A Kila na Kalou ni Rau na Valavala ca o Atama kei Ivi?

E LEVU era via kila na isaunitaro qori. Ni tarogi na vuna e vakatara kina na veika ca na Kalou, e dau vakalevu ga me veivosakitaki na nodrau valavala ca na imatai ni veiwatini ena were o Iteni. Na vakasama ni ‘Kalou e kila na ka kece,’ era na rairai nanuma kina eso ni sa kila rawa tu ni rau na talaidredre vua o Atama kei Ivi.

Kevaka sa kila rawa tu na Kalou ni rau na valavala ca na veiwatini uasivi qo, na cava e vakaraitaka oya me baleti koya? Qori ena raici kina vakatani na nona itovo na Kalou. Me tawaveinanumi, sega ni lewadodonu, qai sega ni veikauaitaki. Eso era na rairai nanuma ni tawaloloma, ke biuti rau ena dua na ituvaki e kila ni rau na leqa kina. Era rairai beitaka na Kalou ni vakavuna se a tokona na veika ca kei na rarawa kece e yaco ena veitabagauna. Eso tale era nanuma ni rairai lialia na Dauveibuli.

Oya beka na nona itovo na Kalou o Jiova e tukuni ena iVolatabu? Meda kila na kena isau, ena vinaka meda raica mada na ka e tukuna na iVolatabu me baleta na cakacaka ni ligai Jiova kei na nona itovo.

“Sa Ka Vinaka Sara”

Na veika kece a bulia na Kalou, okati kina o rau na imatai ni veiwatini, e tukuna na Vakatekivu: “Sa vakaraica na Kalou na ka kecega sa bulia ko koya, ka raica, sa ka vinaka sara.” (Vakatekivu 1:​31) A uasivi na nodrau bula o Atama kei Ivi qai ganiti rau vinaka na vuravura rau vakaitikotiko kina. A sega ni dua na ka e leqa ena nodrau bula. Ni rau buli me “vinaka sara,” a namaki tale ga me rau bulataka na itovo vinaka. Erau a buli me rau “ucuya na Kalou.” (Vakatekivu 1:​27) A rawa gona me rau bulataka na itovo ni Kalou, me vaka na vuku, loloma dina, lewadodonu, kei na cakavinaka. Ke rau muria na itovo qori ena vukei rau me rau vakatulewa vinaka, erau na vakamarautaka tale ga na Tamadrau vakalomalagi.

A solia o Jiova na galala ni vakatulewa vei rau na ibulibuli vuku uasivi. Erau a sega gona ni porokaramutaki tu me vaka na misini me rau vakamarautaka na Kalou. Vakasamataka mada. Na iloloma cava o na marautaka​—na kena e soli ena voraki se na kena e vu mai na lomana e dua? Sa macala tu ga na kena isau. Ke rau a digia o Atama kei Ivi me rau talairawarawa vua na Kalou, ena marautaka vakalevu. Na nodrau rawa ni vakatulewa na imatai ni veiwatini erau na talairawarawa kina vua na Kalou mai vu ni lomadrau.​—Vakarua 30:​19, 20.

iValavala Dodonu, Lewadodonu, kei na Nona Vinaka

E vakatakilai ena iVolatabu na itovo i Jiova. Ni tu vua na itovo oya ena sega ni na cakava na ka ca. Ena Same 33:5 e tukuna ni o Jiova “sa vinakata . . . nai valavala dodonu kei na lewa dodonu.” E kaya na Jemesa 1:​13: “E sega ni rawa ni vakatovolei na Kalou ena ka ca, e sega tale ga ni vakatovolea e dua ena ka ca.” Ni sega ni veivakaduiduitaki qai nanumi Atama, a vakarota na Kalou: “E tara mo kana mai na kau kecega sa tu e na were: ia mai na kau sa kilai kina na ka vinaka kei na ka ca, mo kakua ga ni kana kina: ni ko na mate vakaidina e na siga ko sa kana kina.” (Vakatekivu 2:​16, 17) A rawa vei rau na imatai ni veiwatini me rau digia na bula tawamudu se na mate. Ena veidabui na Kalou ke vakaroti rau ena valavala ca sa kila rawa tu ni na tini ena leqa.  Ni “sa vinakata . . . nai valavala dodonu kei na lewa dodonu,” ena sega gona ni solia vei rau o Jiova na digidigi e sega ni tu.

Sa dua tale ga na ka na vinaka i Jiova. (Same 31:​19, NW) E vakamacalataka o Jisu na nona vinaka na Kalou: “O cei na tama e kere madrai vua o luvena qai solia vua na vatu? Se kere ika, ena solia vua na gata? O koya gona, ke sa rawa vei kemuni na tamata ivalavala ca moni solia na ka vinaka vei ira na luvemuni, sa na qai wacava sara na Tamamuni mai lomalagi ni na solia na ka vinaka vei ira era kerea vua!” (Maciu 7:​9-​11) Na Kalou e solia na “ka vinaka” vei ira na nona ibulibuli. E vakadinadinataki na nona vinaka ena sala e bulia kina na tamata kei na nodra itikotiko Parataisi. E ivakaraitaki beka ni loloma me vakarautaka e dua na itikotiko totoka na Turaga vinaka qo e Cecere duadua ni sa kila tu ni na kau laivi? Sega. Ena sega ni beitaki ena talaidredre ni kawatamata ni o koya e buli keda e valavala dodonu, e vinaka tale ga.

“Vuku Duadua Ga”

E tukuna na iVolatabu “ni vuku duadua ga” o Jiova. (Roma 16:27) Na vuku tawavakaiyalayala ni Kalou era vakadinadinataka na nona agilosi mai lomalagi. Era “kaila e na reki” nira raica na ibulibuli i Jiova e vuravura. (Jope 38:​4-7) E sega gona ni vakabekataki nira kauai vakalevu na ibulibuli vakayalo vuku qo ena veika e yaco ena were o Iteni. Ni vakatubuqoroqoro na veika e bulia na Kalou e lomalagi kei vuravura, e ivakaraitaki beka ni nona vuku me bulia e rua na kabula vakasakiti e matadra na agilosi ni kila rawa tu na Kalou ni rau na talaidredre? E ka vakalialia gona me nanumi ni sa nakiti oti tu me na yaco na leqa qo.

Eso era na rairai kaya, ‘E rawa vakacava me sega ni kila qori na Kalou vuku duadua?’ Na levu ni vuku i Jiova a rawa vua me kila na “kenai vakataotioti mai na kenai vakatekivu.” (Aisea 46:​9, 10) Ia a sega ni vakayagataka o Jiova na kila qori, me vaka ga na nona sega ni dau vakayagataka na nona kaukaua taucoko. E digia vakavuku na gauna me vakayagataka kina na veika sa kila rawa tu. Ena vakayagataka ena gauna veiganiti, me ganita tale ga na ituvaki.

Ena rawa ni vakatauvatani na nona sega ni via kila rawa na ka e yaco na Kalou ina dua na iyaya vou e tu nikua. Ni dua e sarava na qito katoni ena rairai lewa me sarava ga na kena itinitini me kila o cei e qaqa. Ia e rawa ni tekivu sarava mai na kena itekitekivu. O cei me vakalewai koya ke lewa me sarava na qito taucoko mai na kena itekivu? E va tale ga qori na nona lewa na Dauveibuli me kua ni kila na itinitini ni veika ena yaco. Ia a vakatulewataka ga me raica na ka era na cakava na nona ibulibuli e vuravura ni toso na gauna.

Sa cavuti oti mai ni nona vuku o Jiova a sega kina ni buli rau na imatai ni tamata me vaka na misini e porokaramutaki tu na ka me cakava. Ia ena nona loloma a solia vei rau na galala ni vakatulewa. Ke rau digidigi donu e ivakaraitaki ni nodrau vakavinavinaka, loloma, kei na nodrau talairawarawa, erau na marau, ena marau tale ga o Jiova na Tamadrau vakalomalagi.​—Vosa Vakaibalebale 27:11; Aisea 48:18.

E vakaraitaka na iVolatabu ni levu na ituvaki a sega ni via kila o Jiova na ka ena yaco. Me kena ivakaraitaki, ni sa voleka ni cabora na luvena na turaga yalodina o Eparama, a kaya o Jiova: “Ni’u sa qai kila ko sa rerevaka na Kalou, ni ko sa sega ni bureitaka vei au na luvemu, na luvemu e dua bauga.” (Vakatekivu 22:12) Ena yasana adua, ena so tale na ituvaki a “vakararawataki” Jiova na veika ca era cakava eso. Ke sa kila rawa tu na ka era na cakava, ena rarawataka beka?​—Same 78:​40, 41; 1 Tui 11:​9, 10.

E matata gona ni a sega ni kila tu vakailiu na Kalou vuku duadua ni rau na valavala ca na vuda. Ena ka sesewa dina ke da vakasamataka me bulia na tamata na Kalou ni sa kila vinaka tu ni na yaco ina nona bula na veileqa lelevu.

“Kalou ga na Loloma”

A vakavuna o Setani na meca nabadua ni Kalou na talaidredre mai Iteni mani yaco kina na leqa, ivalavala ca kei na mate. E vakatokai o Setani me “daulaba.” E vakadinadinataki tale ga ni o koya e “daulasulasu, e tama ni lasu kece.” (Joni 8:44) Ena nona inaki ca, a saga me boroya e dua na iyaloyalo ca me baleta na Dauveibuli yalololoma. A vinakata me beitaki Jiova ni vakavuna na ivalavala ca ni kawatamata.

Na nona loloma e vuna levu duadua e lewa kina o Jiova me kua ni kila vakailiu na nodrau na valavala ca o Atama kei Ivi. Qori na nona itovo talei duadua na Kalou. E kaya na 1 Joni 4:8: “Ni Kalou ga na loloma.” Na loloma na itovo e uqeta meda raica na veika era vinaka kina na so, sega ni kena veibasai. Io, nona loloma gona na Kalou o Jiova e uqeti koya me solia na veika vinaka vei rau na imatai ni veiwatini.

E macala nira rawa ni vakatulewa cala na ibulibuli ni Kalou e vuravura, ia a sega ni nuinuica se kasamitaka na Kalou dauloloma na ka ena cakava na nona ibulibuli uasivi. A vakarautaka na Kalou na ka kece me rau bula kina kei na veika me rau kila o Atama kei Ivi. A namaka gona me rau talairawarawa vua, sega ni talaidredre. E kila ni rau rawa ni yalodina, era qai mai vakadinadinataka qori eso era sega ni uasivi, me vakataki Eparama, Jope, Taniela, kei na levu tale.

A kaya o Jisu, “e rawarawa vua na Kalou na ka kece.” (Maciu 19:26) E veivakacegui dina qori. Na loloma gona i Jiova kei na nona itovo talei eso me vaka na lewadodonu, vuku, kei na kaukaua, e vakadeitaka ni dua na gauna ena vakaotia vakadua kina na vua ni valavala ca kei na mate.​—Vakatakila 21:​3-5.

E macala ni a sega ni kila rawa tu o Jiova ni rau na valavala ca na imatai ni veiwatini. Ni mosi vua na nodra talaidredre na kawatamata kei na rarawa e yaco kina, e kila na Kalou ni ituvaki qo ena lekaleka ga, ena sega tale ga ni vakalatia na kena vakayacori na nona inaki tawamudu me baleta na vuravura mera bula kina na kawatamata. O nanuma ni vinaka mo na kila mada na inaki oya kei na kena yaga vei iko ni sa vakavatukanataki? *

[iVakamacala e ra]

[Tikina bibi ena tabana e 14]

Ena gauna a buli rau kina na imatai ni tamata o Jiova, rau a sega ni vaka na misini me porokaramutaki tu na ka me rau cakava

 [Tikina bibi ena tabana e 15]

E kila na Kalou ni rau rawa ni yalodina o Atama kei Ivi