E Kauaitaki Iko Beka na Kalou?

O DAU vinakata mo lomani? Se o nanuma ni sega ni dua e kauaitaki iko? Nida bula tu ena vuravura osooso qai nanumi koya ga, eda na rairai nanuma ni sega ni dua ena kauaitaki keda se lomani keda. E dina na ka e tukuna na iVolatabu, ni levu nikua era kauaitaki ira ga era sa sega kina ni dauveikauaitaki.​—2 Timoci 3:​1, 2.

Se mani duidui na yabaki ni bula, itovo vakavanua, duivosavosa, se matatamata, eda gadreva kece meda lomani, meda veilomani tale ga. E tukuna eso na vakadidike ni buli na noda mona ena sala e rawa nida kila kina nida lomani da qai mareqeti. O Jiova ga e kila vinaka nida gadreva meda lomani qai taleitaki baleta ni a buli keda. Ke tukuna vei iko ni o talei vua, o na marautaka? E sega ni vakabekataki ni o na marautaka dina. Nida ivalavala ca, eda na vakadeitaka vakacava ni kauaitaki keda o Jiova? E kauaitaki keda yadudua? Na cava gona ena cakava e dua me lomani koya kina na Kalou?

E Kauai o Jiova

Ena rauta na 3,000 na yabaki sa sivi, a qoroya na daunisame e rerevaka na Kalou na totoka ni serau ni kalokalo ena bogi. E kila rawa na daunisame na uasivi ni nona lagilagi o koya e bulia na kalokalo e tawawiliki rawa. Ni vakasamataka na lagilagi e tu vei Jiova kei na noda somidi na kawatamata, a qoroya na daunisame na nona veikauaitaki vakayalololoma o Jiova: “Ni’u sa vakananuma na nomuni lomalagi, na cakacaka ni qaqalo ni ligamuni, na vula kei na kalokalo ko ni sa lesia; a cava na tamata mo ni nanumi koya kina? Kei na luve ni tamata, mo ni dautalevi [“kauaitaki,” NW] koya kina?” (Same 8:​3, 4) E rawarawa meda nanuma ni o koya e Cecere e sa rui yawa, e sa rui osooso tale ga me kauaitaki keda na tamata ivalavala ca. Ni lekaleka sara na noda bula da qai sega ni tautauvata kei koya na Kalou, e kila na daunisame nida se talei tiko ga vei Jiova.

E tukuna e dua tale na same: “Sa rekitaki ira ko Jiova era sa rerevaki koya, ko ira era sa nuitaka na nona loloma.” (Same 147:11) Sa bau veivakacegui dina na vakasama e vakavotui ena rua na same qo. Ni Cecere sara o Jiova ni vakatauvatani kei keda, e sega wale ga ni kilai keda na kawatamata, ia e ‘kauaitaki keda,’ e ‘rekitaki keda’ tale ga.

E vakarabailevutaki na vakasama qo ena dua tale na parofisai  ena iVolatabu ena veika e yaco tiko ena gauna qo. Ena gusui Akeai a tukuna kina o Jiova ni na vunautaki e veiyasa i vuravura na itukutuku vinaka ni Matanitu ni Kalou. Na cava ena yaco kina? Qo e dua na ka ena yaco: “Ena qai yaco mai na ka sa domoni e na veimatanitu kecega; ia ka’u na vakasinaita na vale oqo e nai ukuuku.”​—Akeai 2:7.

Na cava na ‘veika sa domoni’ ena soqoni mai na veimatanitu kece? Qo e sega ni vakaibalebale ena iyau vakayago. (Akeai 2:8) Na siliva kei na koula e sega ni vakamarautaki Jiova. Ia e marautaki ira ga na tamata ivalavala ca era sokalou vua nira lomani koya. (Vosa Vakaibalebale 27:11) Qo ‘na veika domoni’ era vakalagilagi koya, e marautaka na nodra veiqaravi vakatabakidua kei na nodra gugumatua. O dua vei ira qo?

Eda na sega beka ni vakabauta nida ka talei vua na Dauveibuli Cecere duadua ni lomalagi kei vuravura nida ivalavala ca. Na noda kila nida ka talei vua e dodonu me uqeti keda meda ciqoma na veisureti vakayalololoma meda toro voleka yani vua.​—Aisea 55:6; Jemesa 4:8.

“Ko sa Tamata Daulomani”

Ena dua na yakavi, a yaco e dua na ka vakasakiti vei Taniela na parofita sa dua toka na itaba. Ni masu tiko o Taniela a basika vakasauri e dua na vulagi, na yacana o Keperieli. Erau a sota ena dua na gauna eliu, e kila kina ni agilosi i Jiova. A vakamacalataka o Keperieli na vuna e basika mai kina: “I Taniela, au sa qai lako mai me’u vakavukui iko, ka mo kila ka mada . . . ni ko sa tamata daulomani.”​—Taniela 9:​21-​23.

Ena dua tale na gauna, a vosa vei Taniela e dua na agilosi nei Jiova, e kaya: “O iko Taniela, na tamata daulomani.” Me vakayaloqaqataki Taniela a kaya na agilosi: “O iko, na tamata daulomani, kakua ni ko rere: mo vakacegu.” (Taniela 10:​11, 19) A cavuti vakatolu vei Taniela ni “tamata daulomani.” Na vosa qo e rawa ni vakaibalebaletaka tale ga na “karoni,” “dokai vakalevu,” se “gonenitoko.”

A vakila o Taniela ni rau veivolekati kei na Kalou, a matata vua ni a vakadonuya tale ga o Jiova na nona veiqaravi ena yalodina. Sa na bau veivakacegui ni tala sara ga mai e dua na nona agilosi na Kalou me vakadeitaka ni kauaitaki koya. Sa rauta me kaya o Taniela: “Kemuni sa vakaukauwataki au.”​—Taniela 10:19.

Na italanoa veivakauqeti ni nona kauaitaka vakayalololoma na nona parofita o Jiova e volai ena nona Vosa me yaga vei keda. (Roma 15:4) Nida vakasamataka na ivakaraitaki i  Taniela eda kila kina na ka meda cakava meda talei kina vua na Tamada vakalomalagi dauloloma.

Vulica Wasoma na Vosa ni Kalou

A dau vulica vagumatua na iVolatabu o Taniela. Eda kila qori ena ka e vola: “Koi au . . . a kila mai nai vola nai wiliwili ni yabaki, sa yaco kina na vosa . . . na kena lala tu ko Jerusalemi.” (Taniela 9:2) Na ivola era tu ena gauna oya e rairai okati kina na ivola uqeti vakalou a vola o Mosese, Tevita, Solomoni, Aisea, Jeremaia, Isikeli, kei na so tale na parofita. Vakasamataka mada na levu ni ivolavivigi e tu vua ena gauna oya, ia e gumatua na wilika kei na nona vakatauvatana na veika e parofisaitaki tu me baleta na kena vakalesui tale mai na sokalou savasava e Jerusalemi. A rairai vakasamataka vakatitobu na ibalebale ni veika e wilika ena nona loqi e cake, na vanua ena sega ni vakasosataki kina. Ni qacoya na vulica na ivolavivigi e vakaukauataka na nona vakabauta qai volekati Jiova tale ga.

Na nona vulica vagumatua na Vosa ni Kalou o Taniela e veisautaka na nona itovo kei na ivakarau ni nona bula. E sega ni vakabekataki ni ka e vulica mai na iVolatabu ni se gone e vakadeitaka kina e lomana me muria na Lawa ni Kalou me baleta na kakana e vakarautaki ena gauna oya. (Taniela 1:8) E muri, a cavuta ena doudou na itukutuku ni Kalou vei ira na iliuliu e Papiloni. (Vosa Vakaibalebale 29:25; Taniela 4:​19-​25; 5:​22-​28) E kilai levu na nona gugumatua, dau dina, kei na nona nuitaki. (Taniela 6:4) Koya e bibi sara, ni a sega ni cakitaka na nona vakabauta me bula kina, ia a nuitaki Jiova ga vakatabakidua. (Vosa Vakaibalebale 3:​5, 6; Taniela 6:​23) Sa rauta me “tamata daulomani” ena rai ni Kalou!

Eda rawa ni kaya ni rawarawa sara na noda vulica na iVolatabu nikua ni vakatauvatani kei na gauna i Taniela. Na ivolavivigi ena gauna oya sa mai dabani me dua taucoko na ivola. Nikua sa tu na iVolatabu taucoko, e okati kina na ivolatukutuku ni kena vakayacori eso na parofisai i Taniela. E sega ni caka rawa na levu ni ivola vakaivolatabu e rawa ni vukei keda kei na iyaya ni vakekeli. * O vakayagataka vinaka tiko? O dau tuvanaka mo wilika wasoma na iVolatabu qai vakasamataka vakatitobu? Ke o cakava qori o na vakila na kena yaga me vakataki Taniela. Ena kaukaua na nomu vakabauta kei na nomu veiwekani kei Jiova. Ena idusidusi nuitaki duadua ena nomu bula na Vosa ni Kalou, o na vakadeitaka kina ni lomani iko.

Gumatua ena Masu

E ivakarau ni bula sara ga i Taniela na masu. Na ka e masulaka e salavata kei na loma ni Kalou. Ni se cauravou, a vakarerei me na vakamatei ke sega ni vakamacalataka rawa na ibalebale ni tadra i Nepukanesa na Tui Papiloni. A sega tale ni lomalomarua o Taniela me kerea na veitaqomaki kei na veitokoni i Jiova. (Taniela 2:​17, 18) Ni oti tale e vica na yabaki, a vakatusa o Taniela ena yalomalumalumu na nona ivalavala ca kei na nodra ivalavala ca na kai nona, qai kerea na veivosoti i Jiova. (Taniela 9:​3-6, 20) Ni sega ni kila na ibalebale ni ka e raivotutaka, a kerea na veivuke ni Kalou. Ena dua na gauna ni yaco qori a rairai yani na agilosi vei Taniela qai vakadeitaka tale vua: “Sa rogoci na nomu vosa.”​—Taniela 10:12.

A sega ni kerekere wale ga na turaga yalodina o Taniela ni masu vua na Kalou. E kaya na Taniela 6:​10: “Sa tekiduru e duruna vakatolu e na veisiga me masu, ka vakavinavinaka vua na nona Kalou, me vaka sa daucakava eliu ko koya.” E levu na vuna a vakavinavinaka kina o Taniela vua na Kalou. A cakava wasoma tale ga. Io, na masu a tiki bibi sara ga ni nona sokalou, a dei tiko ga ena nona daumasu dina ga ni na vakamatei kina. E taleitaka o Jiova na nona tudei.

 Sa bau dua dina na isolisoli talei na masu! Mo kua mada ga ni calata e dua na siga mo masu kina vua na Tamada vakalomalagi. Mo nanuma tale ga mo vakavinavinakataki koya qai vakacaucautaki koya ena veika vinaka e cakava ena vukumu. Talaucaka vua na ka o leqataka se kauai kina. Vakasamataka tale ga na sala a sauma kina na nomu masu qai vakavinavinakataka. Me kua ni totolo ga na nomu masu. Nida talaucaka gona na lomada vei Jiova ena masu eda na vakila sara ga na nona lomani keda. Qo e dua na vuna vinaka meda dau “gumatua ena masu”!​—Roma 12:12.

Vakalagilagia na Yaca i Jiova

Ena sega ni vinaka na nodrau veitokani e rua ke dua vei rau e daunanumi koya ga. Ena rawa ni yaco tale ga qo ena noda veiwekani kei Jiova me vaka a vakadinadinataka o Taniela. Vakasamataka mada na nona a kauaitaka vakalevu me vakalagilagi na yaca i Jiova.

A sauma o Jiova na nona masu ena nona vakatakila vua na tadra i Nepukanesa kei na kena ibalebale. E kaya o Taniela: “Me vakavinavinakataki tiko ka sega ni mudu na yaca ni Kalou: ni sa nona ga na vuku kei na kaukauwa.” Ni vakamacalataka oti vei Nepukanesa na nona tadra kei na kena ibalebale, a vakacaucautaki Jiova vakavica o Taniela ena nona kaya ni o koya ga e dau “vakaraitaka na ka vuni.” Na gauna tale ga a kerea kina na veivosoti i Jiova kei na nona veivuke, a masuta o Taniela: “Na noqu Kalou, . . . ni sa vakatokai e na yacamuni ga na nomuni koro, kei ira na nomuni tamata.”​—Taniela 2:​20, 28; 9:​19.

E levu na ituvaki eda rawa ni vakatotomuria kina na ivakaraitaki i Taniela. Nida masu meda kauaitaka “me dokai” na yaca ni Kalou. (Maciu 6:​9, 10) Meda kua mada ga ni cakava e dua na ka ena vakarogorogocataka na yaca tabu i Jiova. Ia meda dau vakalagilagi Jiova ga nida kacivaka yani na itukutuku vinaka eda kila me baleta na nona Matanitu.

E gadrevi sara ga ena vuravura qo na veilomani kei na veikauaitaki. E veivakacegui dina na noda kila ni kauaitaki ira yadua na sokaloutaki koya o Jiova. Me vaka e kaya na daunisame: “Ni sa vinakati ira na nona tamata ko Jiova: Ena vakaiukuukutaki ira na yalomalumalumu e na bula.”​—Same 149:4.

[iVakamacala e ra]

[Tikina bibi ena tabana e 21]

Ni lomani Taniela na Kalou a tala kina na agilosi o Keperieli me lai vakaukauataki koya

[Tikina bibi ena tabana e 23]

Na nona vulica vagumatua na iVolatabu kei na nona daumasu o Taniela, a veisautaka na nona itovo qai talei kina vua na Kalou