Me Kua Ni Vakayalolailaitaki Iko Na Leqa

“[E]na duatani sara na iotioti ni veisiga, ena vakilai kina e levu na ka dredre.”—2 TIMOCI 3:1.

O SA bau rogoca se raica na kena yaco na ka rarawataki era toka qo?

● E dua na mate rerevaki era mate kina e levu.

● Na dausiga era mate kina e drau vakacaca.

● E dua na uneune era mate kina e udolu vakacaca qai vakacacani na nodra itikotiko e levu tale.

Ni o wilika e vica na ulutaga veitaravi qo, o na rairai vakasamataka kina vakabibi na veika e yaco tu e vuravura. Ena vakamacalataki tale ga kina ni sa tukuna tu mai na iVolatabu ni na yaco na veika qori ena gauna e vakatoka me “iotioti ni veisiga.” *

E sega ni inaki ni ulutaga veitaravi qo me vakadeitaka vei iko nida bula tu ena dua na vuravura leqaleqa. O rairai raica sara ga na leqa era yaco tu. Ia e kena inaki ga mo kila kina ni tiko na inuinui. Ena vakamacalataki kina ni ono na parofisai vakaivolatabu sa vakayacori tiko e ivakadinadina ni sa voleka ni cava na “iotioti ni veisiga.” Na vica na ulutaga qo ena veivosakitaki tale ga kina na ka era tukuna e levu me baleta na ivakadinadina qori, kei na vuna me vakabauti kina ni dua na gauna totoka sa tu qo e matada.

[iVakamacala e ra]