Yavu ni Vuvale Mamarau

Veimaliwai Vinaka kei Rau na Vugomu

E kaya * o Neli: E sega ni dau madua o tinai Rusi me tukuna ni sega ni taleitaki au. Ia e va tale ga oya na ka rau cakava na noqu itubutubu vei Rusi ni keirau gade vei rau. Se qai vakadua meu raica ni rau vosa veibeci va oya! E vakavu leqa na neirau dau gade vei rau na noqu itubutubu, se vei rau na itubutubu nei Rusi.

E tukuna o Rusi: E sega ni dua na tagane se yalewa e donu vei tinaqu me vakawatitaka na luvena, qo na vuna mai na kena itekivu sa dau vakaraitaka tu ga o tinaqu ni sega ni taleitaki Neli. E va tale ga oya na nodrau rai na itubutubu i Neli me baleti au. Ni yaco na ituvaki qo, sa qai kuri ga ni leqa na neirau dau tovaki rau na neirau dui itubutubu, kei na neirau dau veibeitaki.

ERA rairai dau veiwalitaka vakalevu na dauvakalasalasa na veileqaleqati ni bula vakaveivugoni, ia qo e sega ni ka ni lasa ena bula ni veisiga. E tukuna o Reena e dua na yalewa vakawati mai Idia: “Sa vica vata na yabaki na nona dau via vakatulewa ena neirau bula vakawati o vugoqu yalewa. Niu sega ni cakava rawa vua e dua na ka e lai ku vei watiqu na noqu cudru. E kena irairai ni sega ni vakadeitaka rawa o watiqu me vakamarautaki tinana se me vakamarautaki au.”

Na cava era dau via vakatulewa kina eso na itubutubu ena bula vakawati nei luvedra? E dua na kena ivakaraitaki e tukuna o Neli e vakamacalataki ena itekivu ni ulutaga qo. “De dredre mera vakasamataka me dua e gone qai sega soti vua na kila me qarava na luvedra tagane se na luvedra yalewa.” E dua tale na vuna e vakamacalataka o Dilip na wati Reena. “O ira na itubutubu era susuga mai na luvedra ra qai solia taucoko kina na nodra bula era nanuma nira sa vakuai mai na bula i luvedra. Era leqataka tale ga ni se sega ni yalomatua sara na luvedra tagane se yalewa me rawa ni qarava vinaka na nona vuvale.”

Ia ena so na gauna o rau ga na veiwatini erau vakavuna na nona dau via vakatulewa na itubutubu ena nodrau bula vakawati. Meda raica mada na nodrau ivakaraitaki o Michael kei Leanne e dua na veiwatini erau tiko mai Ositerelia. “Na vuvale nei Leanne eratou dau veivolekati, ratou dau veivosaki vakadodonu,”  e kaya o Michael. “Ni keirau vakamau oti, e se dau kere ivakasala ga vei tamana o Leanne ena so na ka me keirau vakatulewa ga kina. E levu na ka e kila o tamana, ia au sega ni taleitaka ni lako vua qai sega ni tukuna vei au!”

E matata ni veileqaleqati vakaveivugoni e dau vakaleqa na bula vakawati. O sotava tale tiko ga qori? Ena veimaliwai vinaka vakacava o watimu kei rau na nomu itubutubu? O na veimaliwai vinaka vakacava kei rau na nona itubutubu? Meda raica mada e rua na ka e vakadredretaka kei na ka o rawa ni cakava.

KENA IMATAI: E rairai dau volekati rau vakalevu na nona itubutubu o watimu. E kaya o Luis e dua na tagane vakawati mai Sipeni: “E nanuma o watiqu ni tawayalodina ke sega ni keirau tiko voleka vei rau na nona itubutubu.” E tomana, “Ia ena gauna e sucu kina na luvei keirau tagane, voleka ni veisiga erau tu e vale na noqu itubutubu, e lai lomaocaoca wale kina o watiqu. Qo e vakavuna na neirau dau veiba.”

Na ka me vakasamataki: Me baleta na ituvatuva ni vakawati e kaya na iVolatabu ni “na biuta . . . na tamana kei tinana na tagane, ka kabita na watina: a rau na lewe dua ga.” (Vakatekivu 2:24) Na “lewe dua ga” e sega ni vakaibalebale ena nodrau bula vata ga. Ia e vakaibalebaletaka na nodrau tauyavutaka na veiwatini e dua na vuvale vou​—erau na vakaliuca qo mai na kena erau dui cavutu mai kina. (1 Korinica 11:3) Io, e dodonu ga me rau dokai rau na nodrau dui itubutubu na veiwatini, e okati kina na nodrau daukauaitaki rau. (Efeso 6:2) Vakacava na sala e kauaitaki rau kina na nona itubutubu o watimu, o lai nanuma kina ni o sega ni kauaitaki?

Na ka o rawa ni cakava: Raica vakayalomatua na ituvaki. O leqataka ni dau kabiti rau na nona itubutubu o watimu, se baleta ga ni o sega ni dau volekati rau va oya na nomu itubutubu? Ke va qori, ena tara vakacava na nomu rai me baleta na ituvaki qo na nomu isususu? De vakavuna tiko qo na nomu vuvu?​—Vosa Vakaibalebale 14:30; 1 Korinica 13:4; Kalatia 5:26.

Mo vakalewa vinaka na kemu ituvaki ni o sauma na taro qori. Ia e bibi mo cakava vaka kina. Ke sa dau vu tu ga ni nomudrau veiba vakaveiwatini na veika me baleti rau na vugomudrau, e nomudrau leqa dina na nomudrau bula vakawati sega ni o rau na dui vugomudrau.

E levu na leqa e basika ena bula vakawati ni sega ni dau tautauvata na nodrau rai na veiwatini. Vakacava mo saga mo raica na ka mai na rai nei watimu? (Filipai 2:4; 4:5) Qori na ka a cakava o Adrián e dua na tagane vakawati mai Mexico. E kaya: “O watiqu e cavutu mai na vuvale e dau qiqo na nodratou rai, au sega gona ni veivolekati kei rau na vugoqu. Ena dua na gauna balavu au sega tu kina ni vinakata me keitou veimaliwai. Qo e ca ga kina na neirau bula vakaveiwatini ni vinakata o watiqu me volekati ratou tiko ga na nona vuvale, vakabibi o tinana.”

A mani veisau na ivakarau ni rai nei Adrián me baleta na ituvaki qo. E kaya: “Au kila na neirau veimaliwai vakalevu kei rau na vugoqu ena ca ga kina na lomai watiqu, ia ke sega ni keitou veimaliwai ena yaco tale ga kina na leqa. Au mani saga meu veimaliwai vinaka tiko ga kei rau na vugoqu.” *

TOVOLEA MADA QO: Drau dui vola vakaveiwatini na ka drau vakasamataka ni dodonu me kauaitaki ena bula vakaveivugoni. O rawa ni vola “Au nanuma ni . . . ” Drau veisau pepa. Oti drau veivosakitaka vata na sala vinaka me wali kina na veika drau dui kauai kina.

KENA IKARUA: E dau vakatulewa ena nomu bula vakawati na vugomu, e dau veivakasalataki ni sega ni gadrevi. E tukuna o Nelya e dua na yalewa vakawati mai Kazakhstan: “Ena vitu na yabaki ni neirau bula vakawati keirau lai  tiko vata kei na vuvale nei watiqu. E dau veibataki na sala me ratou tuberi kina na luvei keirau vaka kina na noqu vakasaqa kei na sasamaki. Au veivosakitaka na tikina qo vei watiqu kei vugoqu yalewa, ia e tubu ga kina na leqa!”

Na ka me vakasamataki: Ni o sa vakawati sa sega ni rau lewai iko na nomu itubutubu. Ia e tukuna na iVolatabu “ni ulu ni tagane yadua o Karisito, e ulu ni yalewa na tagane”​—oya o watina. (1 Korinica 11:3) Me vaka sa vakamacalataki oti ni dodonu me rau doka na nodrau dui itubutubu na veiwatini. E kaya kina na Vosa Vakaibalebale 23:22: “Mo vakarorogo vua drau sa veitamani dina kaya, kakua talega ni ko beci tinamu ni sa qase mai.” Ia vakacava ke rau sega ni via kauaitaka na ituvatuva ni ulunivuvale na nomu itubutubu se na itubutubu nei watimu ena nodrau via vakatulewa ga?

Na ka o rawa ni cakava: Ena veinanumi, saga mo kila na vuna e via oga kina o vugomu ena bula nei luvena. E tukuna o Rusi sa cavuti oti mai: “Ena so na ituvaki era via kila na itubutubu ni o ira na luvedra era se kauaitaki ira tiko ga.” Na nodra dau oga tu ena nodra bula na luvedra de dua era sega ni nakita na nodra dau via vakatulewa ena bula vakawati nei luvedra, ena rairai rawa ni wali qo ena kena muri na ivakasala ena iVolatabu mera ‘dau yalorawarawa, mera dau veivosoti tale ga vakarawarawa ke dua e cudruvaka e dua na ka vua e dua tale.’ (Kolosa 3:13) Ia vakacava ke sa qai vakavuna ga vakalevu na nomudrau dau veiba vakaveiwatini na nona dau via vakatulewa o vugomu?

Eso na veiwatini era kotora na iyalayala vei ira na nodra dui itubutubu. E sega ni kena ibalebale me veibeci na sala e caka kina. * Ia mo dau vakaraitaka ena ka o cakava ni o vakaliuci watimu. Me kena ivakaraitaki, e kaya o Masayuki e dua na tagane vakawati mai Japani: “Ke rau tukuna na nomu itubutubu na nodrau nanuma, kua ni totolo ga mo vakaiotaka na ka erau tukuna. Mo nanuma tiko ni o sa tauyavutaka e dua na vuvale vou. Ena vinaka mo na rogoca e liu na nanuma nei watimu me baleta na ivakasala qori.”

TOVOLEA MADA QO: Mo drau veivosakitaka vakaveiwatini na sala cava e dau vakavuna kina na veiba na nodrau dau via vakatulewa na itubutubu. Mo drau vola vata na iyalayala drau kotora kei na sala mo drau muria kina, drau vakaraitaka tale ga ni drau dokai rau tiko ga na nomudrau itubutubu.

Ena wali e levu na veileqaleqati ni bula vakaveivugoni ke kilai na vuna, qai kua ni laiva me drau veivala kina vakaveiwatini. E kaya o Neli me baleta na vakasama oya: “Ena so na gauna e dau mosimosi dina ni keirau veivosakitaka vakaveiwatini na nodrau malumalumu na neirau dui itubutubu. Ia keirau sa qai vulica me kua ni keirau cakava qori me keirau veivakacudrui kina, ia me keirau walia ga na leqa. Ni keirau cakava qo, keirau veivolekati sara kina vakaveiwatini.”

[iVakamacala e ra]

[iYaloyalo ena tabana e 28]

TAROGA . . .

▪ Na itovo totoka cava au raica vei rau na vugoqu?

▪ Au na vakaraitaka vakacava niu kauaitaki watiqu, au dokai rau tale ga na noqu itubutubu?