E sega ni vakacala na iVolatabu na kena vakamai na yagodra na mate.

E tukuni ena iVolatabu ni a vakamai na yagodra kei na suidra na mate. (Josua 7:25; 2 Vei. 34:4, 5) De dua e vakaraitaka qori ni sega ni ganiti ira mera bulu me vaka na kena ivakarau dodonu. Ia na vakamai ni yago ni mate e sega ni dau vakaibalebaletaka ni sega ni ganiti ira mera bulu.

Eda vakadinadinataka qori ena ivolatukutuku ni nona mate o Tui Saula kei na tolu na luvena tagane. Eratou mate ni ratou veiraravui tiko kei ira na kai Filisitia. E dua vei ratou o Jonacani, e itokani voleka i Tevita qai dau yalodina vua. Nira rogoca na Isireli era tiko e Jepesi-kiliati na ka e yaco, era kauta na yagodratou, era vakama ra qai buluta na nodratou sui. E vakavinavinakataki ira na Isireli o Tevita ena ka era cakava.—1 Sam. 31:2, 8-13; 2 Sam. 2:4-6.

Na nodra inuinui na mate na veivakaturi, e yavutaki vakaivolatabu. Qori nona vakabula e dua sa mate na Kalou. Ke mani vakamai se sega, e sega ni vakaiyalayala na kaukaua e tu vei Jiova me vakatura e dua ena yago vou. A vakarota o Tui Nepukanesa me ratou vakamai ena bukawaqa na tolu na cauravou Iperiu, ia ena vinakati me ratou kua ni rerevaka qori ni rawa vua na Kalou me vakaturi ratou. (Tani. 3:16-18) E dina tale ga qori vei ira na dausokalou yalodina i Jiova era vakamatei ra qai vakamai ena keba ni veivakararawataki ena nodra veiliutaki na Nazi. Eso era mate ni kacabote na gasaukuro kei na so tale, se ra mate ena so na sala e vakavuna me sega ni kune na yagodra. Ia era na vakaturi dina ga.—Vkta. 20:13.

E sega ni vinakati vei Jiova me semasema tale na yagodra na mate me rawa ni vakaturi ira. E laurai qori ena nona vakaturi ira na lotu vaKarisito lumuti ina bula e lomalagi. O Jisu a “vakabulai ena yago vakayalo,” era na vakaturi tale ga ena yago vakayalo na lotu vaKarisito lumuti, ia ena sega ni veisau na nodra ivakarau ni vakasama se ka era kila me vaka na gauna era a se bula kina e vuravura. Ena sega nira gole i lomalagi ena yago vakayago.—1 Pita 3:18; 1 Kor. 15:42-53; 1 Joni 3:2.

Na noda inuinui ni veivakaturi e sega ni vakatau ena ka e caka e yagoda nida sa mate, ia e yavutaki ena noda vakabauta ni rawa vua na Kalou me vakaturi keda qai vinakata tale ga me vakayacora na nona vosa ni yalayala. (Caka. 24:15) E macala nida sega ni kila kece na sala e veivakaturi kina na Kalou ena veigauna sa oti kei na veigauna se bera mai. Ia eda nuitaki Jiova ga. E vakarautaka na “ivakadei” ena nona vakaturi Jisu.—Caka. 17:31; Luke 24:2, 3.

E vinaka mera nanuma tiko na lotu vaKarisito na ivakarau vakavanua, nodra rai eso tale kei na veika vakalawa e vauca na maroroi ni yagodra na mate. (2 Kor. 6:3, 4) E vakatau sara ga vua na tamata yadua kei na nodra vuvale na vakamai ni yagodra na mate.