O bau wilika vinaka na itabataba ni Vale ni Vakatawa ni yabaki qo? Raica mada ke o rawa ni sauma e vica na taro qo:

E vakadeitaka vakacava na Jemesa 5:11 ni dau “veikauaitaki” e “yalololoma” tale ga o Jiova?

Eda kila ni dau yalololoma o Jiova, e tu vakarau gona me veivosoti. E vakadeitaka vei keda na Jemesa 5:11 ni tu vakarau tale ga me vukei keda. Meda vakatotomuri koya.—w21.01, t. 21.

Na cava e tuvanaka kina o Jiova na ituvatuva ni veiliutaki ena vuvale?

E yavutaka ena loloma. Na ituvatuva qo ena vakilai kina ena vuvale i Jiova na vakacegu, ena tuvanaki vakamatau tale ga. Na lewenivuvale yadua e muria na ituvatuva qo ena kila o cei me vakatulewa, o cei tale ga e raica me vakayacori.—w21.02, t. 3.

Na cava meda qarauna kina na lotu vaKarisito na vakauitukutuku ena iyaya vakalivaliva?

Ke dua e vakayagataka na porokaramu va qo, e bibi me digia vinaka nona ilala. Ena rairai dredre qori ni vakaitukutuku vei ira na le levu. (1 Tim. 5:13) Me qarauna tale ga na rogoca se vakadewa na itukutuku rogo ca se sega ni vakadeitaki. Me qarauna tale ga me kua ni vakayagataki ira na tacidra me rawailavo kina.—w21.03, t. 31.

Na cava eso na vuna e vakatara kina na Kalou me vakararawataki qai mate o Jisu?

Dua na vuna e vakaliligi kina ena kau o Jisu, ya mera kua ni cudruvi na Jiu. (Kala. 3:10, 13) Kena ikarua, e vakavulici Jisu o Jiova ena itavi me qarava ni Bete Levu. Na ikatolu ni vuna oya na nona yalodina o Jisu me yacova na mate e vakaraitaka ni rawa vei keda na tamata meda yalodina tiko ga nida vakatovolei vakaca. (Jope 1:9-11)—w21.04, t. 16-17.

Na cava mo cakava ke dredre mo vosa vua e dua ena cakacaka vakaitalatala?

O rawa ni vunau vei ira ena gauna era na rairai tiko kina e vale. O rawa tale ga ni veisautaka na vanua o lai vunau kina. O rawa ni tovolea me veisau na nomu iwalewale, me vaka nomu vola ivola.—w21.05, t. 15-16.

Na cava e vakaibalebaletaka o Paula ni kaya: ‘Au mate ena vuku ni lawa ena noqu muria na lawa’? (Kala. 2:19)

Na Lawa e soli vei Mosese e vakavotuya na ivalavala ca qai tuberi ira na Isireli vei Karisito. (Kala. 3:19, 24) E rawa kina vei Paula me ciqomi Karisito. Ni cakava qori e “mate” gona o Paula ni “muria na lawa,” sa sega tale ni vauci kina.—w21.06, t. 31.

Na cava eda vulica ena nona dauvosota o Jiova?

O Jiova e vosota na beci ni yacana, na saqati ni nona veiliutaki, nodra talaidredre eso na luvena ni sega ni cegu nona lasu o Setani, nira rarawa nona dauveiqaravi, nira takali nona itokani, nodra veivakalolomataki na tamata ca, ni vakacacani tale ga na nona ibulibuli.—w21.07, t. 9-12.

Na cava eda vulica ena nona yalovosovoso o Josefa?

E vosota nodratou vakararawataki koya na tuakana. E vakavuna me beitaki kina vakailasu qai vesu e Ijipita me vica vata na yabaki.—w21.08, t. 12.

Na cava e parofisaitaki ena Akeai 2:6-9, 20-22 baleta nodra kurei vakaivakatakarakara na veimatanitu?

Era sega ni taleitaka na veimatanitu na cakacaka vakavunau, ia e levu era taleitaka na dina. Sa voleka qo mera kurei na matanitu kece nira sa na vakarusai.—w21.09, t. 15-19.

Na cava meda kua kina ni soro ena noda cakacaka vakaitalatala?

E raica o Jiova noda sasaga, e marautaka. Ke da sega ni vakacauoca se soro eda na rawata na bula tawamudu.—w21.10, t. 25-26.

E yaga vakacava na Vunau ni Soro wase 19 meda muria na ivakasala: “Me savasava . . . na nomuni ivalavala kece”? (1 Pita 1:15)

Kena irairai ni lavetaki na tikinivolatabu qori mai na Vunau ni Soro 19:2. E levu na ivakaraitaki e tiko ena wase 19 ena sala meda muria kina na 1 Pita 1:15 ena noda bula e veisiga.—w21.12, t. 3-4.