Parofisai 2. Dausiga

“Ena vakilai . . . na leqa ni kakana.”—MARIKA 13:8.

● E gole e dua na turaga ina koro o Quaratadji, Niger, ni vaqara kakana. Era gole mai lomanivanua na wekana, tacina, kei na ganena nira vaqara kakana tale ga. Ia e davo duadua toka ga ena dua na ibe na turaga e tukuni e cake. Na cava e tiko taudua kina? E tukuna o Sidi na turaga ni vanua: “E sega ni rawa ni vakani [ratou na nona vuvale], qai sega ni rawa me raici ratou tiko.”

KA E YACO DINA. E rauta ni dua mai na le vitu na tamata e veiyasa i vuravura era sega ni mamau ena ka era kania e veisiga. E ca sara na ka e yaco ena vanua e wavokita na Sahara mai Aferika, e dua mai na le tolu e sega ni veirauti na kedra ena dua na gauna balavu. Me matata na kena ivakatautauvata oya, vakasamataka e dua na vuvale e tiko kina o tama, o tina, kei na dua na gone. Ke rauta ga e le rua na kakana e tiko, o cei ena walokai? O tama? tina? se o gone? Qori na ka mera vakatulewataka e veisiga na vuvale e sega ni veirauti na kedra.

KA ERA TUKUNA E LEVU. E levu sara na kakana e tu e vuravura. Me lewai vinaka ga na iyaubula e vuravura.

E DINA OYA? Na levu ni kakana e tei qai volitaki ena gauna qo a sega ni bau caka ena veigauna sa sivi. Era rawa tale ga ni lewa vinaka na kakana e tu e vuravura na veiliutaki nikua me wali kina na leqa ni kakana. Ia e guce na nodra sasaga mera cakava qori ena veiyabaki sa sivi.

CAVA MADA O NANUMA? Sa vakayacori tiko na ka e tukuni ena Marika 13:8? Sa wali beka na leqa ni kakana e veiyasa i vuravura ni toro cake na vuku ni tamata?

E dau yaco e liu na uneune kei na dausiga, qai salamuria mai na leqa e vakavuna e dua tale na ka e kilai me baleta na ivakatakilakila ni iotioti ni veisiga.

[Tikina bibi ena tabana e 5]

“E sivia na duanaikatolu na iwiliwili ni gone era mate ni tauvi ira na niumonia, na coka kei na so tale na mate, era rawa ni bula na gone qori ke ra dau kana vakavinaka.”—ANN M. VENEMAN, DAIREKITA E LIU NI UN CHILDREN’S FUND.

[iTaba ni Credit Line ena tabana e 5]

© Paul Lowe/Panos Pictures