronivuli. Na ka era kaya na qasenivuli e vaka sara ga me dina tu qai vakabauti. De dua era sega ni vakasamataka vakabibi na ivakadinadina ni bula dina tiko e dua na Dauveibuli. Mo nanuma na ivakavuvuli ena Vosa Vakaibalebale 18:17: “O koya e vosa e liu ena nona kisi ena via donu toka, me lako mada yani na ito kadua me vakatarogi koya.” Kua ni muria tu ga vakamataboko na ivakavuvuli o rogoca e koronivuli e tukuni ni dina, vakasamataka vakabibi na itukutuku ena Vosa ni Kalou na iVolatabu. Dau vakekeli ena noda ivola. Saga mo veitalanoa tale ga kei ira na tacida era vakabauta tu e liu na bula vakaidewadewa. Tarogi ira se cava e vakadeitaka mera vakabauta ni bula tiko na Dauveibuli e lomani keda. Na veitalanoa veiuqeti va qori o na kauaitaka kina vakabibi na ka dina.

9. Na cava o vulica vei Mela?

⁹ E yaga vakalevu vua e dua na tacida o Mela na nona vakekeli ena ulutaga me baleta na ibulibuli. b E kaya: “Ni vakavulici na bula vakaidewadewa mai koronivuli e vaka sara ga me dina tu. Au a sega ni via vakekeli. Au lomaleqa ni na sega ni yaga noqu vakabauta ena gauna au veitarogi kina. Ia au qai vakasamataka ni sega ni vinakata o Jiova meda qaravi koya tu ga vakamataboko. Au mani vakekeli. Au wilika na ivola Is There a Creator Who Cares About You? kei na brochure Was Life Created? vaka kina The Origin of Life—Five Questions Worth Asking. Qori sara ga na ka au vinakata. Au diva ga meu se cakava totolo.”

10-11. Na cava mo cakava mo savasava tiko ga? (1 Cesalonaika 4:3, 4)

¹⁰ Cata na itovo ca. Dau kaukaua sara na gagadre ni veiyacovi ena bula vakaitabagone,  o rawa sara ga ni temaki mo veiyacovi tawadodonu. E vinakata o Setani mo rawai ena nomu gagadre. Cava mo cakava mo savasava tiko ga? (Wilika 1 Cesalonaika 4:3, 4.) Ni o masu vakataki iko, talaucaka na lomamu vei Jiova. Tukuna vua na ka e tu e lomamu, kerea tale ga me vakayaloqaqataki iko. (Maciu 6:13) Nanuma tiko ni via vukei iko o Jiova, e sega ni vakalewai iko. (Same 103:13, 14) O rawa ni rai tale ga ena Vosa ni Kalou. O Mela, sa tukuni oti mai, e saga me cata na vakanananu ca. E kaya: “E yaga vakalevu na noqu wili iVolatabu meu kua kina ni soro. E uqeti au meu nanuma tiko niu nei Jiova, au via qaravi koya tale ga.”—Same 119:9.

¹¹ Kua ni saga mo walia ga vakataki iko na nomu leqa. Tukuna vei rau na nomu itubutubu na ka o sotava tiko. E sega ni rawarawa me veivosakitaki na ka va qori, ia e bibi me caka. E kaya o Mela: “Au masu meu yaloqaqa, oti au tukuna vei Ta na noqu leqa. Ni oti qori, au lomavakacegu sara ga. Au kila ni marautaki au o Jiova.”

12. O na rawa ni vakatulewa vinaka vakacava?

¹² Me dusimaki iko na ivakavuvuli vakaivolatabu. Ni toso tiko na gauna o sa rawa ni vakatulewa ga vakataki iko. Ia se lailai na ka o kila me baleta na bula. O na qaqarauni vakacava mo kua ni cakava e dua na ka ena vakaleqa nomu veiwekani kei Jiova? (Vkai. 22:3) E vakamacalataka e dua na tacida yalewa o Kesa na ka e cakava me vakatulewa vinaka kina. E kila ni sega ni vinakati me lewai vakamatailalai vei ira na lotu vaKarisito matua na ka mera cakava ena dua na ituvaki. E kaya: “E bibi meu kila na ivakavuvuli vakaivolatabu mai na noqu kila tu ga na lawa.” Ni o wili iVolatabu tiko, mo taroga, ‘Cava au vulica eke me baleta na rai nei Jiova? E tiko kina na ivakavuvuli me dusimaki au ena noqu itovo? Ke vaka kina, au na vakayagataka vakacava?’ (Same 19:7; Aisea 48:17, 18) Ni o wili iVolatabu qai vakasamataka vakatitobu na kena ivakavuvuli, ena rawarawa sara mo vakatulewataka na ka ena vakamarautaki Jiova. Ni o saga tiko mo matua vakayalo, o na raica ni sega ni vinakati me lewai sara vakamatailalai vei iko na ka mo cakava ena ituvaki kece ni o sa kila tiko na rai nei Jiova.

13. Era dau veivuke vakacava na itokani vinaka? (Vosa Vakaibalebale 13:20)

¹³ Digia na itokani era lomani Jiova. Me vaka sa tukuni oti mai, na itokani o digia era na veivuke vakalevu ena nomu sasaga mo toso vakayalo. (Wilika Vosa Vakaibalebale 13:20.) Kena ivakaraitaki: Sa sega ni marau vakalevu e dua na tacida yalewa o Sera. E yaco e dua na ka e veisautaka nona rai. E kaya: “Au sotavi ira na itokani vinaka ena gauna donu. Keirau dau vulica na Vale ni Vakatawa ena veimacawa kei na dua na tacida yalewa gone. E vukei au e dua tale na tacida yalewa meu tekivu saumitaro ena soqoni. Ena nodra veiuqeti gona na noqu itokani, au sa raica kina vakabibi na vuli vakataki au kei na masu. Keirau veitokani voleka kina kei Jiova, au sa marau tale qo.”

14. Na cava e cakava o Juta me so kina nona itokani vinaka?

¹⁴ O na rawa vakacava ni veitokani kei ira era na vukei iko? E kaya o Juta, sa qase tiko ni ivavakoso nikua: “Niu se gone, e levu noqu itokani vinaka ena cakacaka vakaitalatala. Era dau gugumatua, era vukei au meu raica ni marautaki na cakacaka vakaitalatala. E noqu isausau kina meu veiqaravi vakatabakidua. Au liaca  tale ga ni sa sega ni levu noqu itokani vinaka niu yalana tiko ga noqu veimaliwai kei ira keimami yabaki vata. Toso na gauna, eso tale ga na noqu itokani vinaka e Peceli. E uqeti au na nodra ivakaraitaki meu digia vinaka na ka ni veivakamarautaki, au qai volekati Jiova kina.”

15. Na cava e vakasalataki Timoci kina o Paula me baleta na veitokani? (2 Timoci 2:20-22)

¹⁵ Vakacava ke o kila ni sega ni itokani vinaka e dua ena ivavakoso? E kila o Paula nira tiko eso ena ivavakoso ena imatai ni senitiuri e sega vei ira na rai vakayalo, mani vakasalataki Timoci me kua ni muri ira. (Wilika 2 Timoci 2:20-22.) E talei dina na noda veiwekani kei Jiova. Eda sasaga vagumatua meda veitokani kei na Tamada vakalomalagi, me kua gona ni dua na ka me vakaleqa na veiwekani qori.—Same 26:4.

16. Na isausau cava o na digia?

¹⁶ Me dua nomu isausau yaga. Digia na isausau ena vaqaqacotaka nomu vakabauta mo matua kina vakayalo. (Efeso 3:16) Me kena ivakaraitaki, de dua o via vakavinakataka nomu ivakarau ni vuli vakataki iko kei na wili iVolatabu. (Same 1:2, 3) De o na raica ni vinakati mo kauaitaka na ivakarau ni nomu masu kei na nomu cakava wasoma. De vinakati mo lewa vinaka na ka ni veivakamarautaki o digia kei na nomu vakayagataki gauna. (Efeso 5:15, 16) Ena marau sara ga o Jiova ni raica nomu saga tiko mo toso vakayalo.

17. Ena yaga vakacava vei iko nomu vukei ira eso tale?

¹⁷ Ni o vukei ira eso tale, o na rawa kina ni lotu vaKarisito matua. E kaya o Jisu: “E marau vakalevu o koya e solia na ka, vakalailai o koya e taura na ka.” (Caka. 20:35) Ena yaga vakalevu ni o vakayagataka nomu gauna kei na nomu kaukaua vakaitabagone mo vukea eso tale. Me kena ivakaraitaki, e rawa ni nomu isausau mo vukei ira na itabaqase kei ira na malumalumu ena nomu ivavakoso. De o rawa ni lai volivoli mai vei ira, se vukei ira ena vakayagataki ni iyaya vakalivaliva. Ke o  tacida tagane, e rawa ni nomu isausau mo dauveiqaravi ni ivavakoso, ena inaki mo vukei ira kina vakalevu na tacida. (Fpai. 2:4) O rawa ni lomani ira tale ga na tu ena yalava ni o tukuna vei ira na itukutuku vinaka me baleta na Matanitu ni Kalou. (Maciu 9:36, 37) Ke rawa, saga me nomu isausau mo vakaitavi ena so na taba ni veiqaravi vakatabakidua.

18. E yaga vakacava na cakacaka vakaitalatala vakatabakidua ni o saga mo toso vakayalo?

¹⁸ E yaga na cakacaka vakaitalatala vakatabakidua ena nomu toso vakayalo. Ni o painia, o na rawa ni sureti mo vuli ena Koronivuli ni iTalatala ni Matanitu. O na rawa mada ga ni veiqaravi e Peceli, se na tabana ni tarataravaki. E kaya o Kara, e dua na tacida gone e painia tiko: “Na noqu dau veimaliwai kei ira na tacida matua ena cakacaka vakaitalatala, e yaga vakalevu ena noqu toso meu papitaiso. E uqeti au na nodra ivakaraitaki meu kila vinaka na iVolatabu, me vinaka tale ga na iwalewale ni noqu veivakavulici.”

19. Na veivakalougatataki cava o na marautaka ni o saga mo toso tiko ga vakayalo?

¹⁹ O na marautaka e levu na veivakalougatataki ni o saga tiko ga mo toso vakayalo. Ni o se gone o na sega ni vakalusi gauna ena sagai ni isausau e sega ni yaga. (1 Joni 2:17) O na sega ni rarawa ni ca nomu vakatulewa. Ia ena vakataudeitaki nomu sasaga, o na marau tale ga. (Vkai. 16:3) Ena uqeti ira na tacimu vakayalo na nomu ivakaraitaki, se ra gone se qase. (1 Tim. 4:12) Koya e bibi sara, o na lomavakacegu qai nuidei ni o vakamarautaki Jiova, o veitokani voleka tale ga kei koya.—Vkai. 23:15, 16.