NA MASU kece era dau cavuta na lotu vaKarisito, e dua qo e dau cavuti vakalevu duadua. Se mani dina qori se sega, e kunei ni levu era taura cala na ibalebale ni masu a vakavulica o Jisu​—e vakatokai ena so na gauna me Masu ni Turaga. Era cavuqaqataka e veisiga e le milioni vakacaca, de dua era dau cakava ena siga. Ia a sega sara ga ni nanuma o Jisu me caka va qori na masu. Eda kila vakacava?

Ni bera ni tukuna na masu qori o Jisu, a kaya: “Ni o masu, kua ni cavuta tiko ga e dua na qaqanimasu.” (Maciu 6:7) E vakacala tale beka o Jisu na ka e tukuna ena nona kotora na veimalanivosa me wiligusutaki se talevi? Sega! A vakavulici keda ga o Jisu ena ka meda masulaka, a vakamatatataka tale ga na veika bibi meda vakasamataka tiko nida masu. Meda vocia mada vakavudi na ka e tukuna. Na masu a vakavulica e volai ena Maciu 6:​9-13.

A vinakata o Jisu me ratou nanuma tiko na nona imuri ni masu kece e dodonu me vagolei vei Tamana, o Jiova. O kila na vuna e rui bibi kina na yaca ni Kalou, kei na vuna me vakalagilagi se dokai kina na yacana?

Ni se qai tekivu ga na bula ni kawatamata, sa vosavakacacataki voli mai na yaca tabu ni Kalou. E tukuna o Setani na meca ni Kalou ni o Jiova e daulasu, e iLiuliu tawaveinanumi, e sega tale ga ni dodonu me liutaki ira na nona ibulibuli. (Vakatekivu 3:​1-6) E levu era tovata kei Setani ena nodra vakavulica ni Kalou e yalodredre, yalodua, sega ni veikauaitaki ra qai cakitaka sara mada ga ni o koya na Dauveibuli. Eso era taketetaka na yacana nira bokoca na yaca i Jiova mai na ivakadewa ni iVolatabu ra qai vakatabuya me vakayagataki.

E tukuna na iVolatabu ni na muduka na Kalou na cakacaka tawadodonu kece qori. (Isikeli 39:7) Sa na qai vakacegui keda ena ka kece eda gadreva, ena walia kece tale ga na noda leqa. Ena sala cava? E laurai na kena isau ena vosa a cavuta tarava o Jisu ena masu a vakavulica.

Era veilecayaki vakalevu na italatala ni lotu nikua ena veika e vauca na Matanitu ni Kalou. Ia era kila na rogoci Jisu ni sa tukuna voli mai vakabalavu o ira na parofita ni Kalou ni o koya na Mesaia, na iVakabula e digitaka na Kalou ena liutaka e dua na Matanitu ena qai veisautaka na ituvaki kei vuravura. (Aisea 9:​6, 7; Taniela 2:44) Ena vakalagilagi kina na yaca ni Kalou ni na vakatakila na lasu i Setani, ena vaqeavutaki koya kei na nona cakacaka kece. Io, na Matanitu ni Kalou ena vakaotia na ivalu, tauvimate, dausiga​—na mate sara mada ga. (Same 46:9; 72:​12-16; Aisea 25:8; 33:24) Ni o masuta me yaco mai na Matanitu ni Kalou, o sa kerea tiko mera vakayacori na yalayala kece qori.

E kilai ena vosa qori i Jisu ni na vakayacori dina e vuravura na loma ni Kalou me vaka ga e caka tiko mai lomalagi, e nona itikotiko na Kalou. A sega ni tarovi rawa na kena vakayacori na loma ni Kalou mai lomalagi; ni a qaqa kina na Luve ni Kalou vei Setani kei ira na nona ilala ra qai kolotaki sobu mai vuravura. (Vakatakila 12:​9-12) Me vaka ga na rua na ka e kerei ena masu a vakavulica o Jisu, na ikatolu ni ka e kerei qo e uqeti keda meda vakaliuca na ka e bibi cake​—na loma ni Kalou, sega ni ka eda vinakata. E loma gona ni Kalou me yaco na veika vinaka vei ira kece na nona ibulibuli. Na turaga uasivi sara mada ga o Jisu a tukuna vei Tamana: “Me kua ni yaco na lomaqu, me yaco ga na lomamuni.”​—Luke 22:42.

A vakaraitaka e keri o Jisu ni rawa nida kerea tale ga na ka eda gadreva. E sega ni cala meda kerea vua na Kalou na veika meda bula kina e veisiga. Nida cakava qori, eda na sega ni guilecava ni o Jiova e “solia vei keda na bula, na icegu, kei na ka kece ga.” (Cakacaka 17:25) E tukuna na iVolatabu ni o Jiova e itubutubu dauloloma, e dau marau ni solia na ka era gadreva na luvena. Ia me vaka ga e dua na itubutubu vinaka, ena sega ni solia na ka ena vakaleqai ira.

O gadreva na veivosoti ni Kalou? Era sa sega ni kila e levu nikua na ibalebale ni ivalavala ca kei na kena bibi. Ia na iVolatabu e kaya ni ivalavala ca e vu ni noda leqa, ni vakavuna na noda mate. Nida sucukaya mai na ivalavala ca, eda dau cala kina, na noda inuinui ni bula tawamudu e vakatau sara tiko ga ena nona vosoti keda na Kalou. (Roma 3:23; 5:12; 6:23) E veivakacegui ni tukuna na iVolatabu: “Kemuni Jiova, o ni dauyalovinaka qai tu vakarau ni veivosoti.”​—Same 86:​5, NW.

O raica rawa na vuna eda gadreva vakalevu kina ena gauna qo na veitaqomaki ni Kalou? Era sega ni via vakabauta e levu, ni bula dina tiko o Setani “na Vunica.” Ia e vakavulica o Jisu ni bula dina tiko o Setani, e vakatokai koya sara mada ga me “turaga ni vuravura qo.” (Joni 12:31; 16:11) Sa vakadukadukalitaka o Setani na vuravura e lewa tu qo, e vinakata tale ga me vakadukadukalitaki iko mo kua kina ni veiwekani voleka kei na Tamamu o Jiova. (1 Pita 5:8) Ia e kaukaua cake sara o Jiova vei Setani, qai vinakata me taqomaki ira era lomani koya.

 Na ivakamacala lekaleka oya me baleta na veika e vakabibitaki ena masu a vakavulica o Jisu, e sega ni tukuni kece kina na veika eda rawa ni kerea. Nanuma, e tukuna na 1 Joni 5:14 me baleta na Kalou: “Se cava ga eda kerea me salavata kei na nona inaki, ena rogoci keda o koya.” Kua gona ni nanuma ni so na leqa lalai o sotava ena sega ni yaga mo masulaka.​—1 Pita 5:7.

Ia vakacava na gauna kei na vanua ni masu? E bibi na gauna kei na vanua eda masu kina?