2—Meda Masu Vei Cei?
E DAU rogoci na masu kece, veitalia na yaca se kalou cava e masuti? Levu nikua era ciqoma ni vakadina kina. Era taleitaka na vakasama qo e levu vei ira na dau tokona na lotu veicurumaki, ena nodra vinakata me vakadonui na lotu kece se mani ra duidui vakacava. Ia vakacava e dina na vakasama oya?
E kaya na iVolatabu ni levu na gauna e dau vagolei cala na masu. Ena gauna a volai kina na iVolatabu, e sa dau matau tu vei ira na lewenivanua mera masu ina matakau. Ia e vakarota wasoma na Kalou ni cala na ivalavala qori. Me kena ivakaraitaki, e tukuna me baleta na matakau na Same 115:4-6: “Era sa vakadaligana, ia era sa sega ni rogo rawa.” E matata vinaka na tikina qo. Na cava mo masuta kina na kalou ena sega ni rogoci iko?
E vakamacalataki vinaka qori ena dua na itukutuku ena iVolatabu. A boletaka na parofita dina o Ilaija vei ira na parofita i Peali mera masuta na nodra kalou, oti ena qai masuta tale ga o koya na nona Kalou. A tukuna o Ilaija ni na rogoca na masu na Kalou dina, na kalou lasu ena sega ni rogoca. Era mani vakadonuya na bolebole qori na parofita i Peali ra tekivu masu sara, dua na gauna dede ra masu toka kina ra masu tale ga vagumatua, ra lai tagi vakadomoilevu sara—ia e sega ni dua na ka e yaco! E kaya na kena volaitukutuku: “Sa sega na domo e rorogo, se dua e vosa mai se dua e rogoca.” (1 Tui 18:29) Ia na cava e yaco ni masu o Ilaija?
A rogoci koya na Kalou, ni masu oti ga a lutu mai lomalagi na bukawaqa qai kania na isoro a vakarautaka o Ilaija. Na cava a rogoci ga kina na masu i Ilaija? Na kena isau matata e kune ena nona masu ena 1 Tui 18:36, 37. E masu lekaleka sara—e rauta ni 30 ga na vosa ena iVolatabu vakaIperiu taumada. Ia ena vica wale ga na vosa qori, e vakatolu na nona vakayagataka o Ilaija na yaca ni Kalou, Jiova.
O Peali, na kena ibalebale “itaukei” se “turaga” e nodra kalou na kai Kenani ra qai vakatokayacataka na nodra kalou ni dui yasana. Ia e duatani duadua na yaca Jiova, ni sega tale ni dua e vakatokai ena yaca qori e lomalagi se vuravura. A tukuna na Kalou qo vei ira na nona tamata: “Koi au ko Jiova; sai koya oqo na yacaqu; ia na vakarokoroko me caka vei au ka’u na sega ni solia vua e dua tani.”—Aisea 42:8.
Na cava a sega ni rogoci kina na nodra masu na parofita i Peali, qai rogoci ga na masu i Ilaija? E torosobu na nodra ivalavala na dausokaloutaki Peali, ni vakadonui mera veiqaravi kina na tagane kei na yalewa saqamua kei na nodra cabori vakaisoro na tamata. Ia e rakorako na ivalavala ni sokalou e vakavulici ira kina na nona tamata na Isireli o Jiova, ra sega gona ni cakava na ivalavala torosobu va qori. Vakasamataka mada ke o volavola vua na nomu itokani o dau doka, o vola sara vakamatata na yacana ena waqanivola qai vakauta. O namaka me lai taura na nomu ivola e duatani tale e veicalati na nona itovo kei na ka kece e kilai kina na nomu itokani? Dravusakulukulu!
Na bolebole i Ilaija vei ira na parofita i Peali a vakadinadinataka ni sega ni dau rogoci na masu kece
Ke o masu vei Jiova, o sa masu tiko vua na Dauveibuli, na Tamada na kawatamata. * A tukuna na parofita o Aisea ena nona masu: “Sai kemuni Jiova, na tamai keimami.” (Aisea 63:16) Qori sara ga o koya a vakaibalebaletaka o Jisu Karisito ni tukuna vei ratou na nona imuri: “Au sa lako cake vei Tamaqu, na Tamamudou tale ga, vua na noqu Kalou, na nomudou Kalou tale ga.” (Joni 20:17) Na Tamai Jisu o Jiova. Qo na Kalou e dau masuta o Jisu, a vakavulici ira tale ga na nona imuri mera masuta.—Maciu 6:9.
E tukuni beka ena iVolatabu meda masu vei Jisu, Meri, ira na sanito, se vei ira na agilosi? Sega—vei Jiova duadua ga. Meda raica mada e rua na vuna. Kena imatai, na masu e dua na ivalavala ni sokalou, qai tukuna na iVolatabu me sokaloutaki ga vakatabakidua o Jiova. (Lako Yani 20:5) Kena ikarua, e tukuna na iVolatabu ni vakatokai o Jiova me “daurogoca na masu.” (Same 65:2) E levu na itavi e dau lesia o koya vei ira eso tale, ia e nona duadua ga na itavi me rogoca na masu. Ni yalataka sara ga na Kalou me rogoca na noda masu.
Ke o vinakata me rogoca na Kalou na nomu masu, nanuma na ivakasala vakaivolatabu qo: “Era na bula o ira kece era masuta na yaca i Jiova.” (Cakacaka 2:21) Ia ena rogoca o Jiova na masu kece veitalia se da masu vakacava? Se tiko e dua tale na ka meda kila me qai rogoca kina o Jiova na noda masu?
^ para. 9 E kaya eso na ivakavuvuli vakalotu ni cala ke cavuti na yaca ni Kalou ena gauna sara mada ga ni masu. Ia na yaca qori e basika voleka ni vaka7,000 ena vosa a volai taumada kina na iVolatabu, qai cavuti vakalevu ena nodra masu kei na same na dauveiqaravi yalodina i Jiova.
