E macala mai na ikotokoto ni vakaibalebaletaka tiko na yapositolo o Paula na itukutuku se kena vakamacalataki na inaki ni Kalou, me vaka e laurai ena iVolatabu.

E dau tabaki vakalevu ena noda ivola na Iperiu 4:12 me dusia ni rawa ni veisautaka na noda bula na iVolatabu, e veiganiti kina me vakamacalataki va qori. Ia ena vinaka me rabailevu na noda raica na Iperiu 4:12. E uqeti ira tiko na lotu vaKarisito Iperiu o Paula mera tokona na inaki ni Kalou me vaka e volai ena iVolatabu. Dua na kena ivakaraitaki e cavuta o Paula me baleti ira na Isireli era vakabulai mai Ijipita. A rawa nira taukena na “vanua e drodro kina na sucu kei na oni,” na vanua era na vakacegu dina kina.​—Lako 3:8; Vkru. 12:9, 10.

Qori sara ga na inaki ni Kalou e vakamacalataki. E muri era lomaqa na Isireli ra qai sega ni vakabauta, levu era sega ni curu ena vanua yalataki. (Tiko 14:30; Josua 14:6-10) Ia e tomana o Paula “ni se tiko na nona ivakavakacegu [na Kalou] a yalataki.” (Iper. 3:16-19; 4:1) Na ‘yalayala’ qori e tiki ni inaki ni Kalou e vakamacalataki. Me vakataki ira na lotu vaKarisito Iperiu, eda rawa ni wilika qai tokona na inaki qori. Me vakadeitaki ni yavutaki vakaivolatabu na yalayala qo, e cavuta o Paula e vica na tikina mai na Vakatekivu 2:2 kei na Same 95:11.

E veiuqeti dina ni ‘se tiko ga na ivakavakacegu [ni Kalou] a yalataki.’ Eda nuitaka ni na yaco dina na yalayala ni iVolatabu meda curu ina ivakavakacegu ni Kalou, nida sa cakava tale ga na veiveisau meda curu kina. Eda sega ni rawata qori nida muria na Lawa a soli vei Mosese se nona veivakadonui na Kalou nida qarava eso tale na itavi. Ena vuku ga ni vakabauta eda rawa ni duavata qai tokona tiko ga na loma ni Kalou. Kena ikuri, me vaka ga e cavuti mai cake, vica vata na udolu mai na veiyasa i vuravura era sa vulica na iVolatabu, ra qai vulica tale ga na inaki ni Kalou. Levu vei ira qori era veisautaka nodra ivakarau ni bula, era vakaraitaka nodra vakabauta ra qai dua na lotu vaKarisito papitaiso. Na veiveisau era cakava e dusia ni “bula na vosa ni Kalou qai kaukaua.” Sa yaga tiko vei keda na inaki ni Kalou e vakamacalataki ena iVolatabu, ena kaukaua tiko ga ena noda bula.