1, 2. E vakayaloqaqataki ira vakacava na nona tisaipeli o Jisu ena siga a vakaturi kina?

ENA siga a vakaturi kina o Jisu, erau a taubale tiko e rua na tisaipeli ina dua na koro e 11.2 na kilomita na kena yawa mai Jerusalemi. Dua na ka na nodrau rarawataka na veika e yaco, rau sega tale ga ni kila ni sa vakaturi o Jisu. E basika vakasauri o Jisu qai tomani rau ena nodrau ilakolako. E mani vakacegui rau sara. Ena sala cava? “Sa qai vakamacalataka vei rau na ka me baleti koya e volai tu ena iVolatabu kece me tekivu mai na ivola i Mosese kei na nodra ivola na Parofita.” (Luke 24:13-15, 27) E uqeti sara ga na lomadrau baleta ni “sereka” sara ga o Jisu se vakamatatataka na iVolatabu.—Luke 24:32.

² Ena yakavi tiko ga ya, erau lesu e Jerusalemi na tisaipeli. Erau gole sara vei ira na yapositolo qai talanoataka na ka erau sotava. Ni rau se vosa tiko, e basika sara o Jisu. Ia era domobula na nona yapositolo. Era vakatitiqa e lomadra. E vakayaloqaqataki ira vakacava o Jisu? E tukuni ena iVolatabu: “Mani vakararamataka na lomadra mera kila na ibalebale ni iVolatabu.”—Luke 24:45.

3. Na ituvaki dredre cava eda rairai sotava? Na cava meda cakava me donu tiko ga noda rai me baleta na cakacaka vakaitalatala?

³ Me vakataki ira ga na tisaipeli, eda na rairai rarawa se yalolailai ena so na gauna. De dua eda vakaitavi vakalevu ena cakacaka ni Turaga, ia eda yalolailai nida sega ni raica na  toso. (1 Kor. 15:58) Se rairai sega sara ni toso na noda vuli iVolatabu, se ra vakanadakui Jiova o ira eda vukea. Na cava gona meda cakava me donu tiko ga na noda rai me baleta na cakacaka vakaitalatala? Dua oya meda kila vinaka na ibalebale ni vosa vakatautauvata i Jisu ena iVolatabu. Meda veivosakitaka mada e tolu na vosa vakatautauvata qori kei na ka eda vulica kina.

4. Na cava na ibalebale ni vosa vakatautauvata i Jisu me baleta na dauteitei e moce?

⁴ Wilika Marika 4:26-29. Na cava na ibalebale ni vosa vakatautauvata i Jisu me baleta na dauteitei e moce? Na turaga ena vosa vakatautauvata qo e vakatayaloyalotaki ira na dautukutuku kece ni Matanitu ni Kalou. Na itei e vakatayaloyalotaka na itukutuku ni Matanitu ni Kalou e vunautaki vei ira na yalomalumalumu. E ‘moce ena bogi qai yadra ena mataka’ na dauteitei me vaka ga na ivakarau ni noda bula e veisiga. E taura toka na gauna me tubu na itei, mai na gauna e tei kina me yacova na kena tamusuki. Ena loma ni gauna qori e “kadre na itei qai tubu me levu.” E tubu ga ‘vakataki koya’ na itei, e taura toka na gauna qai veitaravi na ka e yaco. E va tale ga qori na tubu vakayalo. Ni toso tiko vakayalo e dua me qarava na Kalou, ena kilai ni sa vua ni yalataka nona bula vei Jiova qai papitaiso.

5. Na cava e vakayagataka kina o Jisu na vosa vakatautauvata me baleta na dauteitei e moce?

⁵ Na cava e vakayagataka kina o Jisu na vosa vakatautauvata qo? E vukei keda o Jisu meda kila ni o Jiova ga e vakatubura na ka dina e lomadra na “yalomalumalumu.” (Caka. 13:48; 1 Kor. 3:7) Eda tea da qai vakasuasuataka, ia eda sega ni lewa na kena tubu. E sega ni rawa ni vakatotolotaki na kena tubu. Me vakataki koya na turaga ena vosa vakatautauvata, eda sega ni kila se na tubu vakacava na itei. Nida qarava voli na noda itavi ni veisiga, eda sega ni raica na tubu sa yaco tiko. Ia ni toso na gauna, ena rairai vua sara na itei ni Matanitu ni Kalou. Ena qai tomani keda na tisaipeli vou qori ena cakacaka ni tatamusuki qai yaga dina na nona veivuke.—Joni 4:36-38.

6. Na cava meda nanuma tiko me baleta na tubu vakayalo?

⁶ Na cava eda vulica ena vosa vakatautauvata qo? Kena imatai, meda nanuma tiko nida sega ni lewa na nona tubu vakayalo e dua na vuli iVolatabu. Nida yalomalumalumu eda na sega ni vakasaurarataka na gonevuli me papitaiso. Eda na saga ena noda vinaka kece meda veivuke da qai tokoni koya. Eda vakadinata ena yalomalumalumu ni vakatau ga vua nona yalataki koya. Ni dua e yalataki koya vei Jiova e dodonu me vu mai lomana, e cakava qori ni lomana na Kalou. Ke sega, ena sega ni vakadonui koya o Jiova.—Same 51:12; 54:6; 110:3.

7, 8. (a) Na cava tale eda vulica ena vosa vakatautauvata i Jisu me baleta na dauteitei e moce? Tukuna e dua na ivakaraitaki. (b) Na cava eda vulica kina me baleti Jiova kei Jisu?

⁷ Kena ikarua, na ka eda vulica ena vosa vakatautauvata qori ena uqeti keda meda kua ni yalolailai ke sega ni laurai taumada na vua ni noda cakacaka. Ena vinakati meda vosota. (Jeme. 5:7, 8) Ke da solia na noda vinaka taucoko meda vukei gonevuli ia e sega ni vua, e sega ni dusia qori nida tawayalodina. O Jiova e vakalaiva me tubu na sore ni ka dina ena lomadra na yalomalumalumu era tu vakarau mera veisau. (Maciu 13:23) Koya gona, meda kua ni nanuma ni vakatau na vuavuaivinaka ni noda cakacaka ena ka e rawati. Ena mata i Jiova na vuavuaivinaka ni noda cakacaka e sega ni vakatau ena veiveisau era cakava o ira  eda vakavulica. Se mani cava e laurai, e talei ga vua na noda sasaga ena yalodina.—Wilika Luke 10:17-20; 1 Korinica 3:8.

⁸ Kena ikatolu, eda sega ni kila na veiveisau kece e yaco e lomana e dua. Kena ivakaraitaki, rau tukuna e dua na veiwatini vua na daukaulotu e vakavulici rau tiko ni rau via dautukutuku bera ni papitaiso. E tukuna na daukaulotu ni vinakati me rau tinia na nodrau vakatavako me rawa ni rau dautukutuku. Ia e kidacala ni rau tukuna ni sa vica na vula nodrau sega tu ni vakatavako. Na cava erau cakava kina qori? Erau kila ni raica tiko o Jiova na nodrau vakatavako, e cata tale ga na veivakaisini. E uqeti rau gona na lomadrau me rau vakatulewa—me rau vakatavako ni rai tiko o daukaulotu se me rau muduka. A rawa kina ni rau vakatulewa donu ni rau sa lomani Jiova. Erau toso vakayalo, ia a sega ni raica o daukaulotu na veisau e yaco.

9. Na cava na ibalebale ni vosa vakatautauvata me baleta na lawa?

⁹ Wilika Maciu 13:47-50. Na cava na ibalebale ni vosa vakatautauvata i Jisu me baleta na lawa? E tukuna o Jisu ni kena biu e waitui e dua na lawa levu e vakatauvatani kei na vunautaki ni itukutuku ni Matanitu ni Kalou vei ira kece na lewe i vuravura. Era dau coko na “veimataqali ika” ena lawa va qori, na noda vunau tale ga e vakayarayarataki ira mai na vica vata na milioni mai na veivanua. (Aisea 60:5) E vakadinadinataki qori ena iwiliwili levu era tiko ena noda soqo lelevu kei na iVakananumi e veiyabaki. Eso vei ira qori era vakatayaloyalotaka na ika “vinaka,” era sa kumuni ina ivavakoso vaKarisito. Ia era tiko tale ga kina eso e laurai nira “ca,” kena ibalebale eso vei ira na kumuni ena sega ni vakadonui ira o Jiova.

10. Na cava e vakayagataka kina o Jisu na vosa vakatautauvata me baleta na lawa?

¹⁰ Na cava e vakayagataka kina o Jisu na vosa vakatautauvata qo? Na nodra wasei vakaivakatakarakara na ika e sega ni dusia na iotioti ni veilewai ena veivakararawataki levu. E dusia ga na ka ena yaco ena iotioti ni veisiga ca qo. E vakaraitaka o Jisu ni sega ni o ira kece na mai kila na ka dina era na to vei Jiova. Levu era sa tomani keda ena noda soqoni vaKarisito. So tale era taleitaka mera vulica na iVolatabu, ia era sega ni taura vakabibi na ka era vulica. (1 Tui 18:21) Eso tale era sa sega ni veimaliwai kei ira na lewe ni ivavakoso. Eso na itabagone e tiko ena dina na nodra itubutubu era sa sega ni taleitaka na ivakatagedegede i Jiova. E duidui na ituvaki, ia e vakabibitaka o Jisu ni na vinakati meda vakatulewa yadudua. Ke da vakatulewa vinaka ena okati keda o Jisu meda ka talei se ka “domoni e na veimatanitu.”—Akeai 2:7.

11, 12. (a) Ena yaga vakacava vei keda na vosa vakatautauvata me baleta na lawa? (b) Na cava eda vulica kina me baleti Jiova kei Jisu?

¹¹ Ena yaga vakacava vei keda na vosa vakatautauvata me baleta na lawa? E uqeti keda na vosa vakatautauvata qo meda kua ni rarawa vakasivia se yalolailai, ni sega ni taura matua na ka dina e dua na noda vuli iVolatabu se luveda. Ena rawa ni yaco qori se mani vakacava na vinaka ni noda sasaga. Na nona vinakata e dua me vuli iVolatabu se nona susugi ena dina e sega ni kena ibalebale ni na veiwekani voleka kei Jiova. O ira na sega ni yalorawarawa mera vakamalumalumu ina veiliutaki i Jiova era na tawasei tani vei ira na tamata ni Kalou.

¹² Kena ibalebale qori nira na sega ni vakatarai mera lesu ina ivavakoso o ira sa biuta na ka dina? Ke sega tale ga ni yalataka nona bula vei Jiova e dua, sa na okati  vakadua me tamata “ca”? Sega. E se soli tiko na gauna ni bera ni tekivu na veivakararawataki levu. E vaka ga e kacivi ira tiko o Jiova: “Dou lesu mai vei au, au na qai lesu yani vei kemudou.” (Mala. 3:7) E tokona na vakasama qori na vosa vakatautauvata i Jisu me baleta na gone cidroi.—Wilika Luke 15:11-32.

13. Na cava na ibalebale ni vosa vakatautauvata me baleta na gone cidroi?

¹³ Na cava na ibalebale ni vosa vakatautauvata i Jisu me baleta na gone cidroi? Na tama dauloloma ena vosa vakatautauvata qo e vakatayaloyalotaki Jiova na Tamada vakalomalagi dauloloma. Na gonetagane e kerea na nona ivotavota qai vakasabusabutaka e vakatayaloyalotaki ira na lakosese mai na ivavakoso. Na nodra biubiu mera lako “ina dua na vanua yawa” e vakaibalebaletaka na nodra biubiu mera gole ena vuravura i Setani e yawaki Jiova. (Efeso 4:18; Kolo. 1:21) Eso era qai kilai yalodra e muri era mani muria lesu na gaunisala ina isoqosoqo i Jiova, dina ni na sega ni rawarawa. Na Tamada e dauveivosoti ena ciqomi ira vakarawarawa na yalomalumalumu era sa veivutuni.—Aisea 44:22; 1 Pita 2:25.

14. Na cava e vakayagataka kina o Jisu na vosa vakatautauvata me baleta na gone cidroi?

¹⁴ Na cava e vakayagataka kina o Jisu na vosa vakatautauvata qo? Me vakaraitaka ni vinakata o Jiova mera lesu vua o ira na lakosese. Na tama e cavuti ena vosa vakatautauvata a nuidei tu ni na lesu mai o luvena. Ni raici luvena ni sa lesu mai, e sega tale ni wawa me lai kidavaki koya ni “se yawa tu yani.” Qori e dodonu me uqeti ira era biuta na dina mera lesu totolo vei Jiova! De dua era sa oca vakayalo qai rairai mosimosi se veivakamadualaki na igolegole lesu. Ia e yaga na sasaga qori—ni na marautaki mada ga mai lomalagi nira lesu mai.—Luke 15:7.

15, 16. (a) Na cava eda vulica ena vosa vakatautauvata i Jisu me baleta na gone cidroi? Tukuna eso na ivakaraitaki. (b) Na cava eda vulica kina me baleti Jiova kei Jisu?

¹⁵ Ena yaga vakacava vei keda na vosa vakatautauvata me baleta na gone cidroi? Meda vakatotomuria na ivakaraitaki i Jiova. Meda kua mada ga ni ‘yalododonu sivia’ ena noda sega ni via ciqomi ira na veivutuni era lesu mai. Qori ena ‘vakaleqai’ keda ga vakayalo.  (Dauv. 7:16) Dua tale na ka eda vulica kina, oya meda okati ira na biuta na ivavakoso mera vaka na ‘sipi e yali tu,’ sega nira yali vakadua. (Same 119:176) Ke da sotava e dua e lakosese mai na ivavakoso ia se sega ni vakasivoi, vakacava eda na vukei ira vakayalololoma mera lesu mai? Eda na tukuna totolo vei ira na qase ni ivavakoso me rawa nira vakarautaka na veivuke e gadrevi? Eda na cakava ga qori ke da vakayagataka vinaka na ka eda vulica ena vosa vakatautauvata ni gone cidroi.

¹⁶ Dikeva mada qo na ka era kaya eso na gone cidroi ena noda gauna, ena nodra vakavinavinakataka na veivosoti i Jiova, vaka kina nodra loloma kei na nodra veitokoni na ivavakoso. Dua na tacida tagane e 25 na yabaki na dede ni nona vakasivoi. E kaya: “Tekivu na gauna au vakalesui mai kina, au sa qai marautaka ga vakalevu na ‘gauna ni veivakabulabulataki’ i Jiova. (Caka. 3:19) Dua na ka nodra veitokoni kei na nodra yalololoma na mataveitacini! E talei dina nira noqu vuvale vakayalo.” E biuti Jiova e dua na tacida yalewa gone, qai yali tu me lima na yabaki. E tukuna me baleta na nona lesu ina ivavakoso: “Au sega ni vakamacalataka rawa na loloma era vakaraitaka na mataveitacini, au vakadinadinataka sara ga kina na ka e tukuna o Jisu. E sega tale ni dua na ka e tautauvata kei na noda lewena na isoqosoqo i Jiova!”

17, 18. (a) Na cava eda vulica ena tolu na vosa vakatautauvata eda sa veivosakitaka mai? (b) Na cava meda sasagataka?

¹⁷ Na cava eda vulica ena tolu na vosa vakatautauvata qo? Kena imatai, meda nanuma tiko nida sega ni lewa rawa na nona tubu vakayalo e dua. E vakatau qori vei Jiova. Kena ikarua, meda kua ni namaka nira na tutaka na ka dina o ira kece eda sosoqoni vata se o ira na noda vuli iVolatabu. Kena ikatolu, era na rairai biuta na dina eso ra qai biuti Jiova, ia meda nuitaka tiko ga nira na lesu mai. Ke ra lesu mai, meda ciqomi ira ena sala e vakavotui kina na rai i Jiova.

¹⁸ Meda sasagataka tiko ga meda rawata na kilaka, vuku kei na yalomatua. Nida wilika na vosa vakatautauvata i Jisu, e vinaka meda kila na kena ibalebale, na cava era volatukutukutaki kina ena iVolatabu, eda na bulataka vakacava na ka eda vulica kina, kei na ka eda vulica me baleti Jiova kei Jisu. Nida cakava qori eda sa vakaraitaka tiko nida kila vinaka na ibalebale ni vosa i Jisu.