NI O via kila na gauna, na cava o na cakava? De dua o na raica na kaloko e toka e ligamu se lalaga? Ke dua e via kila na gauna, cava o na kaya? Duidui na kena itukutukuni. Ena sala cava?

Kaya mada ni sa oti na dua ena tolusagavulu na miniti ena yakavi. O rawa ni kaya ni sa 1:30 (veimama na dua). Se o rawa ni kaya ni sa 13:30 (tinikatolu na aua, tolusagavulu na miniti), ena vakatau vakalevu ena vanua o tiko kina kei na ka e dau tukuni. Na kena itukutukuni qori e yavutaki ena ituvatuva ni 24 na aua dua na siga. So mada ga na vanua e dau tukuni va qo “vo e veimama me rua” e dusia ni sa vo e tolusagavulu na miniti me rua.

Ni o wili iVolatabu, de o na vaqaqa na kena era dau muria ena gauna vakaivolatabu. E sega ni dua tu ga na ivakarau ni nodra dau tukuna na gauna. Ena iVolatabu vakaIperiu e laurai ni cavuti kina “mataka,” “sigalevu,” “sigalevu tutu,” kei na “yakavi.” (Vkte. 8:11; 19:27; 43:16; Vkru. 28:29; 1 Tui 18:26) Ena so na gauna e dau tukuni sara ga vakamatata.

Ena gauna vakaivolatabu, era dau tiko na yadra, vakauasivi ena bogi. Ni vo e vica vata na senitiuri me qai sucu o Jisu, e dau wasei vakatolu na gauna ni yadra. (Same 63:6) E tukuni ena Dauveilewai 7:19 “na yadra ena lomaloma ni bogi.” Ia ena gauna i Jisu, era vakayagataka na Jiu na nodra ituvatuva ni gauna na kai Kirisi kei na kai Roma, oya me va na gauna ni yadra.

E dau cavuti vakalevu na gauna qori ena Kosipeli. Kena ivakaraitaki, e tukuni ni taubale o Jisu ena delaniwai vei ratou na nona tisaipeli “ni voleka ni kida na mataka,” se na ikava ni iwasewase ni yadra. (Maciu 14:25) E kaya o Jisu ena dua na vosa vakatautauvata: “Ke kila na itaukeinivale na gauna ena lako mai kina na daubutako, ena yadra tiko ga me kua ni basu nona vale.”—Maciu 24:43.

E cavuta o Jisu na va na gauna ni yadra qori ni vosa vei ratou nona tisaipeli: “Mo dou yadra tiko gona ni dou sega ni kila na gauna ena lako mai kina na itaukeinivale, de lako mai ena yakavi se na bogi se ni bera na bogilevu se matakacaca.” (Mari. 13:35; vmr) Na imatai ni yadra na “yakavi,” e tekivu ni dromu na siga me yacova na ciwa na kaloko ena bogi. Na ikarua ni yadra na “bogilevu,” rauta na ciwa ena yakavi bogi ina bogilevu tutu. Na ikatolu ni yadra oya “ni bera na bogilevu,” se ni “tagi na toa.” E tekivu ena bogilevu tutu me yacova ni rauta na tolu na kaloko ena mataka. Rairai donuya na gauna ni yadra qo a tagi kina na toa ena bogi e vesu kina o Jisu. (Mari. 14:72) Na ikava ni yadra oya na “matakacaca,” rauta na tolu na kaloko ena mataka me yacova ni cabe na siga.

A sega ena gauna vakaivolatabu na kaloko sa tu nikua, ia e tiko na sala era kila kina na gauna ena siga kei na bogi.