“EUREKA!” Na vosa qo e kena ibalebale “Au sa kunea!” Ena ika19 ni senitiuri ena gauna ni keli koula e California, Merika, e dau rogoci na vosa oya ni dua e kunea na koula. Ia era kunea e dua na ka e talei sara o Charles Taze Russell kei ira na Gonevuli ni iVolatabu—na ka dina ena iVolatabu. E gu tale ga na lomadra mera wasea vei ira eso tale.

Ena vula ikatakata ni 1914, vica vata na milioni ena siti lelevu era tabili yani mera sarava na “Photo-Drama of Creation,” e walu na aua na kena dede, era vakarautaka na International Bible Students Association (I.B.S.A.). E totoka na kena iyaloyalo yavala, itaba duiroka veicavuyaki, ivakamacala, kei na ivakatagi. E rawa nira raica kina na sarasara na ibulibuli ni Kalou, na veika e baleta na itukutuku ni kawatamata, me yacova sara na icavacava ni veiliutaki i Karisito ena Duanaudolu na Yabaki.—Vkta. 20:4. *

Ia vakacava o ira era vakaitikotiko ena tauni kei na veikoro lalai? Me kua ni dua e calata qori, eratou sevutaka na I.B.S.A. ena Okosita 1914 na “Eureka Drama”—e lekaleka ga mai na “Photo-Drama” qai sega kina na iyaloyalo. E tolu tiko na kena mataqali, e vakadewataki tale ga ena levu na vosa: Na “Eureka X” e vakatagitaki ga kina na rorogo ni domo kei na ivakatagi. Na “Eureka Y” e vakatagitaki kina na rorogo ni domo kece kei na ivakatagi, bau kina na iyaloyalo veicavuyaki, kei na “Eureka Family Drama,” e vakarautaki me saravi e vale, e vakatagitaki ga kina eso na rorogo ni domo kei na ivakatagi. E rawa tale ga ni vakayagataki na qaramavoni kei na iyaloyalo veicavuyaki sau lailai.

E rawarawa mera kauta na Gonevuli ni iVolatabu na iyaloyalo qori ena vanua ribayawa kei na yalava vovou mera wasea kina na itukutuku ni Matanitu ni Kalou. Me vaka ni rawa ni rogoci ga na “Eureka X” e rawa kina ni vakatagitaki ena bogi se siga. Na iyaloyalo veicavuyaki na “Eureka Y,” e rawa ni saravi qai sega ni vakayagataki kina na livaliva, e vakayagataki ga kina na cina kasi. E tukuni ena Vale ni Vakatawa vakaFiniladi: “E rawa ni keitou vakaraitaka na iyaloyalo qo ena veivanua kece ga.” E dina taucoko qori!

Era sega ni redetaka na vale ni iyaloyalo lelevu na Gonevuli ni iVolatabu, era dau raica na vanua e sega ni saumi, me vaka na koronivuli, vale ni veilewai,  wawa ni sitima, kei na so mada ga na rumu lelevu ena so na vale. Levu na gauna e dau vakayacori e tautuba, qai vakayagataki na siti vulavula levu me lili ena yasa ni lalaga ni vale me laurai kina na iyaloyalo. E vola o Anthony Hambuch: “Era vakaduria na dauteitei na vatuniloa kei na idabedabe kau mera dabe kina na sarasara me rawa nira marautaka na porokaramu.” O ira na Gonevuli ni iVolatabu era vakayagataka na qiqi me vakavodoki kina nodra iyaya, kato, iyaya ni vakasaqa kei na iyaya ni moce.

E rawa ni vica ga se yacova sara na drau na levu ni tamata era sarava na “Eureka Drama.” E Merika, era le 400 era sarava na iyaloyalo qori ena dua na tauni era vakaitikotiko ga kina e 150 na lewenivanua. Ena so na vanua, eso era taubaletaka e 8 na kilomita mera lai sarava na “Eureka Drama.” E Sweden, o ira na tiko tikivi Charlotte Ahlberg era lai sarasara yani ena nona vale, e “tarai ira dina” na veika era rogoca. E Ositerelia, rauta ni 1,500 era lai sarasara ena dua na tauni lailai. Ena koronivuli lelevu, e tukuna na Vale ni Vakatawa ni o “ira na parofesa kei ira na gonevuli era taleitaka vakalevu na itaba kei na iyaloyalo yavala era sarava.” E dau taleitaki mada ga vakalevu ena vale ni iyaloyalo na “Eureka Drama.”

E yaga sara vakalevu na “Eureka Drama” ena “Class Extension Work,” e rawa kina vei ira na Gonevuli ni iVolatabu mera lesi ira na dauvunau mera tauyavutaka na kalasi vou ni vuli iVolatabu. A sega ni vakadeitaki se vica sara mada era sarava na “Eureka Drama.” E saravi vakalevu na “Drama” qori, ia ena 1915 e 14 ga mai na 86 taucoko na timi ni “Drama” era ripote tiko vakalevu. E rarawataki na kena sega ni kilai taucoko na iwiliwili, ia e nanumi ni rawa ni sivia e dua na milioni na lewenivanua era sarava na “Drama.” Rauta ni 30,000 era kerea na ivola vakaivolatabu.

Ena rairai sega so ni kilai levu na “Eureka Drama,” ia vica vata na milioni era sa sarava mai Ositerelia, Argentina, Sauca Aferika, Peritania, Idia, kei na Caribbean. Levu vei ira qori era kunea na ka dina ena iVolatabu —e talei cake sara mai na koula—sa rawa gona nira tukuna “Eureka!”