Na Cava na Rai ni Kalou me Baleta na Alakaolo?

NA DAUVEIBULI, e vakarautaka na veika e vinaka vei keda, e sega ni vakatabuya na gunuvi vakalailai ni alakaolo. * Ena yasana adua, e vakarautaka na ‘waini, me vakamarautaka na loma ni tamata, kei na waiwai me lumilumisa kina na matana, kei na kakana me vakaukauataki koya.’ (Same 104:15) Ena dua na gauna, a vakarautaka na “waini vinaka” o Jisu Karisito ena dua na soqo ni vakamau, ena nona vukica na wai me waini.​—Joni 2:​3-​10, Ai Vola Tabu.

E kila vinaka na dauveibuli na kena rawa ni vakaleqa na yagoda kei na noda vakasama na alakaolo. Ena iVolatabu, na Tamada vakalomalagi e ‘vakavulici keda meda vinaka kina,’ e vakaroti keda meda qarauna na gunu e dau veivakamatenitaki. (Aisea 48:17) Vakasamataka na ivakasala matata qo:

“Ni kua tale ga ni mateni ena waini, ni dau yaco kina na itovo velavela.” (Efeso 5:​18) ‘Era na sega ni rawata na matanitu ni Kalou o ira na daumateni.’ (1 Korinica 6:​9-​11, Ai Vola Tabu) E vakatabuya na vosa ni Kalou na “vaqara mateni, soqo ni marau velavela kei na so tale na ka va qori.”​—Kalatia 5:​19-​21, Byington.

Meda raica mada eso na leqa ni gunuvi vakasivia na alakaolo.

Leqa ni Gunusivia

E rawa ni vinaka na alakaolo, ia na ka era waki vata e rawa ni vakaleqa na vakasama kei na yago. Na gunuvi vakasivia ni alakaolo e rawa ni vakavuna eso na leqa qo:

E vakaleqa na vakatulewa na gunu vakasivia, e ‘sega kina na vakasama vinaka.’ (Vosa Vakaibalebale 23:​33, TEV) O Amena, na daugunu e cavuti ena ulutaga sa oti, e tukuna: “Na gunu vakasivia e sega wale ga ni vakaleqa na yago; e leqa tale ga kina na vakasama kei na itovo ni rai. O sega ni  vakasamataka na rarawa ena tarai ira eso.”

Ena veivakacalai. E vakarota na iVolatabu: “Na waini kei na waini vou sa kauta vakatani na loma ni tamata.” (Osea 4:​11) Ena sala cava? Ni sivia na alakaolo e gunuvi, na ka eda sega ni rawa ni cakava se vakasamataka nida bula vinaka sa vakadonuya se taleitaka na lomada. Sa na malumalumu noda vakatulewa meda caka vinaka. E rawa ni vakaleqa na ivakatagedegede savasava na alakaolo, eda rawa ni vakaleqai sara ga vakayalo.

O Joni, me kena vakaraitaki, a veivala kei watina qai lako ena dua na vale ni gunu. Se qai vica ga na mena bilo me vakaseavutaka kina nona cudru, sa torovi koya yani e dua na marama. Ni oti e vica tale na bilo, rau biubiu vata kei na marama ya rau lai veibutakoci sara. E veivutunitaka sara ga o Joni na ka e cakava, a rawa sara ga ni tarovi koya ke sega ni sivia na ka e gunuva.

Na gunuvi vakasivia ni alakaolo eda na sega ni lewa vinaka kina na ka eda tukuna kei na ka eda cakava. “O cei e dau sotava tu ga na leqa? O cei e dauveiba se veivala?” e taroga na iVolatabu. “O ira era yadra vakasivia me iotioti ga ni bilo.” (Vosa Vakaibalebale 23:​29, 30, Contemporary English Version) Na gunu vakasivia e vaka “ni o lomalomaca ena nomu kaba toka ena vana ni dua na waqa e suaigelegele ni sokota na wasawasa voravora.” (Vosa Vakaibalebale 23:​34, TEV) O koya e sivia na ka e gunuva e “sega ni kila se a mavoa vakacava” ni yadra ena siga tarava.​—Vosa Vakaibalebale. 23:​35, CEV.

E rawa ni vakaleqa noda bula na gunu vakasivia. ‘E kata me vaka na gata bati gaga.’ (Vosa Vakaibalebale 23:​32, New International Version) E vakadinadinataka na vuku vakavuniwai na dina ni vosa makawa qo. E vakarerevaki na alakaolo ke gunuvi vakasivia, e vu ni so na mate, me vaka na veimataqali kenisa, mateniyate, vakaleqa na liva, mate ni davuibuco, lailai na suka ni yagodra na matenisuka, vakaleqa na gone se qai kunekunetaki, strouk, se mateniuto, qo e vica mada ga na mate. Na gunu vakasivia e rawa ni sega ni vakilai koya kina e dua se mate sara. Na leqa bibi sara ni gunu vakasivia e sega ni volai ena ivola vakavuniwai.

Leqa rerevaki duadua ni gunu vakasivia. Ena rairai sega ni mateni sara e dua e gunu, na gunu vakasivia e rawa ni veivakaleqai  vakayalo. E tukuna vakamatata na iVolatabu: “Era na ca ko ira era souta na gunu yaqona e na mataka caca; ka bogicaka, me ra mateni e na waini!” Na vuna? E vakamacalataka o Aisea na leqa vakayalo ni gunu vakasivia: “Na cakacaka i Jiova era sa sega ni veinanuyaka, kei na ka sa cakava na ligana era sa sega ni nanuma kina.”​—Aisea 5:​11, 12.

E tukuna na vosa ni Kalou meda kua ni “tiko kei ira era daugunu waini.” (Vosa Vakaibalebale 23:20) O ira na kenamarama era vakaroti mera kua ni “bobula ena nodra dau gunu waini.” (Taito 2:3) Na vuna? E dau vakamalua qai sega ni dau kilai nodra sa vakalevutaka toka na ka era gunuva, ra veitaravitaka tale ga. Yaco sara me tukuna na daugunu, “ka’u na yadra li ninaica? ka’u na baci qara tale. ” (Vosa Vakaibalebale 23:35) E rerevaki sara ke mateni tu mai na bogi e dua qai qara tale na gunu ena mataka tarava me vakaoti kina nona mateni.

E vakarota na iVolatabu ni o ira na “gunu waini vakasivia, soqo ni marau vakalialia, veisisivi gunu. . . era na saumitaro vei koya e sa vakarau tu me lewai ira na bula kei ira na mate.” (1 Pita 4:​3, 5) Nida raica vata kei na ituvaki rerevaki eda donuya tu qo, e vakarota o Jisu: “Dou qarauni kemudou de bibi na lomamudou ena kana vakasivia kei na gunu vakasivia kei na lomaocaocataki ni bula, ena qai yaco vakidacala vei kemudou na siga [i Jiova] me vaka na icori.”​—Luke 21:​34, 35.

Na cava e rawa ni cakava e dua e daugunu me kua kina ni ‘bibi na lomana ena gunu vakasivia’?

[iVakamacala e ra]

[iYaloyalo ena tabana e 4]

E vakavu leqa na gunuvi vakasivia ni alakaolo