E “Daurogoca na Masu”
Toro Voleka Vua na Kalou
E “Daurogoca na Masu”
ENA rogoca o Jiova na nodra masu ena yalodina o ira era qaravi koya mai vu ni lomadra? Na italanoa ni dua na turaga ena iVolatabu o Jepesi, eda sega ni kila e levu na kena itukutuku, e vakaraitaka sara ga ni o Jiova e “daurogoca na masu.” (Same 65:2) E laurai na italanoa lekaleka qo ena dua na vanua e sega ni vakabauti ni tu kina—ena ivolatukutuku ni yatukawa ena imatai ni vica na ivola ni iMatai ni Veigauna. Meda raica mada na 1 Veigauna 4:9, 10.
Eda na wilika na itukutuku kece kei Jepesi ena rua na tikina qo. E tukuna na tikina e 9 ni o tinana a “vakayacani koya ko Jepesi, ni sa kaya, Au a vakasucumi koya e na rarawa.” * Na cava e digia kina na yaca qori? E duatani beka na rarawa e vakila ni vakasucumi Jepesi mai vei ratou na vo ni luvena? Sa yada beka ena gauna qori qai rarawataka ni sega ni tiko o watina me raica na sucu ni luvedrau? E sega ni tukuna na iVolatabu. Ia ena sakitaki luvena ena dua na siga na tina qo. Eratou yalovakaturaga na taci Jepesi, ia e “yalovakaturaga cake vei iratou na tacina ko Jepesi.”
E daumasu mai vu ni lomana o Jepesi. Ena itekivu gona ni nona masu, a masuta na veivakalougatataki ni Kalou. Oti a qai kerea e tolu na ka e vakaraitaka na kaukaua ni nona vakabauta.
Na kena imatai a kerea vua na Kalou: Ni “vakalevutaka na noqu yasana.” (Tikina e 10) Na turaga vinaka qo a sega ni kocova me levu na nona qele, se kocova na ka e sega ni nona. De dua na ka e kerea e vakaibalebaletaki vei ira na tamata, sega ni qele. A rairai vinaka na inaki ni nona kerea me vakalevutaki na iyalayala ni nona vanua mera tiko kina e levu era sokaloutaka na Kalou dina. *
Kena ikarua, a kerea o Jepesi me tiko kei koya na ‘liga’ ni Kalou. Na liga vakaivakatakarakara ni Kalou e vakaibalebaletaka na kaukaua e vakayagataka me vukei ira era qaravi koya. (1 Veigauna 29:12) Me rawata na ka e kerea mai vu ni lomana o Jepesi, a vakararavi vakatabakidua vua na Kalou e sega ni lekaleka na ligana me vukei ira era vakabauti koya.—Aisea 59:1.
Kena ikatolu, a masuta o Jepesi: “Mo ni tarovi au mai na ca, me kakua ni vakararawataki au!” Na vosa “me kakua ni vakararawataki au” a rairai sega ni tukuna tiko o koya me drotaka na leqa, ia a kerea tiko ga me kua ni rarawataka vakasivia na ca.
Na masu i Jepesi e vakaraitaka ni nuitaki koya e daurogoca na masu kei na nona vakabauta, e kauaitaka tale ga na sokalou dina. Na cava a cakava o Jiova? A qai tini na italanoa lekaleka qo ena vosa: “A sa vakayacora na Kalou na ka sa kerea ko koya.”
E sega ni veisau o koya e daurogoca na masu. E taleitaka na nodra masu o ira era qaravi koya. Mera nuidei o ira era vakabauti koya ra qai nuitaki koya ena vosa qo: “Eda kila se cava ga eda kerea me salavata kei na nona inaki, ena rogoci keda o koya.”—1 Joni 5:14.
[iVakamacala e ra]
^ para. 2 Na yaca Jepesi e tauri mai na dua na vosa e kena ibalebale na “rarawa.”
^ para. 4 Na ivakadewa vakaJiu ni iVolatabu na Targums, e vakadewataka na ka e tukuna o Jepesi: “Ni vakalougatataki au me levu na luvequ, ni vakalevutaka na iyalayala ni noqu vanua mera tiko kina na tisaipeli.”
