Rua Tale na Lewe ni iLlawalawa Dauvakatulewa

ENA mataka ni Vukelulu, 24 Okosita, 2005, e vakasavui kina e dua na itukutuku marautaki vei ira na lewe ni vuvale e Peceli mai Mereke, kei ira e Canada. Me tekivu ena 1 Sepiteba, 2005, sa na rua tale na lewe ni iLawalawa Dauvakatulewa ni iVakadinadina i Jiova​​—⁠o Geoffrey W. Jackson kei Anthony Morris III.

E tekivu painia o Brother Jackson ena vula o Feperueri, 1971, ena yanuyanu o Tasmania e Ositerelia. Ena June 1974, erau vakamau kina kei Jeanette (Jenny). Sega ni dede erau sa lesi me rau painia lavotaki. Erau a mai kaulotu voli ena Wasa Pasifika me tekivu ena yabaki 1979 me yacova na 2003. Rau veiqaravi e Tuvalu, Samoa, vaka kina e Viti. Ena nodrau mai veiqaravi voli ena Pasifika, erau vakaitavi sara vakalevu o Brother kei Sister Jackson ena vakadewataki ni ivola vakaivolatabu. Ena 1992, sa lesi kina me lewe ni Komiti ni Tabana e Samoa o Brother Jackson. E toki mai Viti ena 1996, mai lewe tale ga ni Komiti ni Tabana. Ena Epereli 2003, erau sa lesi sara kei Jenny me rau lai lewe ni vuvale e Peceli e Mereke, rau lai tekivu veiqaravi sara ena tabana e qarava na cakacaka ni vakadewa ena veiyasa i vuravura (Translation Services Department). Sega ni dede sa lai vakaitavi o Brother Jackson me dauveivuke ina Komiti ni Veivakavulici ni iLawalawa Dauvakatulewa.

E tekivu painia e Mereke o Brother Morris ena 1971. Ena Tiseba ni yabaki oya, erau vakamau kina kei Susan, rau tomana na cakacaka vakapainia me voleka ni va na yabaki me yacova ni sucu na imatai ni luvedrau tagane, o Jesse. Oti, e sucu e dua tale na luvedrau, o Paul. E tekivu cakacaka vakapainia tale o Brother Morris ena 1979, oqo me painia tudei. Ni rau sa vuli na gone, sa qai tomani koya ena cakacaka vakapainia o watina. Ratou a gole na veitamani me ratou lai veiqaravi i Rhode Island kei North Carolina ena vanua o Mereke, baleta ni gadrevi kina vakalevu na veivuke. E ivukevuke ni ivakatawa dauveilakoyaki o Brother Morris ena gauna eratou tiko voli kina e North Carolina, rau painia tudei na luvena tagane. Rau a sureti o Jesse kei Paul me rau lai veiqaravi ena valenitabana e Mereke ni rau se qai yabaki 19. Oti oya, sa qai lesi o Brother Morris me ivakatawa ni tabacakacaka. Ena yabaki 2002, erau sureti kina kei Susan me rau lai veiqaravi e Peceli, me tekivu ena 1 Okosita. Tekivu cakacaka o Brother Morris ena Service Department e Patterson, oti e lesi sara me dauveivuke ena Komiti ni Cakacaka ni iLawalawa Dauvakatulewa.

O rau na lewe ni iLawalawa Dauvakatulewa oqo erau sa lai tomani C. W. Barber; J. E. Barr; S. F. Herd; M. S. Lett; G. Lösch; T. Jaracz; G. H. Pierce; A. D. Schroeder; D. H. Splane; kei D. Sydlik. Era lotu Vakarisito lumuti kece na lewe ni iLawalawa Dauvakatulewa.